އިންޑޮނީޝިއާގައި އަލިފާން ފަރުބަދައެއް ގޮވި ހާދިސާގައި މަރުވި މީހުން އަދަދު 22 އަށް

މަރުވެފައިވާ އިތުރު ނުވަ މީހެއްގެ ހަށިގަނޑާ އެކު، އިންޑޮނީޝިއާގެ އަލިފާން ފަރުބަދަ މަރާޕީ ގޮވުމުގެ ސަބަބުން މަރުވި މީހުންގެ އަދަދު 22 އަށް އަރައިފި އެވެ.

ރައްކާތެރި ސަބަބުތަކާ ހުރެ މަޑުޖައްސާލާފައި އޮތުމަށް ފަހު، ގެއްލިގެން އުޅޭ 10 މީހަކު ހޯދުމުގެ މަސައްކަތްތައް އިއްޔެ ވަނީ ފަށައިފަ އެވެ. އޭގެ ތެރެއިން ނުވަ މީހެއްގެ ހަށިގަނޑު މެންދުރު ފަހު ހޯދިފައިވާ ކަމަށާއި އިތުރު މީހަކު އަދިވެސް ނުފެންނަ ކަމަށް އިދާރާތަކުން ވަނީ ބުނެފަ އެވެ.

މީގެ އިތުރުން، އަލިފާން ފަރުބަދަ ގޮވުމާ ގުޅިގެން އަނިޔާވި 12 މީހަކަށް ހޮސްޕިޓަލުގައި އަންނަނީ ފަރުވާ ދެމުންނެވެ.

މަރާޕީ ފަރުބަދަ ގޮވަމުން ދިޔުމުގެ ސަބަބުން މީހުން ސަލާމަތް ކުރުމުގެ މަސައްކަތްތަކަށް ހުރަސްތައް ކުރިމަތިވަމުންދާތާ ދުވަސްތަކެއް ވެއްޖެ އެވެ.

މަރާޕީގެ ގޮވުން ބަލަހައްޓާ އޮފީހުގެ ވެރިޔާ އަހްމަދު ރިފަންޑީ އޭއެފްޕީއަށް ވިދާޅުވިގޮތުގައި، އިއްޔެ އެކަނި ވެސް ތަފާތު ފަސް ފަހަރަކު ފަރުބަދަ ވަނީ ގޮވާފަ އެވެ.

"މަރާޕީ [ފަރުބަދަ] އަދިވެސް ވަރަށް ހަރަކާތްތެރި. ދުމުން ފުރިފައި އޮތީމަ ކޮލަމްގެ އުސްމިނެއް ނުފެނޭ،" އޭނާ ވިދާޅުވި އެވެ.

ބީބީސީއާ ވާހަކަދެއްކި އިމަޖެންސީ މަސައްކަތްތެރިން ބުނިގޮތުގައި، ގެއްލިފައިވާ މީހުން ހޯދުމުގެ މަސައްކަތްތައް މިހާރު ކުރަމުން އަންނަނީ ގޮވުންތައް މަޑުޖެހިލާ ވަގުތުތަކުގަ އެވެ. 

އާދިއްތަ ދުވަހުގެ ގޮވުމަކާ އެކު މަރާޕީ ފަރުބަދައިން ނުކުތް ދުންގަނޑު ވަނީ 3 ކިލޯމީޓަރު އުހަށް އުފުލިފަ އެވެ. އަދި ފަރުބަދަ ކައިރީގައި ހުރި އަވަށްތައް ވަނީ އަޅިން ފުރާލާފަ އެވެ.

އަދި ފަރުބަދަ ގޮވި ވަގުތު އެ ސަރަހައްދުގައި ހައިކް ކުރަން ނުކުމެ 75 މީހަކު އުޅުނު އިރު، މިގެ ތެރެއިން ގިނަ ބަޔަކު ސަލާމަތް ކޮށް އަދި އަނިޔާވި މީހުންނަށް ވަނީ ފަރުވާ ދީފަ އެވެ.

އިންޑޮނީޝިއާގައިވާ 127 އަލިފާން ފަރުބަދައިގެ ތެރެއިން މަރާޕީ އަކީ އެންމެ ހަރަކާތްތެރި އެއް ފަރުބަދަ އެވެ. އިންޑޮނީޝިއާ ބަހުން މައުންޓް މަރާޕީގެ މާނައަކީ "އަލިފާނުގެ ފަރުބަދަ" އެވެ.

މަރާޕީ ފަރުބަދަ ގޮވައިގެން އެންމެ ގިނަ އަދަދަކަށް މީހުން މަރުވެފައި ވަނީ 1979 ވަނަ އަހަރު އެވެ. އެ ފަހަރު 60 މީހަކު މަރުވެފައިވެ އެވެ.