ދިފާއީ އަދި ސަލާމަތީ ދާއިރާއިން ގުޅުން ބަދަހި ކުރުމަށް އިންޑިއާ އާއި މެލޭޝިޔާ އިން މަޝްވަރާކޮށްފި

އިންޑިއާ އާއި މެލޭޝިއާއާ ދެމެދު އިގްތިސާދީ ގުޅުން އިތުރަށް ބަދަހިކޮށް ދިފާއީ އަދި ސަލާމަތީ ދާއިރާއިން ގުޅުން ބަދަހި ކުރުމަށް މަސައްކަތް ކުރާނެ ކަމަށް ދެ ގައުމުގެ ލީޑަރުން މިއަދު ވިދާޅުވެއްޖެ އެވެ.

މިއީ މެލޭޝިއާގެ ބޮޑުވަޒީރު އަންވަރު އިބްރާހިމް 2022 ވަނަ އަހަރު ވެރިކަމާ ހަވާލުވެވަޑައިގެންނެވި ފަހުން އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރެއްވި ފުރަތަމަ ދަތުރުފުޅެވެ.

އަންވަރު އިންޑިއާއަށް ދަތުރުފުޅެއް ކުރެއްވި އިރު، ނިއު ދިއްލީއާ ދެމެދު ޒަމާނުއްސުރެ ބޯޑަރު މައްސަލަ ކުރިމަތިވެފައިވާ ޗައިނާއާ ގާތްވުމުގެ މަސައްކަތް ވެސް އަންވަރު ގެންދަަނީ ކުރައްވަމުންނެވެ.

މޯދީގެ ހާރިޖީ ސިޔާސަތުގެ މައިގަނޑު ބަޔަކީ މެލޭޝިއާގެ އިތުރުން އޭޝިއާގެ އެހެން ގައުމުތަކާ އެކު ވިޔަފާރީގެ ގުޅުން ވަރުގަދަކޮށް، އެ ސަރަހައްދުގައި ޗައިނާގެ ނުފޫޒު ގަދަވަމުންދާ ދިއުން ފަހަތަށް ޖެއްސުމެވެ.

ޑިޖިޓަލް ޓެކްނޮލޮޖީ އާއި ޓޫރިޒަމާއި ޓްރެޑިޝަނަލް މެޑިސިން ފަދަ އާ އެއްބަސްވުންތަކެއްގައި ސޮއި ކުރެއްވުމަށް ފަހު ދެ ގައުމުގެ ވެރިން ވަނީ ނޫސްވެރިންނާ ބައްދަލު ކުރައްވައިފަ އެވެ.

އަންވަރު ވިދާޅުވީ ދެ ގައުމުގެ ދެމެދުގައި ޒަމާނުއްސުރެ އޮތީ ރަނގަޅު ގުޅުމެއް ކަމަށެވެ. އަދި އޭނާ ވިދާޅުވީ އެ ގުޅުން ގިނަ ދާއިރާތަކަކުން ހަރުދަނާ ކުރަން ޖެހޭ ކަމަށެވެ. އޭގެ ތެރޭގައި ދެ ގައުމުގެ ބޯޑަރު ހިމާޔަތްކުރުމާއި އިމާރާތްކުރުމުގެ ދާއިރާ އާއި ދަނޑުވެރިކަމާއި އަސްކަރީ އެއްބާރުލުން ދިނުން ހިމެނޭ ކަމަށް އަންވަރަރު ވިދާޅުވި އެވެ.

މޯދީ ވިދާޅުވީ ދިފާއީ ދާއިރާއިން އެއްބާރުލުން ދިނުމާ ބެހޭ ގޮތުން ދެ ބޭފުޅުން މަޝްވަރާ ކުރެއްވި ކަމަށާއި ސެމިކޮންޑަކްޓަރު އުފެއްދުން ފަދަ އާ ސިނާއަތްތަކުގައި އެއްބާރުލުން ދޭން ދެ ގައުމުން މަޝްވަރާ ކުރި ކަމަށެވެ.

އޭގެ އިތުރުން ވިޔަފާރި އާއި އިންވެސްޓްމަންޓްތައް އިތުރުވާން ޖެހޭ ކަމަށް  އޭނާ ވިދާޅުވި އެވެ.

މެލޭޝިއާގެ ބޮޑުވަޒީރަށް އިންޑިއާގެ ރިޔާސީ ގަނޑުވަރު ރާޝްތުރަޕަތީ ބަވަންގައި މަރުހަބާ ދެންނެވުމަށް ފަހު ވަނީ އިންޑިއާގެ މިނިވަންކަމުގެ ލީޑަރު މަހާތުމާ ގާންދީގެ މަގުބަރާއަށް ޒިޔާރަތް ކުރައްވައިފަ އެވެ. 

ދެ ގައުމުގެ ދެމެދުގައި އޮތް ވިޔަފާރީގެ އަގު 20 ބިލިއަން ޑޮލަރަށް އަރަ އެވެ. މެލޭޝިއާއަކީ އިންޑިއާގެ 16 ވަނަ އަށް އެންމެ ބޮޑު ވިޔަފާރީގެ ބައިވެރިޔާ އެވެ. އަދި މެލޭޝިއާގެ އެންމެ ބޮޑު 10 ވިޔަފާރީގެ ބައިވެރިންގެ ތެރޭގައި އިންޑިއާ ހިމެނެ އެވެ.

މެލޭޝިއާގައި ގާތްގަނޑަކަށް 70 ވަރަކަށް ކުންފުނި ހިންގަމުން އަންނައިރު، މެލޭޝިއާގައި އިންޑިއާގެ 150 އަށް ވުރެ ގިނަ ކުންފުނި އޮޕަރޭޓް ކުރާ އިރު، އެ ގައުމުގެ އާބާދީގެ ގާތްގަނޑަކަށް %7 ކުރަނީ އިންޑިއާ މީހުންނެވެ.