(ފޮޓޯ/ ގެޓީ އިމޭޖެސް)
އިންޑިއާގައި 5ޖީގެ ހިދުމަތަށް 25 ބިލިއަން ޑޮލަރުގެ މަޝްރޫއުއެއް މުކޭޝް އަމްބާނީ ލޯންޗުކޮށްފި
ކުރިއަށް އޮތް ދެ މަސް ދުވަސް ތެރޭ އިންޑިއާގައި 5ޖީ މޯބައިލް އިންޓަނެޓު ހިދުމަތް ދޭން ފެށުމަށް 25 ބިލިއަން ޑޮލަރުގެ މަޝްރޫއުއެއް އިންޑިއާގެ މަލްޓި ބިލިއަނަރު މުކޭޝް އަމްބާނީ ލޯންޗު ކުރައްވައިފި އެވެ.
މުވާސަލާތީ ސިނާއަތުން ފެށިގެން ގޮސް ރީޓެއިލް ސިނާއަތުގައި ވެސް އޮޕަރޭޓު ކުރަމުން އަންނަ ރިލަޔަންސް އިންޑަސްޓްރީސްގެ ވެރިޔާ އަމްބާނީ ވިދާޅުވިގޮތުގައި 5ޖީގެ ހިދުމަތް ފުރަތަމަ ދޭން ފަށާނީ ނިއު ދިއްލީ އާއި މުމްބާއީ ފަދަ ބޮޑެތި ސިޓީތަކުންނެވެ.
އަދި އަންނަ އަހަރު ނިމުމުގެ ކުރިން މުޅި އިންޑިއާއަށް މި ހިދުމަތް ފުޅާކުރާނެ ކަމަށް އަމްބާނީ ވިދާޅުވި އެވެ.
ރިލަޔަންސް ކުންފުނީގެ އަހަރީ ބައްދަލުވުމެއްގައި އިއްޔެ ވާހަކަ ދައްކަވަމުން އަމްބާނީ ވިދާޅުވިގޮތުގައި ރިލަޔަންސްގެ 5ޖީ ހިދުމަތް މުޅި އިންޑިއާއަށް ފޯރުކޮށްދެވޭ ހިސާބަށް ދިޔުމުން އެ ނެޓްވޯކު ވެގެން ދާނީ މުޅި ދުނިޔޭގައި ވެސް އެންމެ ފުޅާކޮށް 5ޖީގެ ހިދުމަތް ދޭ ނެޓްވޯކަށެވެ.
ރިލަޔަންސް އިންޑަސްޓްރީސްގެ 5ޖީ ނެޓްވޯކުގެ މަސައްކަތް ކުރިއަށް ގެންދިއުމަށް ހަމަޖެހިފައި ވަނީ އެ ކުންފުނީގެ ދަށުން ހިންގާ ޖިއޯ ކުންފުނިންނެވެ. ޖިއޯ އަކީ އިންޑިއާގެ އެންމެ ބޮޑު މޯބައިލް އޮޕަރޭޓަރެވެ.
ކުންފުނީގެ އަހަރީ ބައްދަލުވުމުގައި އަމްބާނީ އިތުރަށް ވިދާޅުވިގޮތުގައި ރިޔަލަންސް އިންޑަސްޓްރީސް އިން އަންނަނީ ބަޖެޓް 5ޖީ ފޯނެއް ލޯންޗުކުރުމުގެ މަސައްކަތް އެމެރިކާގެ ގޫގުލްއާ އެކު ކުރަމުންނެވެ. ނަމަވެސް ފޯނު ލޯންޗު ކުރާނެ ތާރީހެއް އަދި ވިއްކާނީ ކިހާ ވަރަކަށް ކަމެއް އަމްބާނީ ވިދާޅެއް ނުވެ އެވެ.
މިވަގުތު އިންޑިއާގައި ލިބެން ހުރި އެންމެ އަގުހެޔޮ 5ޖީ ފޯނުގެ އަގު އުޅެނީ 150 އެމެރިކާ ޑޮލަރުގަ އެވެ.
ރިލަޔަންސް އިންޑަސްޓްރީން 25 ބިލިއަން ޑޮލަރު ހަރަދުކޮށްގެން 5ޖީ ހިދުމަތް ފަށާނެކަން އިއުލާނުކޮށްފައި މިވަނީ އިންޑިއާގައި މޯބައިލް އޮޕަރޭޓަރުންގެ މެދުގައި ވާދަވެރިކަން ވަރަށް ބޮޑުވެފައި ވަނިކޮށެވެ.
އިންޑިއާގެ ސަރުކާރުން މި މަހު ކުރީކޮޅު ވަނީ 5ޖީ ނެޓްވޯކުތަކުގެ ބޭންޑްވިޑްތުތައް ވިއްކުމަށް ބީލަމަށް ލާފަ އެވެ. މި ބީލަމަށް 19 ބިލިއަން ޑޮލަރާ އެކު އެންމެ ބޮޑު އަގު ހުށައަޅައި ބީލަން ކާމިޔާބުކޮށްފައި ވަނީ ރިލަޔަންސްގެ ޖިއޯ ކުންފުނިންނެވެ. ބިޔަ ކުންފުނިތައް ކަމުގައިވާ ވޮޑަފޯން، އައިޑިއާ، ބާރަތީ އެއާޓެލް އަދި މި ސިނާއަތަށް އަލަށް ވަދެފައިވާ އަޑާނީ ޑާޓާ ނެޓްވޯކްސް އިން ވެސް ވަނީ މި ބީލަމުގައި ވާދަކޮށްފަ އެވެ.
ހައި ސްޕީޑް މޯބައިލް އިންޓަނެޓުގެ ފަސްވަނަ ޖީލު ނުވަތަ 5ޖީ އަކީ އަލަށް ތައާރަފުވެ ފުޅާވަމުން އަންނަ، ޑްރައިވަރުން ނެތި ދުއްވާ ކާރުތަކާއި، އާޓިފިޝަލް އިންޓެލިޖެންސް ފަދަ ސިނާއަތްތަކަށް ބޭނުންވާ ފެންވަރުގެ ނެޓްވޯކެކެވެ. މިފަދަ ޓެކްނޮލޮޖީތަކާ އެކު އިންޑިއާ 1 ޓްރިލިއަން ޑޮލަރުގެ ޑިޖިޓަލް އިގްތިސާދަކަށް ބަދަލުކޮށްލުމަށް އިންޑިއާ ސަރުކާރުން އަންނަނީ މަސައްކަތް ކުރަމުންނެވެ.