ސިޓީގެ ދަނޑުގައި ބޮޑު ތަފާތަކުން ބަލިވެ، މިވާ ގޮތެއް ނޭނގިފައި

ފުރަތަމަ ކަމަކަށް، ޕެޕް ގާޑިއޯލާގެ ކޯޗުކަމުގައި އޭނާއަށް މީގެ ކުރިން މި ހާލަތެއް ދިމައެއް ނުވެ އެވެ: ޖެހިޖެހިގެން ފަސް މެޗުން ބަލިވުމެވެ.

ރޭ އަމިއްލަ ދަނޑުގައި ޓޮޓެންހަމް އަތުން 4-0 އިން ބަލިވުމަކީ ސިޓީގެ އިއްތިހާދު ސްޓޭޑިއަމްގައި މިހާތަނަށް އެ ޓީމަށް ކުރިމަތިވި އެންމެ ތަފާތު ބޮޑު އެއް ދެރަ އެވެ.

މިއީ 2022ގެ ފަހުން އެ ދަނޑުގައި ބަލިނުވެ ސިޓީން ހަމަކުރި 35 މެޗުގެ ރެކޯޑް އަތުން ދޫވުމެވެ.

އެންމެ ފަހު ހަތަރު އަހަރުގެ ޕްރިމިއަ ލީގުގެ ޗެމްޕިއަންއަށް މިހާރު ކުރިމަތިވެފައި މި އޮތް ހާލަތާ މެދު އަދިވެސް ވިސްނާލަމާ ހެއްޔެވެ؟

ތާވަލްގެ ދެވަނާގައި އޮތް ނަމަވެސް ސިޓީއަށް މިހާރު މިދިމާވާ މައްސަލަތައް އެ ކްލަބާއި ގާޑިއޯލާގެ ތާރީހާ ވެސް ނުބައްދަލެވެ. އެހެންކަމުން 'މިވާ ގޮތެއް ނޭނގިފައި' ވެސް އެތައް ބަޔަކު އެބަ ތިއްބެވެ.

އެކަމަކު ގާޑިއޯލާގެ ވާހަކަ ތަފާތެވެ. އޭނާ ބުނީ ހީނުކުރާ ކަންކަން ވެސް ދިމާވާނެ ކަމަށެވެ.

"އަށް އަހަރުގެ ތެރޭގައި އަހަރެމެންނަށް މިކަހަލަ ކަމަކާ ކުރިމައްޗެއް ނުވޭ. އަހަންނަށް އެނގޭ ފަހުން ވިޔަސް މިހެން ވެއްޓިދާނެކަން،" ރޭގެ މެޗަށް ފަހު ގާޑިއޯލާ ބުންޏެވެ.

"އަހަރެން ހިއެއްނުކުރަން ލީގުގައި ޖެހިޖެހިގެން ތިން މެޗުން ބަލިވެދާނެއޭ. އެކަމަކު އަހަރެމެން ހުންނާނެ އެތައް ފަހަރަކު ކުޅުން ރަނގަޅުކޮށް ހަމަޔަކަށް ވެސް އަޅުވާފައި."

އޭނާ ބުނި ގޮތުގައި ހަގީގަތް ގަބޫލުކުރަން ވެސް ޖެހޭނެ އެވެ. އެހެންވެ މިހާރު މި އޮތް ހާލަތު ވެސް ޖެހޭނީ ގަބޫލުކުރަން ކަމަށް ވެސް ބުންޏެވެ.

"އަހަރެމެން ކުޑަކޮށް ރޫޅިފައި މި ތިބީ، އެއީ ޔަގީންކަމެއް،" ގާޑިއޯލާ ބުންޏެވެ.

"މައްސަލައަކީ އަހަރެމެންނަށް ލަނޑު ނުޖެހުން. އަނެއް ޓީމަށް ލިބޭ ފުރުސަތުގައި ލަނޑު ޖެހުން."

ލީގުގައި ސިޓީއަށް ދެން އޮތީ ބޮޑު ހިފުމެކެވެ. އަންނަ އާދިއްތަދުވަހުގެ ރޭ ލިވަޕޫލްގެ ދަނޑުގައި ލިވަޕޫލާ ދެކޮޅަށް ނުކުންނާނެ އެވެ. މިހާރު ލިވަޕޫލް އޮތީ ފަސް ޕޮއިންޓްގެ ތަފާތުން ކުރީގަ އެވެ. މިރޭ ސައުތެމްޓަން އަތުން މޮޅުވެއްޖެ ނަމަ އަށް ޕޮއިންޓަށް ފަރަގު ބޮޑުވާނެ އެވެ.