ޓެން ހޭގްއާ މެދު ޔުނައިޓެޑަށް ގޮތެއް ނުނިންމިފައި، ކްލަބް ހިމޭން

"އެރިކްއަކީ ރަނގަޅު މީހެއް. އެކަމަކު އޭނާއާ މެދު ގޮތް ނިންމާނީ އަހަންނެއް ނޫން، އެއީ މެންޗެސްޓަ ޔުނައިޓެޑް ހިންގާ މެނޭޖްމަންޓުން ނަގަން ޖެހޭ ފިޔަވަޅެއް."

މިއީ މެންޗެސްޓާ ޔުނައިޓެޑްގެ މައި އެއް ހިއްސާދާރު ޖިމް ރެޓްކްލިފްގެ ޖަވާބެވެ. މިދިއަ ހުކުރުދުވަހު ބީބީސީން އޭނާއާ ސުވާލުކުރީ ޓެން ހޭގްއާ މެދު އޭނާގެ އިތުބާރެއް އޮތްތޯ އެވެ. އެ ސުވާލަށް ރެޓްކްލިފް ސީދާ ޖަވާބެއް ނުދެއްވަ އެވެ.

ޔުނައިޓެޑްގެ ކުރީގެ ކާމިޔާބީގެ ރަން ޒަމާން އަނެއްކާވެސް ގެނައުމުގެ އުއްމީދުގައި ކްލަބަށް އިންވެސްޓްކުރައްވަން ފެއްޓެވި ވިޔަފާރިވެރިޔާ ރެޓްކްލިފް އާއި ކްލަބްގެ މެނޭޖްމަންޓަށް ވެސް އަދި އުޅެނީ ޓެން ހޭގްއާ މެދު ގޮތެއް ނިންމަން ނުކެރިގެންނެވެ.

މިދިއަ އަންގާރަދުވަހު ޔުނައިޓެޑްގެ މެނޭޖްމަންޓްގެ ބައްދަލުވުން އޮތެވެ. ހަ ގަޑިއިރަށް އެ ބައްދަލުވުން ކުރިއަށް ދިޔަ ނަމަވެސް ކޯޗާ މެދު ވަކި ގޮތެއް ނިންމުނު ކަމަކަށް މެނޭޖްމަންޓްގެ އެކަކު ވެސް މިހާތަަން ބުނެފައެއް ނުވެ އެވެ.

އެ މައްސަލާގައި ޔުނައިޓެޑް އޮތީ ހިމޭނުންނެވެ.

މިހާރު ކުރިއަށް ދާ ސީޒަންގެ ކުރިން ވެސް ޓެން ހޭގް ވަކިކޮށްފާނެ ކަމަށް ބެލެވުނެވެ. ނަމަވެސް މެންޗެސްޓަ ސިޓީ ބަލިކޮށް އެފްއޭ ކަޕް ކާމިޔާބުކުރުމާ އެކު އޭނާއަށް އިތުރު ފުރުސަތެއް ދިނީ އެވެ. މިހާރު އޮތް ގޮތުން ޓެން ހޭގްގެ އެއްބަސްވުމުގެ މުއްދަތު 2026އާ ހަމައަށް ދެމިގެންދެ އެވެ.

ނަމަވެސް ލީގުގެ ހަތް މެޗު ނިމުނު އިރު އެންމެ އަށް ޕޮއިންޓާ އެކު 14 ވަނާގައި ޔުނައިޓެޑް އޮތުމުން ސަޕޯޓަރުންގެ ހިތް ވެސް ވަނީ ހަލާކުވެފަ އެވެ. ޓޮޓެންހަމް އަތުން 3-0 އިން ބަލިވުމުން ވެސް ބެލެވުނީ ހަމަ ދެންމެ އޭނާ ވަކިކޮށްފާނެ ހެންނެވެ.

ތާވަލްގެ ގަދަ ފަހަކައަށް އަރަން ވެސް ހަ ޕޮއިންޓްގެ ތަފާތެއް ޔުނައިޓެޑްގެ އެބަ އޮތެވެ. އެއް ވަނާގައި އުޅޭ ލިވަޕޫލަށް ވުރެ 10 ޕޮއިންޓް ދަށެވެ. ޖެހުނު ލަނޑަށް ވުރެ ބައިކޮޅަށް ވަން ލަނޑުގެ އަދަދު އުޅެނީ ގިނަކޮށެވެ.

އެންމެ ފަހުން ޔުނައިޓެޑް ކުޅުނު ދެ މެޗު ވަނީ އެއްވަރުވެފަ އެވެ. ލީގުގައި އެސްޓަން ވިލާއާ ކުޅެ 0-0 އިންނެވެ. ޔޫރޮޕާ ލީގުގައި ޕޯޓޯއާ ވާދަކޮށް 3-3 އިންނެވެ.

މިހާރު މި އޮތީ ބައިނަލްއަގުވާމީ މެޗުތަކަށް ލީގު މެދުކަނޑާލައިފަ އެވެ. ކޯޗުކަމުން އޭނާ ވަކިނުކޮށްފި ނަމަ 19 އޮކްޓޯބަރުގައި ބްރެންޓްފޯޑްއާ ދެކޮޅަށް ޔުނައިޓެޑް ނުކުންނަ މެޗުގައި ވެސް ބެންޗުގައި އިރުޝާދު ދޭން އިންނާނީ ޓެން ހޭގް އެވެ.