މެސީ ބުނީ ބްރެޒިލްގެ ފުލުހުން އަމަލްކުރި ގޮތުން ހިތާމަވެރި ހާދިސާއެއް ހިނގުން ކައިރި ކަމަށް

މިއަދު ހެނދުނު ބްރެޒިލްގައި ކުޅުނު ވޯލްޑް ކަޕް ކޮލިފައިން މެޗުގެ ކުރިން އާޖެންޓީނާގެ ސަޕޯޓަރުންނާ މެދު ބްރެޒިލްގެ ފުލުހުން އަމަލްކުރި ގޮތުން ހިތާމަވެރި ހާދިސާއެއް ހިނގީސް ކަމަށް، އާޖެންޓީނާގެ ކެޕްޓަން ލިއޮނެލް މެސީ ބުނެފި އެވެ.

މަރަކާނާ ސްޓޭޑިއަމްގައި ކުޅުނު މި މެޗުން 1-0 އިން އާޖެންޓީނާ މޮޅުވެ، ސައުތު އެމެރިކާ ގްރޫޕްގައި އާޖެންޓީނާ އޮތީ 15 ޕޮއިންޓާ އެކު އެއް ވަނައިގަ އެވެ. ހަ މެޗު ކުޅުނު އިރު ބްރެޒިލް އޮތީ އެންމެ ހަތް ޕޮއިންޓް ލިބިގެން ހަ ވަނައިގަ އެވެ.

އެކަމަކު މި ވާދަވެރި، ހޫނުވި މެޗުގެ ކުރިން މެސީ އާއި އާޖެންޓީނާގެ ކުޅުންތެރިން ދަނޑުގައި އަޖެންޓީނާގެ ސަޕޯޓަރުން ތިބި ހިސާބަށް ދާން ޖެހުނެވެ. އެ މީހުން މަސައްކަތްކުރީ ސަޕޯޓަރުން ހަމަޔަކަށް އެޅުވޭތޯ އެވެ.

"އަހަރެމެންނަށް ފެނުނު ފުލުހުން މީހުންގެ ގައިގައި ތެޅިތަން، އެއީ ވަރަށް ދެރަ ކަމެއް،" މެސީ ބުންޏެވެ.

އެންމެ ފަހުން އާޖެންޓީނާގެ ޓީމު ގޮސް ވަނީ ޗޭންޖިން ރޫމަށެވެ. މެޗު ފެށޭ ގޮތްވީ 30 މިނިޓް ފަހުންނެވެ. އޭރު ފުލުހުން ވަނީ އާޖެންޓީނާގެ ސަޕޯޓަރުން ވަކި ހިސާބެއްގައި ބައިތިއްބައިފަ އެވެ.

ހަމަނުޖެހުން ފުރަތަމަ ފެށުނީ ގައުމީ ސަލާމް ކިޔަމުން ދިޔައިރު ދެ ޓީމުގެ ސަޕޯޓަރުންގެ މެދުގަ އެވެ. އެކަން ހުއްޓުވަން ފުލުހުން އާޖެންޓީނާގެ ސަޕޯޓަރުންނާ ދެކޮޅަށް ބާރުގެ ބޭނުންކުރުމުން، ބައެއް ސަޕޯޓަރުން ވަނީ ގޮނޑިތައް ނައްޓާފައި ފުލުހުންނާ ދިމާއަށް އުކައިފަ އެވެ.

މެސީ ބުނީ ކުޅުންތެރިން ދަނޑު ދޫކޮށް ދިޔައީ، ހިތާމަވެރި ހާދިސާއެއް ހިނގުމަށް ވުރެ މެޗު ނުކުޅުން ވެސް ރަނގަޅު ކަމަކަށް ވާނެތީ ކަމަށެވެ.

މިއީ ވޯލްޑް ކަޕް ކޮލިފައިން މެޗެއްގައި އަމިއްލަ ދަނޑުގައި ބްރެޒިލް ބަލިވި ފުރަތަމަ ފަހަރެވެ. މެޗުގެ ހަމައެކަނި ލަނޑު ޖެހީ 63 ވަނަ މިނިޓްގައި ނިކޮލަސް އޮޓަމެންޑީ އެވެ.