ގާނޫނުއަސާސީ އިސްލާހުކުރުމާ ދެކޮޅަށް އެމްޑީޕީ މެމްބަރުން މަޖިލިސް ތެރޭގައި އަޑުއުފުލަނީ: ޕީއެންސީގެ ސުޕަ މެޖޯރިޓީން ހުރިހާ ކަމެއް ވަނީ އަވަހަށް ނިންމާލާފައި
ކޮބާ، މެމްބަރުން މިނިވަންވީނު. ދެން ހުވަޔާ އެއްގޮތަށް އުޅެމާ!
ބައެއް ފަހަރަށް ތިމާ ގަބޫލުކުރާ ގޮތާ ހިލާފަށް ގައުމުގެ ކަންކަން ނިންމުމުން ވެސް މާޔޫސްނުވެ އޭގެ އަނެއް ކޮޅަށް ވިސްނާލަން ޖެހޭނެ އެވެ. ގާނޫނުއަސާސީ ލިއުނު އިރު ރައްޔިތުންގެ މަޖިލިހުގެ މެމްބަރުންނަށް ލިބުނު މިނިވަންކަން އިއްޔެ 'ނިގުޅައިގަތް' ބަދަލާ މެދު ވެސް އެހެން ވިސްނުމެއްގެ ތެރެއިން ބަލައިލަމާ ހެއްޔެވެ؟
މިހާރު މި ވީ ގޮތުން ރައްޔިތުންގެ މަޖިލިހުގެ މެމްބަރުން ކުރިއަށް ވުރެ ބޮޑަށް 'މިނިވަންވީ' ކަމަށް ގަބޫލުކޮށް އެ މެމްބަރުންނަށް ބައެއް ނަސޭހަތްތައް ވެސް ދިވެހިންނަށް ދެވިދާނެ އެވެ. މެމްބަރުން ވެސް ދެން އަވަހަށް އުޅެގަންނަންވީ ރައްޔިތުންގެ މަޖިލިހުގެ ހުވަޔާ އެއްގޮތަށް މަސައްކަތްކުރައްވާށެވެ. ވެރިކަން ހިންގާ ޕާޓީ ޕީއެންސީގެ މެމްބަރުންގެ ބޮލުގައި މިހާރު އެޅިފައި އޮތް ޒިންމާ އަދި މާ ބޮޑެވެ. ސަބަބަކީ ރައީސުލްޖުމްހޫރިއްޔާއަކީ އެ ޕާޓީގެ އެންމެ އިސް ވެރިޔާއަށް ވެފައި، ރައީސްގެ ނުފޫޒު، އިދިކޮޅު ޕާޓީގެ ލީޑަރުންނަށް ވުރެ، މެމްބަރުންގެ މައްޗަށް ހުރިހާ ގޮތަކުން ވެސް ގަދަވާނެ އެވެ. އެެހެންކަމުން އެ މެމްބަރުން މިއަދު އެންމެ އަވަހަށް ކުރައްވަން ޖެހޭ ބައެއް ކަންކަން ފާހަގަކޮށްލާނަމެވެ.
ރައީސް މުހައްމަދު މުއިއްޒަށް ދަންނަވަން ޖެހޭ ވާހަކަތައް:
-
އަޅުގަނޑުމެން ދެން ހުރިހާ ކަމެއް ވެސް ކުރާނީ ރައްޔިތުންގެ މަޖިލިހުގެ މެމްބަރުން ކުރި ހިވަޔާ އެއްގޮތަށެވެ. ސަރުކާރުން ވަކި ކަމެއް ކުރަން ބުނީތީ ދެން ނުކުރާ ނަމެވެ. އަޅުގަނޑުމެން ބަލާނީ ގާނޫނުއަސާސީ ދަމަހައްޓައި، ގައުމަށް ތެދުވެރިވެ، ރައްޔިތުންގެ ހައްގުތައް ހިމާޔަތްކުރާށެވެ. އެހެންވީމާ މީގެ ފަހުން، މިއިން ކަމަކުން އަޅުގަނޑުމެން ދުރުވެވޭ ކަހަލަ އެއްވެސް ކަމެއް ކުރަން މަނިކުފާނު އަންގަވައިގެން ނުވާނެ އެވެ.
-
އަޅުގަނޑުމެންނަށް ލިބޭ މުސާރައިގެ އިތުރުން މާލީ އެއްވެސް އެހީތެރިކަމެއް މަނިކުފާނުގެ ފަރާތްޕުޅުން ބޭނުމެއް ނޫނެވެ. އަޅުގަނޑުމެން މީގެ ކުރިން ގަބޫލުކުރި ފައިސާއެއް ވިއްޔާ ގަބޫލުކުރީ މިނިވަންކަމާ އެކު މަސައްކަތްނުކުރެވޭތީ އޭގެ އަގަކަށެވެ. ދެން މިހާރު އަޅުގަނޑުމެން ބަލާނީ ކޮމިޓީތަކަށް ވެސް ބަރާބަރަށް ހާޒިރުވެ، އެ ލިބޭ 20،000ރ ގެ އެލަވަންސާ އެކު މެމްބަރަކަށް ލިބޭ އެންމެ މަތީ އާމްދަނީ ހޯދާށެވެ. އަޅުގަނޑުމެންނަށް ނުފުދުނަސް ދެން އުޅޭނީ ހައްގު މުސާރައިން ލިބޭ އެއްޗަކުންނެވެ.
-
ރާއްޖޭގެ މިނިވަން މުއައްސަސާތަކުގެ މެމްބަރުން ވަކިކުރަން މިހާރު އޮތް މައްސަލައާ މެދު ވެސް ވަރަށް ފުންކޮށް ވިސްނާނަމެވެ. އެމީހުން ވަކިކުރަން އުޅެނީ ސީދާ ކޮން ކަމެއް ގޯސްކޮށް ކޮށްގެންކަން އަދި އަޅުގަނޑުމެންނަކަށް މުޅިން ސާފެއް ނޫނެވެ. އެހެންވެ ކޮންމެ މެމްބަރެއްގެ މައްސަލަ ވަކިވަކިން ބަލައި، އެ މީހުންނާ ސުވާލުކޮށް، އޭގައި މެމްބަރުކަމުން ވަކިކުރެވޭވަރުގެ ގޯހެއް ހަދާފައި އޮތްތޯ ކަށަވަރުކޮށްފައި ނޫނީ އަޅުގަނޑުމެންނަށް ވޯޓެއް ނުދެވޭނެ އެވެ. މިނިވަން މުއައްސަސާތައް ހަރުދަނާކުރުމަކީ އަޅުގަނޑުމެން ރައްޔިތުންގެ މަޖިލިހުގެ ވެސް ޒިންމާއެކެވެ. އެހެންވީމާ އަޅުގަނޑުމެން އެކަން ދެން ކުރާނީ އެ ޒިންމާ މީގެ ކުރިން އެއްވެސް މަޖިލިހަކުން ނަގާފައި ނުވާހާ ރަނގަޅަށެވެ.
-
ސަރުކާރު ތެރޭގައި ހުރި ހިޔާނާތަށް ޝައްކުކުރެވޭ ކަންކަން ނުބަލައި، އެއަށް ޒިންމާދާރުނުކޮށް ދުލެއް ނުކުރާ ނަމެވެ. މިހާރު ނުނެރެވިގެން އުޅޭ ފްލެޓް ލިސްޓަށް އަޅުގަނޑުމެން ބޭނުންވާ މީހުން އިތުރުކުރާކަށް ވެސް ދެނެއް މަސައްކަތެއް ނުުކުރާނަމެވެ.
-
ސަރުކާރުގެ މަޝްރޫއުތައް އަޑިއަޑިން ހޯދައި، އޭގެން ނާޖާއިޒު ފައިދާ ނަގަން ކުންފުނިތަކުގެ ވެރިން ކައިރިއަށް ދުވިދުވުން ވެސް ދެން މި ހުއްޓާލީ އެވެ. ދެން އޮންނާނީ މަޝްރޫއުތައް ދެނީ އިންސާފުވެރިކަމާ އެކު، ރަނގަޅު އުސޫލުގެ ތެރެއިންތޯ ބެލުމެވެ.
-
ރިޔާސީ އިންތިހާބުގެ ދެވަނަ ބުރު އުވާލުމަކީ އެއްގޮތަކަށް ވެސް ރަނގަޅު ކަމެއް ނޫނެވެ. ފަސް އަހަރުން އެއްފަހަރު އޮންނަ އެވަރުގެ ބޮޑު އިންތިހާބަކަށް 100 މިލިއަން ރުފިޔާ ހަރަދުކުރަން ޖެހުނަސް އެއީ ބޮޑު އެއްޗަކަށް ވެގެން އަޅުގަނޑުމެން ނޫޅޭނަމެވެ. ރައީސްގެ މަގާމަށް %50އަށް ވުރެ މަދުން ވޯޓު ލިބިގެން ކެންޑިޑޭޓަކު ހޮވުމަކީ ގަބޫލުކުރެވޭނެ ހަމައެއް ކަމަށް ވިސްނައިނުދެއްވުން އެދެމެވެ. އެެހެންކަމުން އެ ބަދަލު ގެންނަވަން މަނިކުފާނު އަޅުގަނޑުމެންނަށް މަޖުބޫރުނުކުރާނެ ކަމަށް ހީކުރަމެވެ. މަޖުބޫރުކުރެއްވިޔަސް އަޅުގަނޑުމެން އެގޮތަކަށް އަމަލެއް ނުކުރާނަމެވެ.
-
އަޅުގަނޑުމެން މެމްބަރުން ސަރުކާރާ ހިޔާލު ތަފާތުވެ ނުވަތަ ބައެއް ކަންކަން ކުރަން ދެކޮޅުހެދުމުން ޕާޓީން ވަކިކުރަން އުޅޭ ނަމަ ހުރިހާ މެމްބަރުން އެއްފަހަރާ އިސްތިއުފާ ދޭން މިތިބީ ނިންމައިގެންނެވެ.
ރައްޔިތުން ކައިރީގައި ބުނަން ޖެހޭ ވާހަކަތައް:
-
ކަލޭމެން އެއްވެސް މީހަކަށް މާލީ ގޮތުން އެހީތެރިކަމެއް ދެން ނުދެވޭނެ އެވެ. އަޅުގަނޑުމެން މިހާރު މި އުޅެނީ ނާޖާއިޒު ގޮތަށް އެއްވެސް އެއްޗެއް ނުހޯދައި، ލިބޭ މުސާރައިން ދިރިއުޅޭށެވެ. އެހެންވީމާ ރައްޔިތުން ވެސް އެކަމަށް ޖާގަ ދޭން ޖެހޭނެ އެވެ. ރައްޔިތުންގެ ހައްގުގައި އަޅުގަނޑުމެން މަޖިލިސް ތެރެއިން ހުރިހާ ކަމެއް ހަމަޖައްސައިދޭން މަސައްކަތްކުރާ ނަމެވެ.
-
ދާއިރާއަށް ބޭނުންވާ ތަރައްގީގެ މަޝްރޫއުތަކަށް އަޅުގަނޑުމެން އަޑުއުފުލައި ސަރުކާރާ ވާހަކަ ދައްކައިގެން ހަމަޖެއްސޭތޯ އުޅޭނަމެވެ.
-
މާތްﷲ ގަންދީ ކޮށްފައި އޮތް ހުވަޔަކީ ކުޑަ އެއްޗެއް ނޫނެވެ. އެއަށް ޖަވާބުދާރީވާން ޖެހޭނީ ވެސް އަޅުގަނޑުމެންނަށެވެ. މެމްބަރެއްގެ ފުރިހަމަ ޒިންމާ އުފުލަން މީގެ ކުރިން ހުރި ދަތިތަކާ ހެދި ހުވަޔާ އެއްގޮތަށް އުޅެވިފައެއް ނުވެ އެވެ. އެކަމަށް އަޅުގަނޑުމެން އެއްބަސްވަމެވެ. އެކަމަކު މިހާރު އަޒުމް ކަނޑައަޅައިގެން މިތިބީ އެ ހުވާގެ މަތީގައި ދެމިތިބޭށެވެ. މިކަން ކުރެވޭނީ ދާއިރާގެ ރައްޔިތުންގެ ވެސް ވިސްނުން ބަދަލުކޮށްގެންނެވެ. އެއީ މެމްބަރަކީ ކަލޭމެންގެ ހުރިހާ ކަމެއް ހަމަޖައްސައިދޭން ޖެހޭ މީހެއް ނޫންކަމަށް ގަބޫލުކުރުމެވެ.
ގާނޫނުއަސާސީއަށް ގެނައި އިސްލާހާ އެކު މެމްބަރުންނަށް ޕާޓީ ބަދަލުކުރުމާއި ޕާޓީން ކެނޑުމުގެ ފުރުސަތު ގެއްލުމަކީ ހުދުމުހުތާރު ރައީސުން އުފެދެން އޮތް ޖާގައެއް ކަމަށް މެމްބަރުން ބަލައިގެން ނުވާނެ އެވެ. ކުރިން ނަމަ ރައީސްގެ އަމަލްތައް ހުންނަ ގޮތާ މެދު ހިތްހަމަނުޖެހިގެން އެއާ ދެކޮޅަށް ވާހަކަ ދައްކައި، މަޖިލިސް ތެރެއިން އެކަން ހުއްޓުވަން މަސައްކަތްކުރުމުގެ ފުރުސަތު އޮވެ އެވެ. އެއީ މެމްބަރުންނަށް ރިޝްވަތު ދީގެން ސަރުކާރާ ދެކޮޅަށް ނުކުންނަން ނުވަތަ އިދިކޮޅު ޕާޓީގައި ހުރި މެމްބަރަކު ސަރުކާރު ފަޅިއަށް ގެންދެވެން ވެސް ހުޅުވިފައި އޮތް ދޮރެކެވެ. މިހާރު އެ ދޮރު ބަންދުވީ ކަމަށް ބަލަމާ ހިނގާށެވެ.
އެކަމަކު ގާނޫނުއަސާސީ ހެދިއިރު ރައްޔިތުންގެ މަޖިލިސް ތަސައްވުރުކޮށްފައި އޮތީ މުޅިން މިނިވަން ގުނަވަނެެއްގެ ގޮތަށެވެ. ސިޔާސީ ޕާޓީއަކަށް ނިސްބަތްވުމުގެ އެއްވެސް ވާހަކައެއް ރައްޔިތުންގެ މަޖިލިހުގެ ބާބުގައި ނެތެވެ. އެކަމަކު އާ ގާނޫނުއަސާސީގެ ދަށުން އެކުލަވާލި ރައްޔިތުންގެ މަޖިލިސްތައް މަސައްކަތްކުރަމުން އައީ އެ ތަސައްވުރާ މުޅިން ހިލާފަށެވެ. ފުރަތަމަ މަޖިލިހުގެ ތެރެއިން ވެސް ދައްކާލީ ނާޖާއިޒު ފައިދާ ނެގުމުގެ ބޮޑެތި މައްސަލަތަކެވެ.
ރައީސްކަން ކުރައްވާ ބޭފުޅަކަށް އޮންނަ އެންމެ ބޮޑު ބިރަކީ ވެސް މަޖިލިހުގެ މެޖޯރިޓީ ގެއްލި ސަރުކާރު ވެސް ވެއްޓިދާނެތީ އެކަމެވެ. އެ ބިރު އަސްލު އުފެދެނީ މެމްބަރުންގެ ހުވަޔާ އެއްގޮތަށް މަސައްކަތްނުކުރައްވާތީ އެވެ. ފައިސާގެ ފަހަތުން އަބަދުމެ ދުވާތީ އެވެ. ރައީސް މުހައްމަދު މުއިއްޒު ބޭނުންފުޅުވި ގޮތަށް ކުއްލިއަކަށް މަޖިލިސް މެމްބަރުންގެ 'މިނިވަންކަން' ގެއްލުވާލަން ޕީއެންސީގެ ސުޕަ މެޖޯރިޓީން އިއްޔެ ވޯޓު ލީ ވެސް، އެކަހަލަ ބިރަކަށެވެ. ރިސޯޓުތަކުގައި ޗުއްޓީ ހޭދަކުރާ ކޮންމެ ޓޫރިސްޓެއްގެ ބޮލަށް 500 ޑޮލަރު ނަގަން ސަރުކާރުން ހަމަޖެއްސުމުން ރާއްޖޭގެ އެންމެ ބޮޑެތި ވިޔަފާރިވެރިން ސަރުކާރާ ދެކޮޅުވެއްޖެ ކަމަށް ރައީސްއަށް ގަބޫލުކުރެއްވުނީ އެވެ. އެހެންކަމުން މަޖިލިސް ތެރެއިން 'ބަގާވާތެއް' ނުކުރެވޭ ގޮތް ހަދަން ޕީއެންސީގެ މެމްބަރުން ރައީސްއަށް އެހީތެރިވެދިނީ އެވެ.
އެކަމަކު މިހާރު ގެނައި އިސްލާހާ އެކު މެމްބަރުންނަށް ގެއްލުނު މިނިވަންކަން އެއީ ގާނޫނުއަސާސީއާ އެއްގޮތަށް މަސައްކަތްކުރައްވަން ލިބިވަޑައިގަންނަވާ ފުރުސަތަކަށް ހެއްދެވުމުގެ ޖާގަ އެބަ އޮތެވެ. އެއީ ރައީސް ބޭނުންފުޅުވިޔަސް، ސަރުކާރުން ބޭނުންވިޔަސް، މެމްބަރުން ލައްވާ ކޮންމެ ކޮންމެ ކަމެއް ނުކުރެވޭނެ ގޮތަށް ރާވާލެއްވުމެވެ. ތިމަންނަމެންނަކީ ވެސް ސަރުކާރު ކަހަލަ ބާރުގަދަ ގުނަވަނެއްކަން ސާބިތުކޮށްދެއްވުމެވެ.
ގާނޫނުއަސާސީގައި ރައްޔިތުންގެ މަޖިލިހާ ހަވާލުކޮށްފައި އޮތް ބޮޑު ޒިންމާ ނަގަން މިހާރު ލިބިވަޑައިގަންނަވާ އާމްދަނީ ކުޑަ ނަމަ އެކަން ބަދަލުކުރުމުގެ ބާރު މަޖިލިހަށް ލިބިގެންވެ އެވެ. އެކަމަކު އެ ބަދަލު ގެންނަންވާނީ މީގެ ފަހުން ރައީސްގެ ފަރާތްޕުޅުން ވެސް، ވިޔަފާރިވެރިއެއްގެ ފަރާތުން ވެސް މާލީ އެހީތެރިކަމެއް ނުހޯދުމުގެ އަަޒުމުގަ އެވެ.
ރައްޔިތުންގެ މަޖިލިސް ރަނގަޅަށް މަސައްކަތްކުރާ ނަމަ ގައުމުގެ ވަރަށް ގިނަ ކަންކަން ހުންނާނީ ހަމަޔަކަށް އެޅިފަ އެވެ. ރައީސުލްޖުމްހޫރިއްޔާއަށް ވެސް ބޭނުންހާ ގޮތަކަށް ނޫޅުއްވޭނެކަަން އެނގޭނީ ރައްޔިތުންގެ މަޖިލިސް އޭގެ ގޮތުގައި ހިންގައިގެންނެވެ. ކުރީގެ މެމްބަރުންނަށް ނުދެއްކެވުނީ އެ ނަމޫނާ އެވެ. ކުރީގެ މެމްބަރުން ފެއިލްވީ ވެސް އެހެންވެގެންނެވެ.
"މިއީ ހަގީގަތުގައި ގައުމުގެ ހަމަޖެހުން ގާއިމްކުރަން ހަމަ ވަރަށް މުހިންމު ކަމެއްގެ ގޮތުގައި ރައްޔިތުންގެ މަޖިލިސް މެންބަރުން މި ކަނޑައެޅުއްވީ،" އިއްޔެގެ އިސްލާހާ ބެހޭ ގޮތުން ރައީސް މުއިއްޒު ވިދާޅުވި އެވެ.
ގައުމުގެ ހަމަޖެހުމަކީ ހަމައެކަނި ރައީސް އާއި ސަރުކާރު ހިމާޔަތްކުރުމެއް ނޫނެވެ. ރައްޔިތުންގެ މަޖިލިސް ވެސް އޭގެ ގޮތުގައި ހިންގުމެވެ. އެހެންކަމުން މިހާރުގެ މެމްބަރުންނަށް މި އޮތީ ގާނޫނުއަސާސީގައި ރައްޔިތުންގެ މަޖިލިސް ތަސައްވުރުކުރި ގޮތަށް ހިންގުމުގެ ރަނގަޅު ފުރުސަތެއް ލިބިވަޑައިގެންފަ އެވެ.
މިއީ އިއްޔެގެ އަވަސް އިސްލާހާ އެކު ވެސް ކުރިއަށް އޮތީ ރަނގަޅެއް ކަމަށް އުއްމީދުކޮށް ކުރެވޭ ފިކުރުތަކުގައި ބައެއް މީހުންގެ ހިޔާލަށް އަރާފާނެ މަންޒަރުތަކެކެވެ.
ކޮމެންޓް (6)
ޝަރފު
ތައުފީގް
ސިކުނޑި
އޮތުން މޮޅު ކޮންމެ ވެރިކަމަށް....
ޙުސްރީ
ޙާޖީ