200 މިލިއަން ޑޮލަރު ހޯދަން އުޅުނީ ގާކޮޅެއް ވެސް ނުބާއްވާ

މި ވާ ގޮތެއް އަހަރެމެން ދިވެހިންނަށް އެބަ އެނގޭ ހެއްޔެވެ؟ އެކި ސަރުކާރުތަކުން ހަދާ އެގްރިމެންޓްތަކުގެ ސަބަބުން ދިވެހި ދައުލަތަށް ކުރިމަތިވާ މާލީ ގޮންޖެހުންތަކާ މެދު ވިސްނަން ހެއްޔެވެ؟ މިއީ ސިޔާސީ މީހުންގެ އޮޅުވާލުމާއި ގައުމުގެ ފައިދާއަށް ވުރެ ވަކި ބައެއްގެ ފައިދާ އިސްކުރުންކަން ގަބޫލުކުރެވޭ ހެއްޔެވެ؟

ޕާޓީގެ ފިކުރު އެއްކައިރިކޮށްލާށެވެ. ވަކި ލީޑަރުންތަކަކަށް ސަޕޯޓްކުރުމުގެ ލޯތްބަށް ލޯ މަރާލާށެވެ. ހަމައެކަނި ވިސްނާލަންވީ ކަންކަން ވަމުންދާ ގޮތުގެ މައްޗަށެވެ. އޭގެ ރަނގަޅު ނުބައި، ދެނެގަތުން، ދިވެހި ރައްޔިތުންނަށް ހުއްޓެވެ.

އެންމެ ފަހުން މި އެނގުނީ އިންޑިއާގެ ޓާޓާ ކުންފުނީގެ ބޮޑު ހިއްސާއެއް އޮންނަ އެޕެކްސް ރިއަލިޓީން ރާއްޖެއާ ދެކޮޅަށް އިންޑިއާގެ މުމްބާއީގެ އާބިޓްރޭޝަނަށް ހުށައެޅި މައްސަލައިގެ ސަބަބުން ބަދަލެއްގެ ގޮތުގައި 200 މިލިއަން ޑޮލަރު (3 ބިލިއަން ރުފިޔާ) ދައްކަން ޖެހުމުގެ ފުރުސަތު ސަރުކާރަށް އޮތް ކަމެވެ. އެހާ ބޮޑު ބަދަލެއް ކޮން ކަމަކަށް ހެއްޔެވެ؟ މާލެއިން ފްލެޓް ހަދަން އެމްޑީޕީގެ ކުރީގެ ސަރުކާރުން ދިން ދެ ބިމެއްގައި އެއްވެސް މަސައްކަތެއް ނުކުރުމުން، އެ އެއްބަސްވުން ބާތިލްކުރުމެވެ.

ސޯސަން މަގުގައި އޮތް ކުރިން ނާދީ ހިންގި ބޮޑު ބިމާއި މާފަންނުގައި ކުރިން އޯޑިއޯން ސިނަމާ ހިންގި ބިން ޓާޓާއަށް ދިނީ އެ މީހުން ބޭނުންވާ އަގަކަށް ހަމައެކަނި ފްލެޓް ހަދައި، ވިއްކާކަށެއް ނޫނެވެ. އެ ތަންތަނުގައި ވިޔަފާރި ހިންގަން ހާއްސަކުރާ ބައިތައް ވެސް 50 އަހަރަށް އެ ކުންފުންޏަށް ލިބޭ ގޮތަށެވެ. އޭގެ އިތުރުން އަޅާ ފްލެޓްތަކަށް ލަގުޒަރީ ވިލާ ހަދަން، ޅ. އަތޮޅުގެ ފަޅުރަށެއް ކަމަށްވާ ޅޮސްއަލަފުށި ވެސް ދިނެވެ.

މި ހުރިހާ ފައިދާތަކެއް ލިބޭ ގޮތަށް ބޭރުގެ ކުންފުންޏަކަށް މަގު ތަނަވަސްކޮށްދިނަސް، އެއިން އެއްވެސް ބިމެއްގައި އިމާރާތެއް ހަދަން ގާކޮޅެއް ހިސާބު ވެސް، މިދިއަ 12 އަހަރުގެ ތެރޭގައި، ބާއްވާލާފައެއް ނުވެ އެވެ. އެކަމާ ހެދި ކުރީގެ ރައީސް އަބްދުﷲ ޔާމީންގެ ސަރުކާރުން ޓާޓާ އެއްބަސްވުން ބާތިލްކުރި އެވެ. އެގޮތަށް ބާތިލްކުރީ ވެސް، އެ ސަރުކާރުން ދެ އަހަރެއްހާ ދުވަހުގެ މުއްދަތެއް ދީފަ އެވެ. އެ ދެ އަހަރު ވެސް، އެޕެކްސް ރިއަލިޓީ ފެނުނީ، ރާއްޖޭގެ ކޮންސްޓްރަޝަން ކުންފުނިތަކަށް ވުރެ ވެސް ފަގީރުކޮށެވެ. އަމިއްލައަށް ފައިސާ ހޯދައިގެން ކަމެއް ފެށޭވަރުގެ ބައެއް ނޫން ކަން، 12 އަހަރުގެ ތަޖުރިބާއިން އެނގެ އެވެ. ޓާޓާއަކީ ކިތައްމެ ބޮޑު ކުންފުންޏަކަށް ވިޔަސް، ރާއްޖޭގައި ގާތްގަނޑަކަށް 200 އެޕާޓްމަންޓް ހަދަން ހޭދައެއްކުރުމުގެ ހިތްވަރެއް ވެސް ނެތްކަން، މިދިއަ ދުވަސްތަކުގައި އޮތީ ފެންނާށެވެ.

ދެން ކޮން 200 މިލިއަން ޑޮލަރެއް ހެއްޔެވެ؟ އެ އަދަދު އެ އަންނަނީ ކޮން ހިސާބެއް ހަދައިގެން ކަމެއް އެއްގޮތަކަށް ވެސް ނޭނގެ އެވެ. ހުޅުމާލޭގައި 1،300 އެޕާޓްމަންޓް ހިމެނޭ ވިނަރެސްއަށް ވެސް ހޭދަވީ ގާތްގަނޑަކަށް 150 މިލިއަން ޑޮލަރު (2.3 ބިލިއަން ރުފިޔާ) އެވެ. އެއީ އެ މަޝްރޫއު ހިންގާތީއޭ ކިޔާފައި އެޗުޑީސީއަށް ރިސޯޓް ހަދަން ނުވަތަ އެމްޑީޕީގެ ކުރީގެ ސަރުކާރުން ތައާރަފުކުރި 'ލަގުޒަރީ ވިލާ' އަޅަން ބިންބިމާއި ރަށްރަށް ވެސް ނުދީ އެވެ.

މި ސަރުކާރު ވެރިކަމާ ހަވާލުވި ފުރަތަމަ ދުވަސްކޮޅު ނޫމަޑި ނަމަކަށް ކިޔާ، ބޮޑެތި އޮޅުވާލުންތަކެއްގެ ތެރެއިން ރާއްޖޭގައި ބައެއް މަޝްރޫއުތައް ހިންގި، ކުންފުންޏަކަށް ވެސް ވަރަށް ބޮޑު ބަދަލެއް ވަނީ ދީފަ އެވެ. އެމްޑީޕީގެ ކުރީގެ ސަރުކާރުން ނޫމަޑިއަށް، ލަގުޒަރީ ވިލާ އަޅަން ރަށެއް ދިނީ، މީހުން އުޅޭ ބައެއް ރަށްރަށުގައި ވަކި ވަރަކަށް ހައުސިން ޔުނިޓްތައް އަޅާ ގޮތަށެވެ. އެ ހައުސިން ޔުނިޓްތައް އަޅަން ސަރުކާރުން އެ ކުންފުންޏަށް ކުރި ހޭދަ ފިނޭންސް މިނިސްޓްރީން ރައްޔިތުންނަށް ހާމަކޮށްދިނުން ރަނގަޅެވެ. ފުރަތަމަ ކަނޑައެޅި އަގަށް ވުރެ އެތައް ތަނެއް ބޮޑުކޮށް، ސަރުކާރުން ނޫމަޑިއަށް އެކި ފަހަރު މަތިން ފައިސާ ވެސް ދޭން ޖެހުނު ކަމަށްވެ އެވެ. އެކަމަކު އެގްރިމެންޓްތަކުގައި އޮތް ގޮތަށް އެއްވެސް ކަމެއް ނުކޮށް، އެންމެ ފަހުން ނޫމަޑިއަށް 55 މިލިއަން ޑޮލަރު (850 މިލިއަން ރުފިޔާ) ދިނީ، އާބިޓްރޭޝަނުން އެއަށް ވުރެ ބޮޑު އަދަދެއް ދޭން ނިންމަފާނެތީ ސަރުކާރު 'ބިރުގަނެގެން' ކަމަށް، ރައްޔިތުންނަށް ހީވެދާނެ އެވެ.

ދިވެހި ރައްޔިތުން ސަރުކާރުތަކާ ހަވާލުކުރި ދައުލަތުގެ މުދަލާއި ފައިސާ ހިމާޔަތްކުރުމުގެ ބަދަލުގައި، ސަރުކާރުތަކުން ހަދާ އެއްބަސްވުންތަކުގެ ފައިދާ ނަގަމުން އެ ދަނީ، އެ އެއްބަސްވުންތަކަށް ސީދާ އެ ކުންފުނިތަކުން ހިލާފުވެފައި އޮންނަ ދަނޑިވަޅުތަކުގަ އެވެ. އެކަމަކު އަބަދު ވެސް މޮޅު މިވަނީ އެ ކުންފުނިތަކެވެ. މިއީ ގައުމީ ވަރަށް ބޮޑު މައްސަލައެކެވެ. މިއިން ކަމެއް ރައްޔިތުންނަށް ސާފުކޮށްދިނުމުގެ ބަދަލުގައި، މިނިސްޓްރީތަކާއި އެޓާނީ ޖެނެރަލް އޮފީހުން ނެރެނީ ކުރު ބަޔާންތަކެވެ. އެ ބަޔާންތަކުން ވާއެއް ނުވާއެއް ނޭނގެ އެވެ. އޮންނަނީ ސަރުކާރުން ބުނަން ބޭނުން ވާހަކަ އެކަންޏެވެ. އުފެދޭ ސުވާލުތަކަށް ޖަވާބެއް ނުލިބެ އެވެ. އެ ބަޔާންތަކުގައި ޖަހާފައި އޮންނަ ހިސާބުގެ ބޮޑެތި އަދަދުތަކުން ރައްޔިތުން ގަންނަނީ ބިރެވެ. ދެން ބައެއް މީހުންނަށް ބުނެވެނީ ދޭން ޖެހިދާނެ އަގު ދެއްކުމަށް ވުރެ ލުއި ގޮތެއް ހޯދުން ރަނގަޅު ކަމަށެވެ.

ނަމަވެސް ގޯސްވެގެން މި އުޅެނީ ފުރަތަމަ ވެސް އަޅާ ފިޔަވަޅެވެ؛ އެހާ ނާޒުކު އެއްބަސްވުންތަކެއް ހެދުމެވެ. ދައުލަތަށް ގެއްލުން ލިބޭ ގޮތަށް، ފައިސާ ނެތް ބަޔަކާ ނުވަތަ އަމިއްލަ ފައިސާއިން އިންވެސްޓްނުކޮށް ދިވެހި ދައުލަތުން ފައިސާ ހޯދައިގެން މަސައްކަތްކޮށްގެން ފައިދާ ނަގަން ބޭނުން ކުންފުނިތަކާ އެކު 'ނުރައްކާތެރި' އެއްބަސްވުންތަކެއް އެކުލަވާލުމެވެ. 

ޓާޓާ ހިއްސާވާ އެޕެކްސް ރިއަލިޓީއާ އެކު ސަރުކާރުން ހެދި އެއްބަސްވުމަކީ "އާދަޔާ ހިލާފު އެއްބަސްވުމެއް" ކަމަށް، ކުރީގެ ޑެޕިއުޓީ އެޓާނީ ޖެނެރަލް އަދި މިހާރު ވިލިމާލެ ދާއިރާގެ މަޖިލިސް މެމްބަރު އަހުމަދު އުޝާމް ސިފަކުރެއްވީ ސަބަބުތަކެއް އޮވެގެންނެވެ. ހަމަ އާދަޔާ ހިލާފީ އެވެ. އެންމެ ގަލެއް ވެސް ބިންމަތީގައި ނުބާއްވައި 200 މިލިއަން ޑޮލަރުގެ ބަދަލެއް ހޯދަން، އަމިއްލަ ގައުމުގެ އާބިޓްރޭޝަނަށް ދެވޭ ގޮތަށް އެއްބަސްވުން ހަދާފައި އޮންނާނީ، ހަމަ އާދަޔާ ހިލާފުވެގެންނެވެ.

"އެއީ އާންމު އުސޫލުގެ ތެރެއިން ހިނގާފައި އޮތް ކަމެއް ނޫން. މިވަރަށް ދައުލަތަށް ގެއްލުން ވާ ގޮތަށް ސޮއިކޮށްފައި އޮތް އެގްރިމެންޓެއް ނުދެކެން،" މި ފަހުން މި ނޫހާ ވާހަކަ ދައްކަވަމުން އުޝާމް ވިދާޅުވި އެވެ.

އަމިއްލަ ޕާޓީން ކޮންމެ ކަމެއް ކުރިޔަސް ހެޔޮ ދިވެހިން މިފަދަ ކަންކަމާ ވިސްނާކަށް ނުވޭ ހެއްޔެވެ؟ ސަޕޯޓްކުރާ ލީޑަރުން ކޮންމެ ފަދަ ފައިދާއެއް ހޯދިޔަސް، ޕާޓީތަކުގެ މެމްބަރުންގެ ވިސްނުން ބަދަލުވާކަށް ނުވޭ ހެއްޔެވެ؟ އަމިއްލަ ދައުލަތުގެ މުއްސަނދިކަން ގޯސް އެއްބަސްވުންތަކުން ގެއްލިގެން ދާދިއުމާ މެދު، ސަޕޯޓަރުން ސުވާލުކުރާކަށް ބޭނުމެއް ނުވޭ ހެއްޔެވެ؟ މިއީ ހަމައެކަނި ނޫސްވެރިން ވިސްނަން ޖެހޭ، ސުވާލު އުފައްދަން ޖެހޭ ކަންކަން ހެއްޔެވެ؟

އިތުރަށް ކިޔާލަން -