ފްރާންސްގެ ވޯލްޑް ކަޕް ތަރި ގްރިޒްމަން ގައުމީ ޓީމަށް ކުޅުން ހުއްޓާލައިފި

ފްރާންސަށް 2018ގެ ވޯލްޑް ކަޕް ކާމިޔާބުކޮށްދިން ތަރި އަދި ފޯވަޑް އެންޓޮއިން ގްރިޒްމަން ގައުމީ ޓީމަށް ކުޅުން ހުއްޓާލިކަން މިއަދު އިއުލާންކޮށްފި އެވެ.

ސްޕެއިންގެ އެތުލެޓިކޯ މެޑްރިޑަށް ވެސް ކުޅެމުން އަންނަ ހުނަރުވެރި ކުޅުންތެރިޔާ ބައިނަލްއަގުވާމީ ފުޓްބޯޅައިން މި ވަކިވަނީ އުމުރުން 33 އަހަރުގަ އެވެ.

އޭނާ ވަނީ ފްރާންސަށް 137 މެޗު ކުޅެފަ އެވެ. ރަޝިޔާގައި 2018ގައި އޮތް ވޯލްޑް ކަޕް ކާމިޔާބުކުރުމުގެ އިތުރުން 2022ގައި ގަތަރުގައި އޮތް ވޯލްޑް ކަޕްގެ ފައިނަލަށް ދިޔަ ފްރާންސް ޓީމުގައި ވެސް އޭނާ ހިމެނުނެވެ.

"އަހަރެންގެ ހަޔާތުގެ މި ޗެޕްޓާ މި ނިންމާލަނީ ހަނދާންތަކުން ފުރިފައިވާ ހިތަކާ އެކުގަ އެވެ،" ސޯޝަލް މީޑިއާގައި ލިއަމުން އޭނާ ބުންޏެވެ.

ޔޫރަޕްގެ ނޭޝަންސް ލީގުގައި ފްރާންސް ހިމެނޭ ގްރޫޕްގެ ފުރަތަމަ މެޗުގައި އިޓަލީ އަތުން ފްރާންސް ވަނީ 3-1 އިން ބަލިވެފަ އެވެ. އެ މެޗުގެ ފުރަތަމަ 11ގައި އނާ ހިމެނުނެވެ. އެންމެ ފަހުން އޭނާ ފްރާންސަށް ކުޅުނީ އޭގެ ތިން ދުވަސް ފަހުން ބެލްޖިއަމް 2-0 އިން ބަލިކުރި މެޗުގަ އެވެ.