ކޮމަންވެލްތު ގޭމްސްގެ ދުވަސް ހިނގައްޖެ، ބާއްވާނެ ގައުމެއް ނެތް

ކޮމަންވެލްތު ގޭމްސް ބާއްވަން އޮސްޓްރޭލިޔާގެ ވިކްޓޯރިއާ ސްޓޭޓުން ނިންނި ނިންމުން އަނބުރާ ގެންދިއުމުން އެ ގޭމްސްގެ ކުރިމަގާ މެދު ސުވާލު އުފެދި، އޭގެ ދުވަސް ހިނގައްޖެ ކަމަށް، ބައެއް ތަޖުރިބާކާރުން ބުނަން ފަށައިފި އެވެ.

ވިކްޓޯރިއާ ސްޓޭޓްގެ ވެރިޔާ ޑެނިއެލް އެންޑްރޫސް އިއްޔެ ވިދާޅުވީ 2026ގެ ގޭމްސް ބާއްވަން އެއްބަސްވީ ވެސް، ވަކި ހައްދެއްގެ ތެރޭގައި ހަރަދު ހުންނަން ޖެހޭނެ ކަމަށް ކަމަށެވެ. އޭރު ބެލި ގޮތުން ހޭދަވާނީ 1.8 ބިލިއަން ޑޮލަރެވެ. ނަމަވެސް މިހާރު ލަފާކުރަނީ 12 ދުވަހަށް ދެމިގެންދާ ކޮމަންވެލްތު ގޭމްސްއަށް 4 ބިލިއަން ޑޮލަރު ހޭދަވާނެ ކަމަށެވެ.

މިހާ ބޮޑު ހޭދައެއް ކޮށްގެން ބާއްވަން ކޮމަންވެލްތު ގޭމްސް އެކަށީގެންނުވާ ކަމަށް، އެންޑްރޫސް ގަބޫލުކުރައްވަ އެވެ. އެހެންކަމުން ގޭމްސް ނުބާއްވަން ނިންމުމަކީ އުނދަގޫ ނިންމުމެއް ނޫން ކަމަށް ވެސް އޭނާ ވިދާޅުވި އެވެ. 

އޮސްޓްރޭލިޔާއަކީ ކުޅިވަރުގެ ގައުމެކެވެ. ކޮމަންވެލްތު ގޭމްސްގައި ވެސް ވަރަށް މުހިންމު ގައުމެކެވެ. މީގެ ކުރިން އެތައް ފަހަރަކު އެ ގޭމްސް ބާއްވައިފި އެވެ. ނަމަވެސް ގޭމްސްއަށް ކުރަން ޖެހޭ ހަރަދު ބޮޑުވެފައި އޭގެ ސަބަބުން އިގުތިސާދީ ފައިދާތަކެއް ނުފެނުމުން، ކޮމަންވެލްތު ގޭމްސް މިހާރު މި އޮތީ މައްސަލަގަނޑެއްގެ ތެރެއަށް ވެއްޓިފަ އެވެ.

އެއް އިރެއްގައި އޮލިމްޕިކްސް ނަގާފައި ދުނިޔޭގެ އެންމެ ބޮޑު އެއް ގޭމްސްގެ ގޮތުގައި ބެލުނު ކޮމަންވެލްތު ގޭމްސްގެ މުހިންމުކަން މި ފަހުގެ އަހަރުތަކުގައި ވަނީ ކުޑަވެފަ އެވެ. އިނގިރޭސިންގެ ދަށުގައި ކުރިން އޮތް ގައުމުތަކުގެ މޮޅެތި އެތުލީޓުން މި ފަހުގެ ގޭމްސްތަކުގައި ބައިވެރިވެފައެއް ވެސް ނުވެ އެވެ. 

އޮސްޓްރޭލިއާގެ އެހެން ސްޓޭޓަކުން ވެސް 2026ގެ ގޭމްސް ބާއްވަފާނެ ކަމަކަށް ނުބެލެވެ އެވެ.

މިދިއަ 20 އަހަރުގެ ތެރޭގައި އިނގިރޭސި ވިލާތާއި އޮސްޓްރޭލިޔާގެ ބޭރުގައި ކޮމަންވެލްތު ގޭމްސް ބޭއްވީ 2010ގައި އިންޑިއާގައި އެކަންޏެވެ. އިންޑިއާއިން އޭރު ލަފާކުރީ 270 މިލިއަން ޑޮލަރުން ގޭމްސް ބޭއްވޭނެ ކަމަށެވެ. ނަމަވެސް ނިމުނި އެ ހޭދަ 4.1 ބިލިއަން ޑޮލަރަށް އަރައިފަ އެވެ.

ޔުނިވަސިޓީ އޮފް ސިޑްނީގައި ކުޅިވަރުގެ މާއްދާގެ ލެކްޗަރާއެއް ކަމަށްވާ ސްޓީވް ޖޯގާކިސް ވިދާޅުވީ ކޮމަންވެލްތުގައި ހިމެނޭ އެންމެ މުއްސަނދި އެއް ގައުމަށް އޮސްޓްރޭލިޔާ ވެފައި އެ ގައުމަށް ކޮމަންވެލްތު ގޭމްސް ނުބޭއްވޭ ނަމަ، ގޭމްސް އެ އޮތީ ސުވާލު މާކެއްގެ ތެރޭގައި ކަމަށެވެ.

"މިއީ ކޮމަންވެލްތު ގޭމްސްގެ ނިމުމަށް ވެދާނެ،" ޖޯގާކިސް ވިދާޅުވި އެވެ.

އެކަމަކު ކޮމަންވެލްތު ގޭމްސް ފެޑެރޭޝަން (ސީޖީއެފް) އިން ބުނީ ގޭމްސްއަށް ހަރަދުވާނެ ކަމަށް ވިކްޓޯރިއާ ސްޓޭޓުން އެ ބުނާ އަދަދު މާ ބޮޑު ކަމަށެވެ. އަދި ކޮމަންވެލްތު ގޭމްސް އޮސްޓްރޭލިޔާ (ސީޖީއޭ) އިން ބުނި ގޮތުގައި މުބާރާތް ބޭއްވޭނެ އެހެން ގޮތެއް އޮތްތޯ އަދިވެސް އަންނަނީ ބަލަމުންނެވެ.

"މިއީ އޮސްޓްރޭލިޔާގެ އެތުލީޓުންނާއި މުޅި ކޮމަންވެލްތު ސްޕޯޓްސްގެ ހަރަކާތްތެރިންގެ ހައްގުގައި ކުރަން ޖެހޭ ކަމެއް' ކަމަށް، ސީޖީއޭއިން ދެކެ އެވެ.

އެކަމަކު ކުޅިވަރުގެ ތަޖުރިބާކާރުން ލފާކުރާ ގޮތުގައި ކޮމަންވެލްތު ގޭމްސް މިހާރު އެ އޮތީ މަރުގެ ތުންފަތްމަތީގަ އެވެ.