ފަސް މެޗަށް ފަހު ފްރާންސްއަށް އަލުން މޮޅެއް

ދުނިޔޭގެ ޗެމްޕިއަން ފްރާންސް މޮޅުނުވެ ފަސް މެޗު ކުޅުމަށް ފަހު ރޭ ފިންލެންޑް އަތުން2-0 އިން މޮޅުވެ، ވޯލްޑް ކަޕް ކޮލިފައިންގައި ގްރޫޕްގެ އެއް ވަނާގައި ހަމަޖެހިލައިފި އެވެ.

ފޯވަޑް އެންޓޮއިން ގްރީޒްމަން ދެ ހާފުގައި ޖެހި ދެ ލަނޑުން ފްރާންސް މި މޮޅުވީ ކޮލިފައިންގައި އެންމެ ފަހުން ކުޅުނު ދެ މެޗުގައި ބޮސްނިއާ އާއި ޔުކްރެއިންއާ އެއްވަރުވެފައި އޮއްވަ އެވެ. އެ ދެ މެޗުގައި ވެސް އެއްވަރުކުރެވުނީ ފަހަތުން އަރަ އެވެ.

ގްރޫޕް ޑީގައި ފްރާންސް އެއް ވަނާގައި އޮތީ 12 ޕޮއިންޓާ އެކު އެވެ. މިއީ ވަނާގައި އޮތް ޔުކްރެއިންއަށް ވުރެ ހަ ޕޮއިންޓްގެ ތަފާތެކެވެ.

ގްރީޒްމަންގެ ދެ ލަނޑު މި އައީ ޓްރާންސްފާ މުއްދަތުގެ އެންމެ ފަހު ގަޑީގައި ބާސެލޯނާ ދޫކޮށް އޭނާގެ ކުރީގެ ކްލަބް އެތުލެޓިކޯ މެޑްރިޑަށް ބަދަލުވެ، އަދި ކްލަބަށް އެއްވެސް މެޗެއް ނުކުޅެ އުޅެނިކޮށެވެ. އޭނާ ވަނީ އެންމެ ފަހު ތިން މެޗުގައި ތިން ލަނޑު، ފްރާންސަށް ކާމިޔާބުކޮށްދީފަ އެވެ.