ލައިބާ މި ގެނެސްދެނީ ބެޑްމިންޓަންގައި ރާއްޖެއަށް އުއްމީދުތަކެއް

ކުރީގެ ކުޅިވަރު މިނިސްޓަރު އަހުމަދު މަހްލޫފް އާއި އަނބިކަނބަލުން ނަޒްރާ ނަސީމް (ނަޒޫ)ގެ އެންމެ ބޮޑު ފޯކަސް ހަގީގަތުގައި މިހާރު އޮތީ ހުރި ހަމައެކަނި ދަރިފުޅު ލައިބާ އަހުމަދު މަހްލޫފްގެ ކުޅިވަރުގެ ހަޔާތަށެވެ. އޭގެ ނަތީޖާ ފެންނަނީ ވަރަށް ފޮނިކޮށްމެ އެވެ: އުމުރުން 11 އަހަރުގެ ލައިބާ ބެޑްމިންޓަންގައި ރާއްޖެއަށް ގެނެސްދެނީ އާ އުއްމީދެކެވެ.

އިއްޔެ ވެސް ލައިބާ ނިންމާލީ ކާމިޔާބު މުބާރާތެކެވެ. އާމީނިއާގައި އޮތް 'އާމީނިއަން ޔޫތު އޯޕަން 2024'ގައި 13 އަހަރުން ދަށުގެ އަންހެން ޑަބަލްސްއިން ރިހި މެޑެލް އަދި މިކްސްޑް ޑަބަލްސް އިން ލޯ މެޑެލް ހޯދި އެވެ.

އިއްޔެ އޮތް ޑަބަލްސް ފައިނަލްގައި ލައިބާ އާއި އޭނާގެ ބައިވެރިޔާ ސައިޕްރަސްގެ ކެތެރީނާ ބަލިވީ ބަލްގޭރިޔާގެ އެއްވަނަ ޕެއާ އަތުން 21-13، 21-12 އިންނެވެ.

މިކްސްޑް ޑަބަލްސްގައި ލައިބާގެ ބައިވެރިޔަކީ އާމީނިއާގެ ކުޅުންތެރިއެއް ކަމަށްވާ މާކް އެވެ.

ޔޫރަޕްގެ ޖޫނިއަ ކަލަންޑަރުގައި ހިމެނޭ މި މުބާރާތުގެ ސިންގަލްސް ބައިގެ ގަދަ 16އަށް ލައިބާ ދަތުރުކުރި އެވެ. އެ ބުރުގައި އޭނާ ބަލިވީ އެ އުމުރު ފުރައިން ބަލްގޭރިޔާގެ ތިން ވަނަ ކުޅުންތެރިޔާ މާރިއާއާ ވާދަކޮށް 2-1 ސެޓުންނެވެ. ސެޓްތައް ދިޔައީ 21-13 ،17-21، 21-12 އިންނެވެ.

ބެޑްމިންޓަނަށް އޮތް ލައިބާގެ ލޯބި ބޮޑުކަން އެނގުމާ އެކު އޭނާގެ ކުރިއެރުމަށް މަހްލޫފް އާއި ނަޒްރާ ގެންދަވަނީ ވަރަށް ބޮޑު ސަމާލުކަމެއް ދެއްވަމުންނެވެ. މަހުލޫފްއަކީ ކުރިން ކުޅިވަރުގެ ބޭފުޅަކަށް ވެފައި އަދި ފަހުން ކުޅިވަރުގެ މިނިސްޓަރުކަން ކުރެއްވުމުން، ޒުވާން ކުޅުންތެރިން އުފެއްދުމަކީ ކިހާ ބޮޑު މަސައްކަތެއްކަން އެނގިވަޑައިގަންނަވާ ކަމަށް، އޭނާއާ ކައިރި ބައެއް މީހުން ދެކެ އެވެ.

އެކްސްގައި ލައިބާ ލިއެފައިވާ ގޮތުގައި މި ހަފުތާގެ ބަންދުގައި ވަދަކުރާނީ ޕޮލެންޑްގައި އޮންނަ 'ޔޮނެކްސް ޕޮލިޝް އިންޓަނޭޝަނަލް ފެސްޓިވަލް'ގަ އެވެ.

ލައިބާއަކީ ރާއްޖޭގެ 12 އަހަރުން ދަށުގެ އެއްވަނަ އަންހެން ކުޅުންތެރިޔާ އެވެ. މިދިއަ އަހަރު ރާއްޖޭގައި އޮތް 11، 13 އަދި 17 އަހަރުން ދަށުގެ މުބާރާތްތަކުގައި އަންހެން ސިންގަލްސް އަދި ޑަބަލްސް ޗެމްޕިއަނުންނަކީ ވެސް ލައިބާ އެވެ.

ލައިބާ ވަނީ އޭނާގެ ކޯޗުން ކަމަށްވާ ޗަރިތު އާއި އަބިޝެކް އާއި އަބްދުލްގެ އިތުރުން ބެޑްމިންޓަން އެސޯސިއޭޝަންގެ ރައީސް މޫސާ ނާޝިދަށް ޝުކުރު އަދާކޮށްފަ އެވެ.

"އަހަރެންގެ ހުރިހާ ސްޕޮންސަރުން އަހަންނާ މެދު އޮތް އިތުބާރާއި ކުޅިވަރުގެ މި ދަތުރުގައި އެހީތެރިވާން ނިންމި ނިންމުމަށް ވަރަށް ބޮޑަށް ޝުކުރު ދަންނަވަމެވެ،" އެކްސްގައި ލައިބާގެ ޕޯސްޓް ނިންމާލަމުން ލިއުނެވެ.