އަމްރު މި ދައްކައިދެނީ ސޭޓަކަށް ވެގެން ވެސް ކުރިއެރޭނެކަން

މަސައްކަތް ކުރަނީ ފިހާރައެއްގެ ސޭޓަކަށޭ ބުނެފި ނަމަ، ބައެއް މީހުން އޭނާއާ މެދު ދެކޭ ގޮތް ވެސް ބަދަލުވެދާނެ އެވެ. އެއީ، އެ މީހުންގެ ނަޒަރުގައި އަދާކުރަން އެކަށީގެންވާވަރުގެ ވަޒީފާއެއް ނޫނެވެ. އެކަމަކު އެއީ ހަގީގަތެއް ނޫން ކަން، އަހުމަދު އަމްރު ނަބީލް އަންނަނީ ސާބިތުކޮށްދެމުންނެވެ.

"ކޮންމެ ކަހަލަ ވަޒީފާއެއް ވިޔަސް، ޝައުގުވެރިކަން ހުރިއްޔާ ކުރެވިދާނެ،" އޭނާ ބުންޏެވެ.

"އަދާކުރަނީ ކޮން ވަޒީފާއެއްހޭ އަހައިފިއްޔާ އަޅުގަނޑު އެންމެން ކައިރީގައި ވެސް ބުނަނީ ފިހާރައެއްގެ ސޭޓަކަށޭ އުޅެނީ."

ވިލާ އިންޓަނޭޝަނަލް ހައި ސްކޫލުން އޭ ލެވެލް ނިންމުމަށް ފަހު، ވަޒީފާއެއް އަދާކުރުމަށް އަމްރު ގިނަ ތަންތަނަށް ސިޓީ ލިޔުނެވެ. އެކަމަކު އެއީ ކޮވިޑް-19ގެ ދުވަސްވަރުކަމުން އެއްވެސް ތަނަކުން އޭނާއަށް ޖަވާބެއް ނުލިބުނެވެ. އަތުވި ހަމައެކަނި އޮއިވާއްޔަކީ ދިވެހިންގެ ހުނަރުވެރިކަން ފެންނަ އާޓް އާއި ޑިޒައިންގެ ފިހާރައެކެވެ. އޮއެވާލި އާޓް ޝޮޕްއަށް އޭނާ ވަނީ، އަމްރުގެ ބަހުން ނަމަ، ސޭޓަކަށެވެ.

އުމުރުން އޭރު 19 އަހަރުގެ ޒުވާނާ ދުށްގޮތުގައި އެންމެ މޮޅު އަދި މަތީ ވަޒީފާއެއް ލިބޭހާ އޭނާގެ އިލްމެއް އަދި ތަޖުރިބާއެއް އޭރަކު ނެތެވެ. އެހެންވެ، ސުމަކުން ފަށަން އެ ވަޒީފާ ވެސް އޭނާއަށް އެންމެ ރަނގަޅެވެ. އަމްރު ގަބޫލުކުރީ މަަސައްކަތްކޮށްގެން، ތަޖުރިބާ ހޯދައިގެން އެތަނުން އޭނާއަށް ކުރިއަށް ދެވިދާނެ ކަމެވެ.

ފިހާރައެއް ނުވަތަ ތަނެއްގެ ސޭޓެއްގެ ގޮތުގައި އިނުމަކީ، އެ ޒުވާނާ ދެކޭ ގޮތުގައި، މައްސަލައެއް ނޫނެވެ. މުދާ ވިއްކަން ހުންނަ ސޭލްސް އެސިސްޓެންޓުންނަކީ ވެސް މުހިއްމު ބައެކެވެ. އެއީ ކުރިއަށް ދެވިދާނެ ކުންފުންޏަކަށް ވާ ނަމަ، މާ ބޮޑު ތަޖުރިބާއެއް ނެތިއްޔާ އެއީ ފަށައިގަންނަން އެންމެ ރަނގަޅު ގޮތް ވެސް މެ އެވެ. އޮއެވާލި އާޓް ޝޮޕްއާ އޭނާ ގުޅުނީ އެ ސަބަބާ ހުރެ އެވެ.

ފަށުފުލާއި އެފަދަ އެކި ކަހަލަ ގަހަނާ އާއި އާޓުގެ އުފެއްދުންތަކަށް މަޝްހޫރު އެ ފިހާރައިން އަމްރު ފުރަތަމަ ދަސްކުރީ ކަސްޓަމަރުންނާ ކުރިމަތިލާނެ ގޮތެވެ. ކަސްޓަމަރުންނާ މުހާތަބު ކުރާނެ ގޮތާއި އަޑާއި ޓޯން ގެންގުޅެންވީ ގޮތެވެ. ބޭނުންކުރަންވީ ބަސްމަގެވެ. މިއީ އެ ޒުވާނާއަށް ވަރަށް އާ، އަދި ފުރަތަމަކޮޅު ދަސްކުރަން އުނދަގޫ ތަޖުރިބާއަކަށް ވި އެވެ.

އެކަމަކު އެ އާދައިގެ ވަޒީފާއިން އަމްރުއަށް އެނގުނީ މީހުންނާ ކުރިމަތިލައި، ރީތިކޮށް މުހާތަބުކުރުމަކީ ކިހާ މުހިއްމު ކަމެއްކަމެވެ. އެއްޗެއް ގަންނަން ކަސްޓަމަރަކު ފިހާރައަށް ވަނުމުން، ސަލާމް ގޮވާލައި، މަޑުމައިތިރިކަމާ އެކު އޭނާގެ ބޭނުން އޮޅުންފިލުވުމުން،  ކަސްޓަމަރު އެކަން ބަލައިގަންނަ ކަމެވެ. ފިހާރައިން ނުކުންނަން ދޮރު ހުޅުވާލަ ދިނުން ފަދަ 'ކުދިކުދި' ކަންތައްތަކުން، ކަސްޓަމަރު ހިތްހަމަ ޖައްސައިދެވިދާނެ ކަމެވެ.

ފަހަރެއްގައި މިއީ، އޮފީހެއްގެ މޭޒު ދޮށުގައި އިނދެ ނުވަތަ ބޮޑު ވަޒީފާއަކުން އޭނާއަށް ދަސްނުވެދާނެ ކަންކަމެވެ.

އަމްރު ބުނިގޮތުގައި ފިހާރައެއްގެ އާދައިގެ ވަޒީފާއަކަށް ދާން ފެށުމުން، ބައެއް މީހުން އެކަމާ ފާޑުކިޔެވެ. އޭ ލެވެލްއަށް ފަހު އިތުރަށް ނުކިޔަވައި، މަސައްކަތުގެ މައިދާނަށް ނުކުތުމުން އާއިލާގެ ތެރެއިން ވެސް ކޮންމެވެސް ވަރަކަށް ޕްރެޝަރު ކުރިމަތިވި އެވެ. އެކަމަކު މަތީ ސާނަވީ ނިންމި އިރު ވެސް، ކުރިއަށް ދާން ބޭނުންވާ ދާއިރާ ނޭނގޭތީ، އިތުރަށް ކިޔަވާކަށް އޭރު އޭނާއަކަށް މުހިއްމެއް ނޫނެވެ.

"އެކަމަކު މިހާރު އަޅުގަނޑު މިދަނީ ޑިގްރީއަށް ކިޔަވަމުން. ވަޒީފާ އަދާކުރަމުން، ކުރިއަށް ދާން ބޭނުންވާ ދާއިރާއިން ކިޔަވަމުން،" އަމްރު، ބުންޏެވެ.

އޭނާ ބުނިގޮތުގައި ޅައުމުރުގައި ވަޒީފާއަށް ނުކުތް ނަމަވެސް، ގިނަ ޒުވާނުން ބޭނުންވަނީ މަސައްކަތުގައި ދެމިހުރުމަށް ވުރެ، ތަޖުރިބާކޮށްލާށެވެ. މާ ގިނަ ދުވަހު އެއް ތަނެއްގައި އުޅޭކަށް ބޭނުމެއް ނުވެ އެވެ. އެ މީހުންގެ ނަޒަރުގައި، 'އެއް ތަނުން އަނެއް ތަނަށް' ބަދަލުވެ، ހޯދާ ބެލޭނީ، ޅައިރު، މަސައްކަތުގެ ކުރީކޮޅު އެވެ. އެކަމަކު އެއީ، މުސްތަގްބަލުގައި ކުރިއަށް ދެވޭނެ ފަދަ ފުރުސަތުތަކެއް ހުރި ތަނެއް ކަމުގައި ވާ ނަމަ، އެންމެ ރަނގަޅު ގޮތަކީ އެ ތަނެއްގައި ގާއިމްވެ ހުރެ، މަސައްކަތް ކުރުން ކަމަށް އޭނާ ދެކެ އެވެ.

އެ ޒުވާނާގެ ނަޒަރުގައި، ލިބޭ މުސާރައަށް ވުރެ ބޮޑަށް މަސައްކަތް ދެކެ ލޯބިވާން ދަސްކުރަން ޖެހެ އެވެ.

އަމްރުގެ ބައްޕަ އިބްރާހިމް ނަބީލަކީ ފުލުހުންގެ އިސް އޮފިސަރަކެވެ. މަންމައަކީ މަޝްހޫރު ޕްރެޒެންޓަރު ޝިފްލާ އިބްރާހީމެވެ. ޅައުމުރުގައި މަސައްކަތުގެ އަމަލީ މައިދާނަށް ނުކުމެ، ދަރިފުޅު ނަމޫނާ ދައްކަމުން ދާތީ އެ މީހުން ތިބީ އުފަލުންނެވެ.

"އަމްރުއަކީ މަސައްކަތުގެ އަހުލާގު ހުރި، ކުރާ ކަމެއް ޝައުގުވެރިކަމާ އެކު ކުރާ ޒުވާނެއް. އެކަން އޭނާ އެ ދަނީ ސާބިތުކޮށްދެމުން،" ޝިފްލާ ބުންޏެވެ.

ދިވެހި ޒުވާނުންތަކެއް ކަމަށްވާ، ރާނިޔާ މަންސޫރާއި ރާޔާ މަންސޫރު އަދި އިސްމާއިލް ރަޝީދާއި އަލީ އަޖީލް ރަޝީދު ފެށި އޮއެވާލި އާޓްއަކީ މިހާރު ރާއްޖޭގެ އިތުރުން ބޭރުގައި ވެސް ފުޅާކުރަމުން އަންނަ ވިޔަފާރިއެކެވެ. އަމްރު އެތަނާ ގުޅުނީ އާދައިގެ ވަޒީފާއަކަށް ނަމަވެސް، އޭނާގެ މަސައްކަތުގެ އަހުލާގާއި ހީވާގިކަމުން ޖެހިގެން އައި އަހަރު ވަނީ، ސޭލްސް އެންޑް އޮޕަރޭޝަންގެ ސީނިއާ އެގްޒެކެޓިވްގެ މަގާމަށް ޕްރޮމޯޓްވެފަ އެވެ. މިހާރު އެއީ އެތަނުގެ ރީޓެއިލް ސޭލްސްގެ އެސިސްޓެންޓް މެނޭޖަރެވެ.

އަމްރު ސާބިތުކޮށްދިނީ، ތަޖުރިބާއެއް ނެތި، އާދައިގެ ވަޒީފާއަކުން ވެސް މަސައްކަތް ފެށިދާނެ ކަމެވެ. އަދި ހިތްވަރާއި ޝައުގުވެރިކަމާ އެކު މަސައްކަތްކޮށްފި ނަމަ، ކުރިއެރުން ހޯދޭނެކަމެވެ. 

މަސައްކަތުގެ މައިދާނުގައި މިއީ ނަމޫނާ ޒުވާނުންނެވެ.