ރީކޯ މޫސަގެ 'އަސްލު ވާހަކަ'؛ އެކަން ފެށެނީ ތިލަފުށީ ފަޅުން

ރީކޯ މޫސާ މަނިކުގެ 'އަސްލު ވާހަކަ' ފަށަން ޖެހެނީ ފިލްމީ ތަރިއަކަށް ވެވަޑައިގެންނެވި ހިސާބަކުން ނޫނެވެ. ނުވަތަ ރައީސް މައުމޫން އަބްދުލްގައްޔޫމާ ދެކޮޅަށް 2003 ގައި ފެށި އިސްލާހީ ހަރަކާތުގައި ލ. އަތޮޅު ގޮނޑި ކާމިޔާބުކުރެއްވި ހިސާބަކުން ވެސް ނޫނެވެ. އެ ވާހަކަ ފެށެން ޖެހޭނީ، އެ ހުރިހާ ކަމެއްގެ ތެރެއިން އޭނާ ގެންގޮސް މުއްސަނދިކޮށްދިން ހިސާބުންނެވެ: އެއީ 30 ސެޕްޓެމްބަރު 2010 އެވެ.

އެ ދުވަހަކީ އެމްޑީޕީގެ ވެރިކަމުގައި ތިލަފުށީ ފަޅު ހިއްކަން އޭރު މޫސަގެ ކުންފުނި ހެވީލޯޑާ އެކު ތިލަފުށި ކޯޕަރޭޝަން ލިމިޓެޑް (ޓީސީއެލް) އިން 21 މިލިއަން ޑޮލަރު (323 މިލިއަން ރުފިޔާ)ގެ މަޝްރޫއުގައި ސޮއިކުރި ދުވަހެވެ. ތިލަފުށި ފަޅުން 156 ހެކްޓަރުގެ ބިން ހިއްކަން އެ ބޮޑު މަޝްރޫއު ހެވީލޯޑާ ހަވާލުކުރި އިރު ވެސް، އަދި އޭގެ ފަހުން ހެދި ހާއްސަ އޮޑިޓަކުން ވެސް ހާމަވީ އެއީ އެވަރުގެ މަސައްކަތެއް ކުރެވޭ ވަރުގެ ކުންފުންޏެއް ނޫން ކަމެވެ.

ކަން ވީ ވެސް އެހެންނެވެ. ވަގުތީ ގޮތުން މަސައްކަތް ހުއްޓާލިކަން ކަނޑައަޅައި، 13 އޮކްޓޯބަރު 2011 ގައި، ހެވީލޯޑާއި ޓީސީއެލްއާ ދެމެދު ސޮއިކުރި އެވެ. އޭރު ހިއްކުނީ އެންމެ 24 ހެކްޓަރުގެ ބިމެވެ. މަސައްކަތް ފަށަން އެހީއެއްގެ ގޮތުން އެޑްވާންސަށް 3 މިލިއަން ޑޮލަރު (38 މިލިއަން ރުފިޔާ) ޓީސީއެލް އިން ދިނީ، އެވަރުގެ ގެރެންޓީއެއް ވެސް ނެތި އެވެ. 

ސިޔާސީ ބާރުގައި ހެވީލޯޑަށް ފައިސާތަކެއް ދޭން ކުރި ކަމެއްގެ ގޮތުގައި ނޫނީ، ބިން ހިއްކުމުގެ އެ މަޝްރޫއު ބެލޭކަށް ނެތެވެ. 

މޫސަގެ 'އަސްލު ވާހަކަ' އެހާ ހިސާބަކުން އަދި ނުނިމެ އެވެ. ތިލަފުށި ފަޅު ހިއްކުން ޓީސީއެލްއަށް ބޮޑު ގެއްލުމަކަށް ވީ އިރު، ދެން އައި ރައީސް އަބްދުﷲ ޔާމީން ސަރުކާރުން ވެސް ހެވީލޯޑަށް، ނުވަތަ މޫސައަށް، ނުވަތަ މޫސަގެ އާއިލާއަށް، ހޯދައިދިނީ ވެސް، ޕީޕީއެމްގެ ވެރިކަން ނިމުނު ފަހުން ނެރުނު ހާއްސަ އޮޑިޓަކުން އެނގޭ ގޮތުގައި، ނާޖާއިޒު ފައިދާތަކެކެވެ.

އެ ވާހަކައިގެ ހަގީގަތަކީ މި އެވެ: ޕީޕީއެމްއަށް މޫސަ ވީ ރައްޔިތުންގެ މަޖިލިހުގައި މުހިންމު މެމްބަރަކަށެވެ. އެއީ އެމްޑީޕީގެ މެމްބަރެއްގެ ގޮތުން، އެކަމަކު މޫސަގެ ވަރަށް ބޮޑު މަސައްކަތަކުން ހޯއްދެވި މަޖިލިހުގެ ނާއިބު ރައީސްގެ މަގާމުގެ މުހިންމު ކަމެވެ.

ތިލަފުށި ބިން ހިއްކުމުގެ މަޝްރޫއުން ހެވީލޯޑަށް ލިބުނު ގެއްލުމުގެ ބަދަލެއްގެ ގޮތުން ޕީޕީއެމް ސަރުކާރުން ލ. އަތޮޅުން ތިން ރަށަކާއި 35 މިލިއަން ރުފިޔާ ދިނީ، މޫސަގެ ވޯޓާއި މޫސަގެ ވިސްނުމާއި މޫސަގެ ވާހަކަތައް ޕީޕީއެމް ކޮޅަށް އަނބުރާލާށެވެ. އެ ސަރުކާރުން އެގޮތަށް ކަންތައް ކުރީ، މަސައްކަތް މެދުކަނޑާލަން 2011 ގައި ހެދި އެއްބަސްވުމުގައި، އެއްވެސް ބަދަލެއް ހޯދުމުގެ ފުރުސަތު ހެވީލޯޑަށް ނެތި އޮއްވަ އެވެ.

ބަދަލެއް ދޭން ނުޖެހޭ ތަނެއްގައި މިކަހަލަ ބޮޑެތި ފައިދާތައް މޫސަގެ މަސްލަހަތު އޮތް ކުންފުންޏަކަށް ލިބުމުން، އޭނާގެ 'އަސްލު ވާހަކަ' އޭގެ ޒާތުގައި 'ފުރިހަމަ' އެވެ. ދެން ސޮއިކުރެއްވީ ޕީޕީއެމަށެވެ. ދެން ވިދާޅުވީ 2018ގެ ރިޔާސީ އިންތިހާބު ރައީސް ޔާމީން ކާމިޔާބުކުރައްވާނީ 'އެއްލަކިން' ކަމަށެވެ.

ޔާމީނަށް އެ އިންތިހާބުގައި ކުރިމަތިވެވަޑައިގަތީ، ކުރީގެ އެއްވެސް ރައީސަކަށް ދިމާވެފައި ނެތްވަރުގެ ބޮޑު ނާކާމިޔާބީއެކެވެ.

އެކަމަކު މޫސަގެ 'އަސްލު ވާހަކަ' ކާމިޔާބެވެ. ހެވީ ލޯޑަށް ލިބުނު ތިން ރަށުގެ ތެރެއިން އެއް ރަށުގައި ނޮވެމްބަރު 2019 ގައި ވަނީ ރިސޯޓެއް ތަރައްގީކޮށް، ހުޅުވައިފަ އެވެ. 

ސިޔާސީ ދާއިރާގައި އަޑުއިއްވައިގެން، އަނގަތަޅައިގެން، ތަނަވަސްކަން ހޯދުމަކީ ރާއްޖޭގައި، އާންމު ކަމެއްކަން، މޫސަގެ މި ވާހަކައިން ވެސް އެނގެ އެވެ. އެ ތަޅާ އަނގައަށް ރައްޔިތުން ވޯޓު ނުދިނަސް މެ އެވެ.

ދެން މޫސަ މިހާރު އެ ހުންނެވީ ރައީސް އިބްރާހިމް މުހައްމަދު ސޯލިހުގެ ފަޅީގަ އެވެ. އިއްޔެ އޭނާ ވަނީ އަލުން އެމްޑީޕީއަށް ގުޅިވަޑައިގެންފަ އެވެ. އެއީ އޭނާގެ އަމިއްލަ ނިންމެވުމެކެވެ. އެކަމަކު ރައްޔިތެއްގެ ގޮތުން ބެހެން ޖެހޭ ކަމެކެވެ. ހާއްސަކޮށް އެފަދަ ބޭފުޅުންނަށް ރައްޔިތުންގެ ފައިސާއިން ނާޖާއިޒު ފައިދާ ލިބިވަޑައިގަންނަވާ ނަމަ އެވެ. އެފަދަ ބޭފުޅުންނާ ގުޅުވައިގެން ހަގީގަތާ ހިލާފު ތައުރީފްކުރައްވާ ނަމަ އެވެ.

އެމްޑީޕީއާ ގުޅިވަޑައިގެން ރައީސް ސޯލިހުގެ ފަޅިޔަށް މޫސަ އެރުއްވުމުން ރައީސަށް އެޑްވާންޓޭޖެއް އޮތީ ކަމަށް ވެދާނެ އެވެ. އެކަމަކު މޫސައަށް ތައުރީފްކުރައްވާ ކުރެއްވި ޓްވީޓްގައި "މޫސައަކީ އަބަދުވެސް އިސްލާހަށް މަސައްކަތްކުރައްވާ ބޭފުޅެއް" ކަމަށް ވިދާޅުވުމަކީ، އިތުރުފުޅެކެވެ.

މޫސައަކީ ގާނޫނުއަސާސީއާ ހިލާފަށް ފުލުހުންނާއި ސިފައިން ރައްޔިތުންގެ މަޖިލިސް ހިސާރުކުރި އިރު އެކަމަށް ވާގިދެއްވަން ހުންނެވި މަޖިލިހުގެ ނައިބު ރައީސް އެވެ. މޫސައަކީ 1 ފެބްރުއަރީ 2018ގައި ސުޕްރީމް ކޯޓުން ނެރުނު އަމުރާ އެކު، ރާއްޖޭގެ އެންމެ މަތީ ކޯޓަށް ސިފައިން ވައްދައި ފަނޑިޔާރުން ހައްޔަރުކުރި އިރު، އެކަން ދިފާއުކުރެއްވި ބޭފުޅެކެވެ. މޫސައަކީ، ގާނޫނުއަސާސީން ރައްޔިތުންނަށް ލިބިދޭ އަސާސީ އެތައް ހައްގަކަށް ޔާމީންގެ ސަރުކާރުން އަރައިގަނެ، ރައްޔިތުންގެ މަޖިލިސް މެދުވެރިކޮށް ގާނޫނުތައް ފާސްކުރި އިރު، އޭގެ ފަހަތުގައި ހުންނެވި މެމްބަރެކެވެ.

އިސްލާހީ މަސައްކަތަށް މޫސަ މަސައްކަތްކުރެއްވީ، ވެރިކަމުން މައުމޫން ބާލާށެވެ. އެ ފޯރިގަނޑުގަ އެވެ. އެކަމަކު މޫސަ ވެސް ހިމެނިވަޑައިގެން ހެދި ގާނޫނުއަސާސީއަށް ސަރުކާރުތަކުން ފައިން އެރިިއިރު، އެ ހުރިހާ ކަމެއްގެ ފަހަތުގައި، ދިފާއުގައި ހުންނެވި އެއް ބޭފުޅަކީ އޭނާ އެވެ.

އެހެންކަމުން މިހާރު މޫސައަކީ އިސްލާހަށް މަސައްކަތްކުރައްވާ ބޭފުޅެކޭ ބުނެވޭކަށް ނެތެވެ. އޭނާ ހުންނަވާނީ އޭނާއަށް ފައިދާވާ ކޮޅަކަށެވެ. އަލުން ޔާމީން ވެރިކަމަށް ވަޑައިގަތަސް، އެމަނިކުފާނުގެ ފަހަތްޕުޅަށް އަރައިވަޑައިގަންނަވާނެ އެވެ.

ސަބަބު ވަރަށް ސާފެވެ؛ މޫސަގެ 'އަސްލު ވާހަކަ' ފެށެނީ ފައިސާއާ ހިސާބުންނެވެ.