ސަދާ މަރުވުމުގައި އިހުމާލުވި ޑޮކްޓަރުންނާއި ނަރުހުންނަށް ޖިނާއީ ދައުވާ ކުރަން ހުށަހަޅައިފި

ޏ. ފުވައްމުލަކު ހޮސްޕިޓަލުގައި ފަރުވާ ދެމުން ދަނިކޮށް މަރުވި، ސަދާ ސައުދުﷲއަށް ފަރުވާ ދިނުމުގައި އިހުމާލުވި ޑޮކްޓަރުންނާއި ނަރުހުންނަށް ޖިނާއީ ދައުވާ ކުރުމަށް، ކުޑަކުއްޖާގެ އާއިލާއިން ފުލުހުންނަށް ހުށަހަޅައިފި އެވެ.

މައްސަލައިގެ ފެށުން - ބަނޑުގައި ރިިއްސައި ހޮޑުލާތީ ފުވައްމުލަކު ހޮސްޕިޓަލަށް ގެންދިޔަ ސަދާ މަރުވީ މިދިޔަ އޮކްޓޯބަރު 3ގައި އެ ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށެވެ. ދެމަފިރިއެއްގެ ހުރި ހަމައެކަނި އަންހެން ދަރިފުޅު މަރުވީ ހޮސްޕިޓަލްގެ ފަރުވާކުޑަކަމުން ކަމަށް ބުނެ އާއިލާ އިން ނުރުހުން ފާޅުކޮށް މުޒާހަރާކުރަން ފެށުމުން ހެލްތުން ނިންމީ އެ މައްސަލަ ބެލުމަށެވެ.

ސަދާ މަރުވީ އެ ކުއްޖާގެ ހާލަތު ބެލުމެއް ނެތި ދިން ނުގުޅޭ ފަރުވާތަކެއްގެ ސަބަބުން ކަމަށް ވާތީ އެ ކަމުގައި އިހުމާލުވި އެ ހޮސްޕިޓަލްގެ ޑޮކްޓަރުންނާއި ނަރުހުންނަށް ފިޔަވަޅު އެޅުމަށް ހެލްތު މިނިސްޓްރީން އަންގާފައިވެ އެވެ.

އެނގުން މުހިއްމު:- މި މައްސަލަ މޯލްޑިވްސް މެޑިކަލް އެންޑް ޑެންޓަލް ކައުންސިލުން ބެލުމަށް ފަހު، ސަދާ މަރުވުމުގައި ޑޮކްޓަރުންގެ އިހުމާލު ހިމެނޭ ކަމަށް ނިންމައި، ދެ ޑޮކްޓަރު މިދިޔަ ޑިސެމްބަރު މަހުގެ ތެރޭގައި ވަނީ ވަޒީފާއިން ވަކިކޮށް، އަނބުރާ ގައުމަށް ފޮނުވާލާފަ އެވެ.

މި މައްސަލަ މުރާޖައާ ކުރުމުގެ މަސައްކަތް، ނާސިން އެންޑް މިޑްވައިފަރީ ކައުންސިލުން ކުރި ނަމަވެސް މިހާތަނަށް އެކަމާ ގުޅޭ އިތުރު އަޕްޑޭޓެއް ލިބިފައެއް ނުވެ އެވެ.

ވީ ކިހިނެއް؟- ސަދާގެ ބައްޕަ، ސައުދުﷲ އަހުމަދު ހަސަން ބުނިގޮތުގައި މި މައްސަލައިގައި މިހާތަނަށް ނަރުހުންނަށް ވެސް އަދި ޑޮކްޓަރުންނަށް ވެސް އިތުރު ފިޔަވަޅެއް އަޅާފައި ނުވާތީ، އެކަމުގައި ޖިނާއީ ދައުވާ ކުރުމަށް މައްސަލަ ފުލުހުންނަށް ހުށަހަޅާފައިވާ ކަމަށެވެ.

އިހުމާލުވި ކަމަށް ބަލައި، ޑޮކްޓަރުން ވަޒީފާއިން ވަކިކޮށް ގައުމަށް ފޮނުވާލި ނަމަވެސް، މަރުގެ މައްސަލައެއްގައި އެއީ އެންމެ ރަނގަޅު ފިޔަވަޅެއް ކަމަށް ސައުދުﷲ ގަބޫލެއް ނުކުރެ އެވެ.

"އަޅުގަނޑުމެންނަށް މިހާތަނަށް އެނގިފައި އޮތީ މައްސަލަ އަދިވެސް ބަލަމުން ދާ ކަމަށް. އެކަމަކު ނަރުހުންގެ މައްޗަށް ވެސް މިހާތަނަށް އެއްވެސް ފިޔަވަޅެއް އެޅިކަމެއް އެނގިފައެއް ނެތް." އޭނާ ބުންޏެވެ.

ސައުދުﷲ ބުނީ ދަރިފުޅުގެ މަރަށް ހަތަރު މަހަށް ވުރެ ގިނަ ދުވަސްވެފައިވާއިރު، ސިއްހީ ދާއިރާގެ ތެރެއިން އެ މައްސަލައިގައި ދެން އިންސާފު ލިބޭނެ ކަމަށް ގަބޫލު ނުކުރެވޭ ކަމަށެވެ. އިހުމާލުވި މީހުންނަށް ޖިނާއީ ދައުވާ ކުރަން ހުށަހެޅީ އެ ސަބަބާ ހުރެ ކަމަށް އޭނާ ބުންޏެވެ.

އޭނާ އެދެނީ އެ މައްސަލައިގައި ހިމެނޭ ކޮންމެ މީހެއްގެ މައްޗަށް ވެސް ވަކިވަކިން ޖިނާއީ ދައުވާ ކުރުމަށެވެ.

ހުރި ހަމައެކަނި އަންހެން ދަރިފުޅުގެ ހަނދާނުގައި ސައުދުﷲ އާއި އޭނާގެ އަންހެނުން މިހާރު އަންނަނީ، ފުވައްމުލަކުގައި ކްލިނިކެއް ހިންގަމުންނެވެ. އެ މީހުންގެ މަގްސަދަކީ ދަރިފުޅަށް ދިމާވި ފަދަ ކަަމެއް އިތުރު މީހަކަށް ދިމާ ނުވެ، އެންމެ ރަނގަޅު ފަރުވާ ރަށުގައި ހުރެގެން ހޯދުމެވެ.