ގްރިޒްމަން ފަހު ބައިގަޑިއިރު ކުޅެން އަރުވަނީ ކީއްވެ؟

އެތުލެޓިކޯ މެޑްރިޑްގެ އެންމެ މުހިންމު އެއް ކުޅުންތެރިޔާ ފްރާންސްގެ އެންޓޮއިން ގްރިޒްމަން، ފަހު ހާފުގެ ފަހު ބައި ގަޑިއިރު ކުޅެން އަަރުވާތީ އެތައް ބައެއްގެ ހިތުގައި ވަނީ ސުވާލު އުފެދިފަ އެވެ.

އެތުލެޓިކޯގެ ކޯޗު ޑިއޭގޯ ސިމިއޯނީގެ އެ ނިންމުން ގުޅިފައި އޮތީ ބާސެލޯނާ އާއި އެތުލެޓިކޯއާ ދެމެދު މިދިއަ އަހަރު ހެދި އެގްރިމެންޓާ އެވެ. ބާސެލޯނާ އިން 129 މިލިއަން ޑޮލަރު (1.9 ބިލިއަން ރުފިޔާ) އަށް ޖުލައި 2019 ގައި ގެންދިޔަ ކުޅުންތެރިޔާ އެތުލެޓިކޯއަށް މިދިއަ އަހަރު ދޫކުރީ ލޯނު އެއްބަސްވުމެއްގެ ދަށުންނެވެ.

އެ އެއްބަސްވުން ބުނާ ގޮތުން ގްރިޒްމަން ހިމެނޭ މެޗުތަކުގެ %50 މެޗުތަކުގައި 45 މިނިޓަށް ވުރެ ގިނައިން ކުޅުވައިފި ނަމަ ދާއިމީ ކުޅުންތެރިއަކަށް ހަދަން އެތުލެޓިކޯ އިން އޭނާ 39 މިލިއަން ޑޮލަރު (600 މިލިއަން ރުފިޔާ)އަށް ގަންނަން ޖެހޭނެ އެވެ.

ބާސެލޯނާއާ އެކު ގްރިޒްމަން ހެދި ފަސް އަހަރުގެ އެގްރިމެންޓް ހަމަވާނީ 2024ގަ އެވެ. މިދިއަ އަހަރު މާލީ ބޮޑު މައްސަލަގަނޑެއް ކުރިމަތިވި ބާސެލޯނާ އިން ގްރިޒްމަންގެ 38 މިލިއަން ޑޮލަރު (585 މިލިއަން ރުފިޔާ)ގެ އަހަރީ މުސާރައިން ސަލާމަތްވާން، އެތުލެޓިކޯއަށް ލޯނު އުސޫލުން މިދިއަ އަހަރު ދޫކުރީ ދެ އަހަރުގެ މުއްދަތަކަށެވެ.

ލޯނުގެ ދަށުން ކުޅުންތެރިން ދޫކުރާ އިރު އެ ކުޅުންތެރިޔާ ލައްވާ ކުރެވޭނެ ކަންކަން، ބައެއް ފަހަރަށް، ހުންނަނީ ހަނިކޮށްފަ އެވެ. ގްރިޒްމަންއަށް ދިމާވެގެން އުޅެނީ އެކަހަލަ މައްސަލައެކެވެ.

ބާސެލޯނާއަށް ބޮޑު ފީއެއް ނުދައްކާ ގްރިޒްމަން ލައްވާ ކުޅުވެން އޮތް ވަގުތުގެ %81 ޕަސެންޓް މިދިއަ އަހަރު އެތުލެޓިކޯއިން ބޭނުންކުރި އެވެ. މި އަހަރު އެގޮތަށް ކުޅުވައިފި ނަމަ ބާސެލޯނާއަށް 39 މިލިއަން ޑޮލަރު ދައްކައި، ގްރިޒްމަން ދާއިމީ ކުރަން ޖެހޭނެ އެވެ.

އެކަމަކު އެތުލެޓިކޯއަށް އެކަން އެނގެ އެވެ. އެހެންކަމުން މި ސީޒަންގެ ފުރަތަމަ ހަތް މެޗުގައި ގްރިޒްމަން ދަނޑަށް އެރުވީ 62 ،62 ،64 ،63 ،61 ،63، 62 ވަނަ މިނިޓްގަ އެވެ.

"ހަގީގަތަކީ 30 މިނިޓްގައި އޭނާ ވަރަށް މޮޅަށް ކުޅޭކަން. އަހަރެމެންނަކަށް ނޭނގޭ 60 މިނިޓް ކުޅެފި ނަމަ އޭނާ ހަދާނީ ކިހިނެއް ކަމެއް،" ޗެމްޕިއަންސް ލީގު ގްރޫޕް ސްޓޭޖް މެޗުގައި ޕޯޓޯ 2-1 އިން ބަލިކުރުމަށް ފަހު ސިމިއޯނީ ބުންޏެވެ.

ގްރިޒްމަން ކަހަލަ މޮޅު ކުޅުންތެރިޔަކު ފަހު 30 މިނިޓްގައި އަރުވަނީ ކީއްވެތޯ ސުވާލުކުރުމުން އޭނާ ބުނީ "އަހަންނަކީ ކްލަބް މީހެއް" ކަމަށާއި 'އަބަދުވެސް ހުންނާނީ އެގޮތަށް" ކަމަށެވެ.

އެތުލެޓިކޯގެ ދާއިމީ ކުޅުންތެރިޔަކަށް ގްރިޒްމަން ހަދަން މަޖުބޫރުވާ ކަހަލަ ހާލަތަކަށް ނުވެއްޓެންވެގެން މެޗުތަކަށް ގްރިޒްމަން އަރުވާ ވަގުތާ މެދު ބާސެލޯނާ ކަންބޮޑުވެ އެވެ. އަދި ގާނޫނީ ފިޔަވަޅު އަޅަން ވިސްނާކަމުގެ ހަބަރުތައް ވެސް ފެތުރުނެވެ.

އެކަމަކު އެތުލެޓިކޯއަށް ޔަގީންވާ ކަމަކީ ގްރިޒްމަން ފަހު 30 މިނިޓްގައި އަރުވަނީ އެގްރިމެންޓްގެ ވަކި މާއްދާއަކުން ސަލާމަތްވާންކަން ބާސެލޯނާއަށް ސާބިތުނުކޮށްދެވޭނެ ކަމެވެ. ސަބަބަކީ މެޗެއްގައި ކުޅުންތެރިޔާ ބޭނުންކުރާނެ ގޮތް ނިންމާނީ މެނޭޖަރު ކަމަށް ވާތީ އެވެ.

މީޑިއާ ރިޕޯޓްތައް ބުނާ ގޮތުގައި ލޯން މުއްދަތުގައި ގްރިޒްމަންގެ ފުރިހަަމަ ބޭނުންކުރާ ނަމަ މިހާރު ބާސެލޯނާއަށް ދައްކަން ޖެހޭ 39 މިލިއަން ޑޮލަރު 25 މިލިއަން ޑޮލަރަށް ކުޑަކުރުމުގެ ވާހަކަ ދެ ކްލަބުން އަންނަނީ ދައްކަމުންނެވެ. އެކަމަކު އެއިން އެއްވެސް ކަމަކަށް އަމަލީ ސިފައެއް އަދި ނާދެ އެވެ.

އެހެންކަމުން ގްރިޒްމަން ގިނަ މެޗުތަކުގައި ދެން ވެސް ފެންނާނީ ފަހު ބައިގަޑިއިރު އެވެ.