ފިލިޕީންސްގެ މަޔޮން އަލިފާން ފަރުބަދައިން އަލިފާން ފައިބާތީ އެތައް ހާސް ބަޔަކު ރައްކާތެރި ހިސާބުތަކަށް ބަދަލުކޮށްފި

ފިލިޕީންސްގެ އެންމެ މަޝްހޫރު އަލިފާން ފަރުބަދަ ކަމުގައިވާ މަޔޮން އިން ދިޔާ އަލިފާން ފައިބަން ފެށުމާ ގުޅިގެން 13،000 އެއްހާ މީހުން ރައްކާތެރި ހިސާބުތަކަށް ބަދަލު ކޮށްފި އެވެ. 

މި ހާލަތު ބަދަލުވޭތޯ އިދާރާތަކުން ވަރަށް ގާތުން ބަލަމުން އަންނަ ކަމަށް  ފިލިޕީންސްގެ އިންސްޓިޓިއުޓް އޮފް ވޮލްކެނޮލޮޖީ އެންޑް ސެއިސްމޮލޮޖީގެ ޑިރެކްޓަރު ޓެރެސިޓޯ ބަކޮލްޗޮލް ވަނީ ވިދާޅުވެފަ އެވެ.

"އަހަރެމެންނަށް މިހާރު ފެންނަމުން މިދަނީ އެފިއުސިވް ގޮވުމެއް. ދުވަހުން ދުވަހަށް މިކަން ބަލަމުން މިދަނީ،" ބަކޮލްކޮލް ދި އެސޯސިއޭޓެޑް ޕްރެސް ނޫސް އެޖެންސީއަށް ވިދާޅުވި އެވެ.

މަޔޮން ފަރުބަދަ ކައިރީ ދިރިއުޅެމުން އައި މަދުވެގެން 12،800 މީހުން ވަނީ ރައްކާތެރި ހިސާބުތަކަށް ބަދަލު ކޮށްފަ އެވެ.

ވެރިރަށް މެނީލާގެ އިރުދެކުނުން 330 ކިލޯމީޓަރު ދުރުގައިވާ މަޔޮން ފަރުބަދައިގެ ވަށައިގެންވާ ސަރަހައްދުތަކަކީ ނުރައްކާތެރި ހިސާބުތަކެއް ކަމަށް ކަނޑައަޅާފައިވީ ނަމަވެސް، ދާނެ އެހެން ތަނެއް ނެތުމުގެ ސަބަބުން އެތައް ހާސް ބަޔަކު މި ސަރަހައްދުގައި ދިރިއުޅެމުން ގެންދެ އެވެ. 

މަޔޮން ވަރުގަދައަށް ގޮވަން ފަށައިފި ނަމަ، ނުރައްކާތެރި ކަމަށް ކަނޑައަޅާފައިވާ ސަރަހައްދު ބޮޑު ކުރުން އެކަށީގެންވާ ކަމަށް ބަކޮލްކޮލް ވިދާޅުވި އެވެ. 

މަޔޮންގެ ހަރަކާތްތައް އިތުރުވުމުގެ ސަބަބުން ފަރުބަދަ ގުޑާ މިންވަރާއި ފަރުބަދަ މަތިން ގާ ފައިބާ މިންވަރު އިތުރުވެފައިވާ ކަމަށް ވޮލްކެނޮލޮޖިސްޓުން ވިދާޅުވެ އެވެ. އަދި ފަރުބަދައިން ނުކުންނަ ވިހަ ދުންތައް ވެސް ހޮނިހިރު ދުވަހު ތިން ގުނަ އިތުރުވެފައިވާ ކަމަށް އެ ފަރާތްތަކުން ވަނީ ވިދާޅުވެފަ އެވެ.

މަޔޮން ފަރުބަދައާ ގުޅިގެން ކުރިމަތިވެފައިވާ ނުރައްކާތެރި ހާލަތު ފިލިޕީންސްގެ ސަރުކާރުން މި ވަގުތު ގިންތިކޮށްފައި ވަނީ ތިންވަނަ ދަރަޖައިގަ އެވެ. ޖުމުލަ ފަސް ދަރަޖަ ހިމެނޭ މި މިންގަނޑުގައި ތިންވަނަ ދަރަޖައަކީ ކުރިއަށް އޮތް މަދު ދުވަސްކޮޅު ނުވަތަ ހަފްތާތަކެއް ތެރޭގައި ފަރުބަދަ ގޮވާނެ ކަމަށް ބެލެވޭ ހާލަތްތަކެވެ. 

މަޔޮން ފަރުބަދަ ހުންނަ އަލްބޭ ޕްރޮވިންސަކީ ޓޫރިސްޓުންގެ މެދުގައި ވަރަށް މަގުބޫލު މަންޒިލެކެވެ.