ރޭ ލިވަޕޫލްގެ ދަނޑުގައި ކުޅުނު ޗެމްޕިއަންސް ލީގުގެ މެޗުގައި ރެއާލް މެޑްރިޑްގެ ކީލިއަން އެމްބާޕޭ (ކ) ހުއްޓުވަނީ
ލިވަޕޫލުގެ ދަތުރަށް ހުއްޓުމެއް ނެތި ރެއާލް ވެސް ބަލިކޮށްފި
ކުރީގެ ކޯޗު ޖާގެން ކްލޮޕްއަށް ވެސް ނުވި ކަމަކީ ރެއާލް މެޑްރިޑް ބަލިކުރުމެވެ. ޗެމްޕިއަންސް ލީގުގެ ފައިނަލްގައި 2018 އާއި 2022ގައި ބަލިވީ ރެއާލް އަތުންނެވެ.
ރޭ އަމިއްލަ ދަނޑުގައި އެންމެ ފަހުގެ ޗެމްޕިއަންއާ ދެކޮޅަށް ލިވަޕޫލް ނުކުތް އިރު ނަތީޖާއަކީ ހަ ބައްޔާއި ދެ މެޗު އެއްވަރުވުމެވެ.
ނަމަވެސް އާ ކޯޗު އާނޭ ސްލޮޓް ރޭ އެވަނީ 2-0 އިން ރެއާލްގެ މައްޗަށް ކާމިޔާބު ހޯދައިފަ އެވެ. މިއީ އިނގިރޭސި މަޝްހޫރު ކްލަބްގެ ކުޅުންތެރިންނާއި ސަޕޯޓަރުންނަށް ހަމަޖެހުމުގެ ފުން ބޮޑު ނޭވާއެކެވެ.
އެ ނަތީޖާ ހަމައެެކަނި އެހާ ހިސާބަކުން ނުނިމެ އެވެ. އިނގިރޭސި ޕްރިމިއަ ލީގުގެ ތާވަލްގެ އެއްވަނާގައި ވެސް މި ވަގުތު އޮތް ލިވަޕޫލް އާ ޗެމްޕިއަންސް ލީގުގައި މިހާތަަނަށް ކުޅުނު ފަސް މެޗު ވެސް ކާމިޔާބުކުރީ އެވެ. މިއީ ލީގު ބުރުގައި ވާދަކުރާ އަނެއް 35 ޓީމަށް ކުރެވުނު ކަމެއް ނޫނެވެ.
ޗެމްޕިއަންސް ލީގުގެ ގަދަ އަށެއް
-
1-
ލިވަޕޫލް، ކުޅުނު 5، ޕޮއިންޓް 15
-
2-
އިންޓަ މިލާން، ކުޅުނު 5، ޕޮއިންޓް 13
-
3-
ބާސެލޯނާ، ކުޅުނު 5، ޕޮއިންޓް 12
-
4-
ޑޯޓްމުންޑް، ކުޅުނު 5، ޕޮއިންޓް 12
-
5-
އެޓަލާންޓާ، ކުޅުނު 5، ޕޮއިންޓް 11
-
6-
ލަވަކޫސަން، ކުޅުނު 5، ޕޮއިންޓް 10
-
7-
އާސެނަލް، ކުޅުނު 5، ޕޮއިންޓް 10
-
8-
މޮނާކޯ، ކުޅުނު 5، ޕޮއިންޓް 10
ރޭގެ މެޗުގެ ދެ ވަނަ ހާފުގައި ލިވަޕޫލަށް ލަނޑު ޖަހައިދިނީ މެކް އެލިސްޓާ އާއި ކޮޑީ ގެކްޕޯ އެވެ.
ލިވަޕޫލް ދޫކޮށްލަން ކްލޮޕް ނިންމުމުން އުފެދުނު އެންމެ ބޮޑު ސުވާލަކީ ދެން ވާނީ ކިހިނެއް ހެއްޔެވެ؟ އެވަރުގެ މޮޅު ކޯޗަކު ލިބިދާނެ ހެއްޔެވެ؟ ނެދަލެންޑްސްއަށް އުފަން ސްލޮޓް އެކަން އެދަނީ ސާބިތުކޮށްދެމުންނެވެ. އޭނާގެ ކޯޗުކަމުގައި މިހާތަނަށް ލިވަޕޫލް ކުޅުނު 19 މެޗުގެ ތެރެއިން 17 މެޗުން މޮޅުވި އެވެ. އެއް މެޗު އެއްވަރުވި އިރު ބަލިވީ އެންމެ މެޗަކުންނެވެ.
މިހާރު ލިވަޕޫލް މިސްރާބު ހުރި ގޮތުން އެނގެނީ ސްލޮޓްއާ އެކު އާދަޔާ ހިލާފު ދަތުރަކަށް ފަށައިފި ކަމެވެ.
ކޮމެންޓް