އީރާން ދުނިޔެއަށް ހުޅުވާލާނެ ކަމަށް ވައުދުވި މަސްއޫދު ޕެޒެޝްކިއަން އިންތިހާބު ކާމިޔާބު ކުރައްވައިފި

އީރާން ދުނިޔެއަށް ހުޅުވާ ލައްވާނެ ކަމަށް ވައުދު ވެވަޑައިގެންނެވި މަސްއޫދު ޕެޒެޝްކިއަން އެ ގައުމުގެ ރައީސް ކަމުގެ އިންތިހާބު ކާމިޔާބު ކުރައްވައިފި އެވެ. އޭނާ ވާނީ އެ ގައުމުގެ އިންތިހާބީ ނުވަ ވަނަ ރައީސަށެވެ.

ރިޔާސީ ރޭހުގައި ވާދަކުރެެއްވި ހަމައެކަނި މެދުމިނުގެ ކެނޑިޑޭޓަކީ މަސްއޫދު ޕެޒެޝްކިއަން އެވެ. އޭނާ ވަނީ %53.7 ވޯޓު ނުވަތަ 30 މިލިއަނަށް ވުރެ ގިނަ ވޯޓުގެ ތެރެއިން 16.3 މިލިއަން ވޯޓް ހޯއްދަވައިފަ އެވެ. އޭނާގެ ވާދަވެރިޔާ ސައީދު ޖަލީލީ އަށް ލިބިވަޑައިގަތީ %44.3 ނުވަތަ 13.5 މިލިއަން ވޯޓެވެ.

މިއަދު ޕެޒެޝްކިއަން ވަނީ "ކުރިއަށް އޮތް އުނދަގޫ މަގު" ގަބޫލުކުރެއްވި ނަމަވެސް އީރާނުގެ ހުރިހާ ރައްޔިތުންނަށް ދީލަތި އަތް ދިއްކޮށްލައްވައިފަ އެވެ.

"އަޅުގަނޑު އަތް ތިޔަ ބައިމީހުންނާ ދިމާއަށް ދިއްކުރަން. އަޅުގަނޑު ﷲ ގަންދީ ހުވާކުރަން ތިޔަ އިއްޒަތްތެރިން އެކަނިކޮށްނުލާނެކަން. އަޅުގަނޑު ވެސް އެކަނި ދޫކޮށްނުލާތި،" ޕެޒެޝްކިއަން ވިދާޅުވި އެވެ.

ދުނިޔޭގެ ލީޑަރުން ގެންދަވަނީ ޕެޒެޝްކިއަން އަށް މަރުހަބާ ވިދާޅުވަމުންނެވެ.

ރައީސް ވުލަޑިމިއާ ޕޫޓިން ވަނީ ޕެޒެޝްކިއަންއަށް މަރުހަބާ ވިދާޅުވެފަ އެވެ. އަދި ވިދާޅުވީ ރަޝިޔާ-އީރާނުގެ ގުޅުމަށް ޕެޒެޝްކިއަންގެ ސަބަބުން އެހީތެރިކަން ލިބިގެންދާނެ ކަމަށް އުއްމީދު ކުރައްވާ ކަމަށެވެ.

އިންތިހާބުގެ ކުރިން ޕުޓިން ވަނީ ކަޒަކިސްތާނުގެ އަސްތާނާގައި ކުރިއަށް ދިޔަ ޝަންހާއީ ކޯޕަރޭޝަން އޯގަނައިޒޭޝަން ސަމިޓްގެ ހަވާސާގައި އީރާނުގެ އިންތިގާލީ ރައީސް މުހައްމަދު މޮހްބަރާއި ބައްދަލުކުރައްވައިފަ އެވެ.

ރަޝިޔާއާއި އީރާނާ ދެމެދު ފުޅާ ދާއިރާއެއްގައި އެއްބާރުލުން ދިނުމުގެ އެއްބަސްވުމެއް އެކުލަވާލުމަށް މަޝްވަރާ ކުރަމުންދާ ކަމަށް ރަޝިޔާގެ ހާރިޖީ ވުޒާރާއިން ވަނީ ބުނެފަ އެވެ.

ސަލްމާން ރަސްގެފާނާއި ވަލީއަހުދު ވަނީ ޕެޒެޝްކިއަންއަށް މަރުހަބާ ވިދާޅުވެފަ އެވެ. އަދި ދެ ގައުމުގެ ރައްޔިތުންގެ މެދުގައި އަޮތް ގުޅުން އިތުރަށް ބަދަހިވެ، ދެ ގައުމުގެ މަސްލަހަތު ފުރިހަމަކުރުމަށް ގުޅިގެން މަސައްކަތް ކުރެއްވުމުގެ ޝައުގުވެރިކަން އޮތް ކަމުގެ ޔަގީންކަން ރަސްގެފާނާއި ވަލީއަހުދު ވަނީ ދެެއްވައިފަ އެވެ.

އީރާނާއި ސައުދީ އަރަބިއްޔާއާ ދެމެދު އެތައް އަހަރެއް ވަންދެން އޮތް ނުތަނަވަސް ކަމަށް ފަހު ޗައިނާގެ މެދުވެރިވެ، އަލުން ޑިޕްލޮމެޓިކް ގުޅުން ގާއިމުކުރަން އެއްބަސްވީ 2023 ވަނަ އަހަރުގެ މާޗް މަހުގެ ތެރޭގަ އެވެ. އޭގެ ފަހުން އެ ގުޅުން ބަދަހިކުރުމުގެ ގޮތުން އެ ދެ ފަރާތުން ވަނީ ގަވާއިދުން ގުޅުން ބަދަހިކޮށްފަ އެވެ.

ޕެޒެޝްކިއަންއަށް ފޮނުއްވި މެސެޖުގައި ރައީސް ޝީ ޖިންޕިން ވިދާޅުވީ ޗައިނާ-އީރާނުގެ ގުޅުން އިތުރަށް ބަދަހިކުރެއްވުމަށް ވަރަށް ބޮޑު އަހަންމިއްޔަތެއް ދެއްވާ ކަމަށާއި ޗައިނާ-އީރާން ކޮމްޕްރެހެންސިވް ސްޓްރެޓެޖިކް ޕާޓްނާޝިޕް އިތުރަށް ކުރިއެރުވުމުގައި އިސްކޮށް ހަރަކާތްތެރިވުމަށް އާ ރައީސާ އެކު މަސައްކަތް ކުރެއްވުމަށް ތައްޔާރަށް ހުންނެވި ކަމަށެވެ. 

އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ ޕެޒެޝްކިއަންއާ އެކު ދެގައުމުގެ ދެމެދުގައި އޮތް ގާތް އަދި ޒަމާންވީ ގުޅުން އިތުރަށް ބަދަހިކޮށް، ރައްޔިތުންނާއި ސަރަހައްދުގެ ލާބަ އާއި މަންފާއަށް ޓަކައި ގުޅިގެން މަސައްކަތް ކުރައްވާނެ ކަމަށް އުއްމީދު ކުރައްވާ ކަމަށެވެ.

އޭގެ އިތުރުން ޕެޒެޝްކިއަން މަރުހަބާ ކިޔި ގައުމުތަކުގެ ތެރޭގައި އަޒަރުބައިޖާން، ވެނެޒުއޭލާ، އިރާގް، ޕާކިސްތާން، ކުވައިތު، ސީރިއާ، ގަތަރު، ބެލަރުސް، ފަދަ ގައުމުތައް ހިމެނެ އެވެ.