'ދުނިޔެ ބަދަލުކޮށްލާ' މެލޭރިއާ ވެކްސިނަށް ހުއްދަ ދިން ފުރަތަމަ ގައުމަކަށް ގާނާ ވެއްޖެ

'ދުނިޔެ ބަދަލުކޮށްލާ" ވެކްސިނެއް ކަމަށް އެއުފެއްދި ސައިންސްވެރިން ވިދާޅުވެފައިވާ މެލޭރިއާ ވެކްސިނަކަށް ހުއްދަ ދިން ފުރަތަމަ ގައުމަކަށް ގާނާ ވެއްޖެ އެވެ.

ކުރީގެ ވެކްސިންތަކާ އަޅާ ބަލާއިރު އާރު21ގެ ނަންދީފައިވާ މި ވެކްސިން މެލޭރިއާ ބަލި ޖެހުން ހުއްޓުވުމުގައި މާ ކާމިޔާބެވެ. 

އާރު21ގެ ކާމިޔާބީގެ މިންވަރާއި އޭގެ ރައްކާތެރިކަން އެންމެ ފަހުން ހިންގުނު ޓެސްޓުތަކުން ގާނާގެ ސިއްހަތާ ބެހޭ ވުޒާރާތަކުން ވަނީ ވަޒަންކޮށްފަ އެވެ. އަދި މި ޓެސްޓުތަކުގެ ނަތީޖާތައް ގާނާއިން އާންމުކޮށްފައި ނުވި ނަމަވެސް މި ވެކްސިން ބޭނުން ކުރުމަށް ވަނީ ނިންމާފަ އެވެ.

ދުނިޔޭގެ ސިއްހަތާ ބެހޭ ޖަމިއްޔާ (ޑަބްލިއުއެޗްއޯ) އިން ވެސް އަންނަނީ މި ވެކްސިންއަށް ހުއްދަ ދިނުމަށް ވިސްނަމުން ނެވެ.

ކޮންމެ އަހަރަކު މެލޭރިއާ ބަލީގައި 620،000 މީހުން މަރުވެ އެވެ. މީގެ ތެރޭގައި ގިނައީ ކުޑަކުދިން ނެވެ.

މެލޭރިއާ ބަލި ޖައްސާ ޕެރެސައިޓުން އިންސާނާގެ ހަށިގަނޑު ރައްކާތެރިކުރުމަށް ސައިންސުގެ ދުނިޔެއިން ފާއިތުވެ ދިޔަ ގަރުނެއްހާ ދުވަހު ބޮޑެތި މަސައްކަތްތަކެއް އަންނަނީ ކުރަމުން ނެވެ.

އެފްރިކާގެ ބާކީނާ ފާސޯގައި ހިންގި އާރު21 ވެކްސިން ޓެސްޓުތަކުގައި ފުރަތަމަ މި ވެކްސިންގެ ތިން ޑޯޒު ދިނުމަށް ފަހު އަހަރެއް ފަހުން އިތުރު ބޫސްޓަރު ޑޯޒެއް ދިނުމުން %80 މީހުންނަށް މި ބަލި ނުޖެހޭ ކަމަށް ވަނީ ހޯދިފަ އެވެ.

ނަމަވެސް ގިނަ ބަޔަކު މި ވެކްސިން ބޭނުންކުރަން ފެށުމާ ގުޅިފައި ވަނީ 5،000 މީހުންގެ މެދުގައި ހިންގާ ޓެސްޓުތަކެއްގެ ނަތީޖާގެ މައްޗަށެވެ. މި ޓެސްޓުތަކުގައި މުޅިން ހެން ހިމެނުމަށް ރޭވިފައި އޮތީ ކުޑަކުދިން ނެވެ. އަދި މިދިޔަ އަހަރުގެ ފަހުކޮޅު މިފަދަ ދިރާސާއެއް ހިންގުމަށް ހަމަޖެހިފައި އޮތް ނަމަވެސް، މިފަދަ ޓެސްޓުތަކެއް ހިންގާ އެކަމުން ނުކުމެފައިވާ ނަތީޖާ ރަސްމީ އެއްވެސް ފަރާތަކުން އަދި ޝާއިއުކޮށްފައެއް ނުވެ އެވެ.

ނަމަވެސް މި ނަތީޖާތައް އެފްރިކާގެ ބައެއް ސަރުކާރުތަކުގެ ވުޒާރާތަކާއި އަދި ސައިންސްވެރިންނާ ވަނީ ހިއްސާ ކުރެވިފަ އެވެ.  މީގެ ތެރޭގައި ތިން ހަފްތާ އާއި ތިން އަހަރާ ދެމެދުގެ ތުއްތުކުދިންނަށް މި ވެކްސިން ބޭނުން ކުރަން ފަށަން ހުއްދަ ދިން ގާނާގެ ފުޑް އެންޑް ޑްރަގް އޮތޯރިޓީ ވެސް ހިމެނެ އެވެ.

އެފްރިކާގެ ބައެއް ސަރުކާރުތަކާއި ޑަބްލިއުއެޗްއޯ އިން ވެސް މިހާރު އަންނަނީ މި ނަތީޖާތައް ބަލާ ދިރާސާކުރަމުން ނެވެ.

މި ވެކްސިން އުފެއްދި ޔުނިވާސިޓީ އޮފް އޮކްސްފޯޑުގެ ޖެނާ އިންސްޓިޓިއުޓްގެ ޑިރެކްޓަރު ޕްރޮފެސާ އޭޑްރިއަން ހިލް ވިދާޅުވީ އެފްރިކާއިން މި މަސައްކަތް ހަލުވިކޮށްފައި ވަނީ ނިމިދިޔަ ޕެންޑެމިކުގައި ކޯވިޑް ވެކްސިންތައް އެފްރިކާއަށް ލިބުން ލަސްވުމާ ގުޅިގެނެވެ.

އަދި ކުރިއަށް އޮތް އަހަރުތަކުގައި މެލޭރިއާ ޖެހިގެން ކުޑަކުދިން މަރުވާ މިންވަރު މި ވެކްސިނުން މަދުކޮށްދީ، ދިގު މުއްދަތުގައި މުޅި ދުނިޔެއިން މެލޭރިއާ ބަލި އެކީ ނައްތާލުމަށް މި ވެކްސިން އެހީތެރިވެދޭނެ ކަމަށް އުއްމީދު ކުރައްވާ ކަމަށް ވެސް އޭނާ ވިދާޅުވި އެވެ.

އާރު21 ވެކްސިން އުފެއްދުމަށް ގާނާގެ އަކްރާގައި ބޮޑު ކާރުހާނާއެއް އަޅާ އަހަރަަކަށް 100 އާއި 200 މިލިއަން ޑޯޒުގެ ވެކްސިން އުފެއްދުމަށް ދަ ސެރަމް އިންސްޓިޓިއުޓް އޮފް އިންޑިއާ އިން އަންނަނީ މިހާރު ތައްޔާރުވަމުން ނެވެ.