އިންޓަ ކުރި އަތުލައިފި، ސިޓީއަށް ތިން ލަނޑުގެ ލީޑު ވެސް ދިފާއެއް ނުކުރެވުނު

އަމިއްލަ ދަނޑުގައި އިންޓަ މިލާނުން ޖަރުމަންގެ އާރުބީ ލައިޕްޒިގްގެ މައްޗަށް ހޯދި 1-0ގެ ހަނި ކާމިޔާބީއާ އެކު ޗެމްޕިއަންސް ލީގުގެ ތާވަލްގެ އެއް ވަނަ ރޭ އަތުލައިފި އެވެ.

އިނގިރޭސި ލީގުގެ ޗެމްޕިއަން މެންޗެސްޓަ ސިޓީއަށް އަމިއްލަ ދަނޑުގައި ލިބުނު ތިން ލަނޑުގެ ލީޑު ވެސް ނުހިފެހެއްޓި ނެދަލެންޑްސްގެ ފެޔެނޫޑްއާ އެކު ޖެހުނީ ޕޮއިންޓެއް ހިއްސާކުރާށެވެ.

ތަފާތު ފޯމެޓަކަށް މިހާރު ކުޅެމުން އަންނަ ޗެމްޕިއަންސް ލީގުގެ ފުރަތަމަ ފަސް މެޗު ނިމުނު އިރު އިންޓަ އެއްވަނާގައި އޮތީ 13 ޕޮއިންޓް ލިބިގެންނެވެ. ނަމަވެސް މި ކުރިއެރުން ހުއްޓުވުމުގެ ބާރު ލިވަޕޫލަށް އެބަ އޮތެވެ.

މިހާތަނަށް މި މުބާރާތުގެ ހުރިހާ މެޗެއް ކާމިޔާބުކުރަމުން އަންނަ ހަމައެކަނި ޓީމު ކަމަށްވާ ލިވަޕޫލްއަށް މިރޭ އަމިއްލަ ދަނޑުގައި ރެއާލް ބަލިކުރެވިއްޖެ ނަމަ 15 ޕޮއިންޓާ އެކު އަނެއްކާވެސް އެއްވަނަ ލިބޭނެ އެވެ.

އާލިން ހާލޭންޑްގެ ދެ ލަނޑާއި އިލްކޭ ގުންޑޯގަންގެ ލަނޑުން ސިޓީ ކުރި ހޯދީ 53 މިނިޓްގެ ތެރޭގަ އެވެ. ނަމަވެސް މެޗު ނިމެން 15 މިނިޓަށް ވެފައި ވަނިކޮށް ފެޔެނޫޑުން ތިން ލަނޑު ޖަހައި 3-3އިން އެއްވަރުކުރި އެވެ.

މިއީ ޖެހިޖެހިގެން ފަސް މެޗުން ބަލިވެފައި އޮތް ސިޓީއަށް ހަ ވަނަ މެޗަކުން ބަލިނުވެ ހިފަހައްޓާލުމެކެވެ. ނަމަވެސް ދުނިޔޭގެ އެންމެ މޮޅު ކްލަބްތަކުގެ ތެރޭގައި ހިމެނޭ ސިޓީއަށް ދެން ވެސް އޮތީ މައްސަލަތަކެއްކަން މެޗުން ހާމަވި އެވެ.

ރޭގެ ޕޮއިންޓާ އެކު ސިޓީ އޮތީ އަށް ޕޮއިންޓް ލިބިގެން ތާވަލްގެ 15 ވަނައިގަ އެވެ. މުބާރާތް ރޭވިފައި އޮތް ގޮތުން ތާވަލްގެ ފުރަތަމަ އަށް ޓީމު ގަދަ 16އަށް ކޮލިފައިވާނެ އެވެ. އޭގެ ފަހަތުން ފެށިގެން 24 ވަނައާ ހަމައަށް އޮންނަ ޓީމުތައް ކުޅެން ޖެހޭނީ ޕްލޭ އޮފް މެޗުތަކެވެ.