ކޮބާ ހީވޭ! އެމްބާޕޭ އެ އޮތީ ސުން ކަނޑުވާފައި

ޕީއެސްޖީގެ ކުރީގެ ތަރި ކީލިއަން އެމްބާޕޭ ސްޕެއިންގެ ރެއާލް މެޑްރިޑަށް ބަދަލުވެ ލީގުގައި ކުޅެން ފެށުމާ އެކު އޮތް ސުވާލަކީ އޭނާއަށް ލަނޑު ޖެހޭނީ ކިހާ ވަރަކަށް ހެއްޔެވެ؟ 

އެމްބާޕޭގެ ސަޕޯޓަރުންނާއި އޭނާ ލަނޑު ޖަހާ ތަން ބަލަން ބޭނުންނުވާ އިދިކޮޅު ސަޕޯޓަރުން ވެސް ތިބީ ލަލީގާގައި އެމްބާޕޭ ދައްކާނެ ކުޅުން ބަލާށެވެ.

ރެއާލްގެ ފުރަތަމަ ތިން މެޗު ނިމުނީ 25 އަހަރުގެ ފޯވަޑަށް ލަނޑެއް ނުޖެހި އެވެ. އެކަމަކު ރޭ ރެއާލް ބަޓިސް އަތުން 2-0 އިން ރެއާލް މެޑްރިޑް މޮޅުވީ ފަހު ހާފުގައި އޭނާ ޖެހި ދެ ލަނޑުންނެވެ. ފުރަތަމަ ލަނޑު ކުޅުމުގެ ތެރެއިން ލިބުނު ރީތި ބޯޅައެއްގައި ހަމަ އެހާ ރީތިކޮށް ޖަހަ އެވެ. ދެވަނަ ލަނޑު ޕެނެލްޓީއަކުންނެވެ.

އެމްބާޕޭގެ ފުރަތަމަ ލަނޑަކީ ލީގުގައި އެހާތަނަށް އޭނާ ފޮނުވާލި 25 ވަނަ ހަމަލާ އެވެ. އެ ހުރިހާ ހަމަލާތަކެއް ގޯލަށް ނުވަނަސް ޔޫރަޕްގެ ގަދަ ފަސް ލީގުގައި މިފަހަރު އަދި އެއްވެސް ކުޅުންތެރިޔަކަށް އެހާ ގިނަ އަދަދަކަށް ހަމަލާ ދެވިފައެއް ނުވެ އެވެ. އެހެންކަމުން ފްރާންސްގެ ކެޕްޓަންގެ ހުނަރު ލަލީގާގައި ވެސް ތަފާތުކަން އެނގެ އެވެ.

ރޭގެ މެޗުގައި އެމްބާޕޭ ފުރަތަމަ ލަނޑާ ހަމައަށް ދިޔަ އިރު އޭގެ ކުރިން އޭނާ ދިން ހަތް ހަމަލާ ވީ ނާކާމިޔާބެވެ.

އެންމެ ފަހުގެ ޗެމްޕިއަން ރެއާލް ހަތަރު މެޗު ހަމަކުރި އިރު ބައްޔަކާ ކުރިމަތިނުލިޔަސް ލިބިފައި އޮތް އަށް ޕޮއިންޓަކީ މިހާރު ތާވަލްގެ އެއްވަނާގައި އޮތް ބާސެލޯނާގެ 12 ޕޮއިންޓަށް ވުރެ މަދު އަދަދެކެެވެ.