ޔުނައިޓެޑްގެ ހިތް ހަލާކުކޮށްލާފައި ސަލާހު ބުނީ މިއީ އެ ދަނޑުގައި އޭނާގެ ފަހު މެޗު ކަމަށް

ރޭ މެންޗެސްޓަ ޔުނައިޓެޑް ދަނޑުގައި އެ ކްލަބްގެ ސަޕޯޓަރުންގެ ހިތް ހަލާކުކޮށްލީ ލިވަޕޫލެވެ. އެ މަސައްކަތުގައި އިސްކޮށް ހުރީ ލިވަޕޫލްގެ މިސްރު ފޯވަޑް މުހައްމަދު ސަލާހް އެވެ.

ލިވަޕޫލް އަތުން 3-0 އިން ބަލިވި އިރު ސަލާހު ވަނީ ލަނޑެއް ޖަހައިފަ އެވެ. މިއީ ޔުނައިޓެޑްގެ ދަނޑު އޯލްޑް ޓްރެފޯޑްގައި އެ ޓީމުގެ ގޯލަށް އެންމެ ގިނައިން ލަނޑު ޖެހި ކުޅުންތެރިޔާ އެވެ. ރޭގެ ލަނޑާ އެކު ޖުމްލައަކީ 10 އެވެ.

ސަލާހު ބުނީ ރޭ އޭނާ ދަނޑަށް ނުކުތީ މިއީ އޯލްޑް ޓްރެފޯޑްގައި އޭނާ ކުޅޭނެ ފަހު މެޗު ކަމަށް ބަލައިގެން ކަމަށެވެ.

އުމުރުން 35 އަހަރުގެ ފޯވަޑް ލިވަޕޫލްއާ އެކު ހަދާފައި އޮތް އެއްބަސްވުން އަންނަ އަހަރު، ނުވަތަ މި ސީޒަނަށް ފަހު ހަމަވާނެ އެވެ. އާ ކޮންޓްރެކްޓްގެ އެއްވެސް ވާހަކައެއް އަދި ނެތެވެ. އެހެންކަމުން ރޭގެ މެޗަށް ފަހު ސަލާހު ބުނި ގޮތުގައި މިއީ ލިވަޕޫލްގައި ވެސް އޭނާ އެންމެ ފަހު ސީޒަނެވެ.

"މި މެޗަށް އައިއިރު އަހަރެން ބުނަމުން ދިޔައީ 'މިއީ ފަހު މެޗަށް ވެދާނެއޭ'"، މެޗަށް ފަހު ސްކައި ސްޕޯޓްސްއާ ވާހަކަ ދައްކަމުން ސަލާހު ބުންޏެވެ.

"ކްލަބްގެ އެއްވެސް މީހަކު ކޮންޓްރެކްޓާ ބެހޭ ގޮތުން އެއްވެސް ވާހަކައެއް ނުދައްކާ. އެހެންވެ ހިތަށްއަރަނީ މިއީ އަހަރެންގެ ފަހު ސީޒަންއޭ، ދެން ހިނގާށޭ ކަންކަން ވާނެ ގޮތް ބަލަން."

މިފަހަރުގެ ލީގުގައި ލިވަޕޫލް މިހާތަނަށް ކުޅުނު ތިން މެޗުގައި ވެސް ސަލާހު ވަނީ ލަނޑު ޖަހައިފަ އެވެ.

ލިވަޕޫލް އާއި އޭނާއާ ދެމެދު 2022ގައި ހެދި ތިން އަހަރުގެ އެބަސްވުމުގެ ދަށުން އޭނާއަށް ހަފުތާއަކު ގާތްގަނޑަކަށް 460،000 ޑޮލަރު (7 މިލިއަން ރުފިޔާ) ލިބެ އެވެ. މިއީ ލިވަޕޫލްގައި އެންމެ މަތީ މުސާރައެއް ލިބޭ ކުޅުންތެރިޔާ އެވެ.

މިދިއަ އަހަރު ސަލާހު ހޯދަން ސައުދީ ލީގުގެ އަލް އިއްތިހާދުން 196 މިލިއަން ޑޮލަރު (3 ބިލިއަން ރުފިޔާ) ލިވަޕޫލަށް ހުށައެޅި އެވެ. އެކަމަކު އިނގިރޭސި ކްލަބުން އޭނާ ދުލެއްނުކުރި އެވެ.