ހައުސިން މިނިސްޓްރީއަށް ނޭނގި ޖަރީމާ ނުހިންގޭނެ؛ ފިޔަވަޅު އަޅަން ޖެހޭ: އެމްޑީޕީ

މިދިޔަ ސަރުކާރުގައި މާލޭ މީހުންނަށް ގޯތި ދޭން ހިންގި 'ބިންވެރިޔާ' ސްކީމްގައި ނުހިމެނޭ ފަރާތަކަށް ގޯތި ދެވޭނީ ހައުސިން މިނިސްޓްރީއަށް ވެސް އެނގިގެން ކަމަށާއި އެ މިނިސްޓްރީއަށް ނޭނގި އެކަން ނުކުރެވޭނެ ކަމަށް މިިދިޔަ ސަރުކާރުގެ ހައުސިންގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވެއްޖެ އެވެ.

ވީ ކިހިނެއް؟ - މިދިޔަ ސަރުކާރުގައި މާލޭ މީހުންނަށް ގޯތި ދޭން ހިންގި 'ބިންވެރިޔާ' ސްކީމްގެ ލިސްޓުގައި ނަން ވެސް ނެތި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލްގެ އެއްބަނޑު އެއްބަފާ ބޭބެއަށް ހުޅުމާލެއިން ގޯއްޗެއް ދިން ކަމަށް ބުނާ މައްސަލައެއް އިއްޔެ ވަނީ ފެންމަތިވެފަ އެވެ.

އެ މައްސަލައާ ގުޅޭ ގޮތުން އެމްޑީޕީން މިއަދު ވަނީ އެ ޕާޓީގެ އޮފީހުގައި ނޫސް ކޮންފަރެންސެއް ބާއްވާފަ އެވެ. އެ ނޫސް ކޮންފަރެންސްގައި ވާހަކަ ދައްކަވަމުން އަކްރަމް ވިދާޅުވީ އެ މައްސަލައިގައި މިހާރުގެ ހައުސިން މިނިސްޓަރު ޑރ. އަލީ ހައިދަރު ވެސް ސަސްޕެންޑްކޮށް، ފިޔަވަޅު އަޅަން ޖެހޭ ކަމަށެވެ.

ބުނީ ކީކޭ؟ - "ހައުސިން މިނިސްޓްރީން މިކަން ހިންގެވިއިރު ހައުސިން މިނިސްޓްރީއަށް ސީދާ އެނގިވަޑައިގަންނަވާނެ ހުރިހާ ތަފްސީލެއް. އެ ނޭނގޭނެ އެޗްޑީސީއަކަށެއް. މިދެންނެވި ޕްލޮޓްތަކުގެ ނަމްބަރުތަކާއި އެއްޗެއްސެއް ހުސްކޮށް ހުރި ޕްލޮޓްތަކުގެ. އެ މައުލޫމާތު ހައުސިން މިނިސްޓްރީން ޝެއާ ނުކުރަންޏާ އެޗްޑީސީއަކަށް އެ މައުލޫމާތެއް ނޭނގޭނެ،" އަކްރަމް ވިދާޅުވި އެވެ.

"މީގައި ހައުސިން މިނިސްޓްރީގެ ވަރަށް ބޮޑު އިސް ރޯލެއް އެބައޮތް. މިކަމުގައި ހައިދަރު އިސްތިއުފާއަށް އަޅުގަނޑު ގޮވާލަން. ވަގުތުން ވަގުތަށް ރައީސް ޖެހޭނެ އޭނަ ސަސްޕެންޑްކުރައްވަން ވެސް މި މައްސަލަ ބަލާ ނިމެންދެން."

އެ ނޫސް ކޮންފަރެންސްގައި ބައިވެރިވެވަޑައިގެންނެވި ކުރީގެ ހައުސިން ކޮމެޓީގެ މެންބަރު މުހައްމަދު އާރިފް ވިދާޅުވީ ބިންވެރިޔާ ސްކީމް ހިންގީ ވަރަށް ބޮޑަށް ރައްކާތެރި ކުރެވިފައިވާ ނިޒާމެއްގެ ދަށުން ކަމަށެވެ. 

"އަޅުގަނޑުމެން ހައުސިން މިނިސްޓްރީން ގޯތި ދޭ ފަރާތްތައް ކަނޑައަޅައި ގޯތި ހަވާލުކޮށްފައި ފްލެޓު ހަވާލުކޮށްފައި އެޗްޑީސީއަށް ފޮނުވާނީ ލިސްޓެއް. އަޅުގަނޑުމެން ފޮނުވީ އީމޭލް ޒަރީއާއިންނާއި ޖެމްސްގެ ޒަރީއާއިން ލެޓާއަކާ އެއްކޮށް. އެގޮތަށް ފޮނުވީމައި އެޗްޑީސީ އާއި އަޅުގަނޑުމެން އޭރުގައި ހިންގާފައި އޮތް ކޮމިއުނިކޭޝަންއަކީ އަޅުގަނޑުމެން ގޯތި ހަވާލުކުރާނަމޭ. ދެން އެ ހުންނަ ބައި އެޗްޑީސީގައި އެ އޮންނަ ނޯމަލް ޕްރޮސީޖާގެ ތެރެއިން އިމާރާތްކުރުމާއި އިންފާރު ކުރުމާއި މިކަން ކަމަށް ދޭން ޖެހޭ ހުއްދަތައް ދޭށޭ. އެޗްޑީސީއާ ހިސާބުންނޭ ދެން ހުރި މަސައްކަތްތައް ކުރިއަށް ދާނީ،" މިދިޔަ ސަރުކާރުގައި އެ ސްކީމްގެ ދަށުން ގޯތި ދޫކުރި ގޮތުގެ ތަފްސީލް ވިދާޅުވެދެއްވަމުން އާރިފް ވިދާޅުވި އެވެ.

"އެގޮތަށް އަޅުގަނޑުމެން ރަޖީސްޓްރީ ދޫކޮށްފަައި ބިން ހަވާލުކުރީމަ ބައެއް ފަރާތްތަކުން ވަރަށް އަވަހަށް އެޗްޑީސީއަށް ޕޯޓަލް ތެރެއިން އިން ވަކިކުރަން އެޕްލައި ކުރޭ. އެޕްލައި ކުރީމައި އެޗްޑީސީން އެބަ ޖަވާބު ދޭ އަދި ހައުސިން މިނިސްޓްރީއަކުން ނެތޭ ތިޔަ ފަރާތަަށް ގޯއްޗެއް ލިބުނު ކަމެއް އަންގާފައެއް. މާނަ އަކީ އަޅުގަނޑުމެން ލިސްޓު ނުފޮނުވަންޏާ އެޗްޑީސީއަކުން މީގެ ކުރިއަކުން ނެތޭ ހުއްދަ ދީފައެއް. އެ ފަރާތަކުން ރަޖިސްޓްރީގެ ފޭކުވިޔަސް، އޮރިޖިނަލް ވިޔަސް އެ ޕޯޓަލް ތެރެއިން ލައިގެން ހުއްދައެއް ނުދޭ."

އާރިފް ވިދާޅުވީ މީގެ ކުރިން ގޯތި ދޭއިރު ކުދިކުދި މައްސަލަތައް ދިމާވެގެން ބައެއް ގޯތިތައް ހޯލްޑްކޮށްފައި ހުންނާނެ ކަމަށެވެ. އެގޮތުން، މިހާރު ފެންމަތިވެފައިވާ މައްސަލައިގައި ގޯތި ދޫކޮށްފައިވަނީ އެގޮތަށް ހޯލްޑްކޮށްފައި އިން ދެ ޕްލޮޓެއްކަން އޭނާ ފާހަގަކުރެއްވި އެވެ.

"މާނަ އަކީ ފޭކު ރަޖިސްޓްރީއެއް ހަދާ ފަރާތަކަށް ވެސް ހައުސިން މިނިސްޓްރީން ނޫން ތަނަކުން ޕްލޮޓް ނަމްބަރެއް ނުލިބޭނެ،" އާރިފް ވިދާޅުވި އެވެ.

ހައުސިން މިނިސްޓްރީން އެގޮތަށް ހޯލްޑްކޮށްފައި ހުރި ޕްލޮޓްތަކުގެ މައުލޫމާތު އެ މައުލުމާތު ފޯޖްކުރި ފަރާތަކަށް އެނގުނު ގޮތެއް ވެސް އޮންނަން ޖެހޭނެ ކަމަށާއި، އެޗްޑީސީން ކުރިން އަމަލު ކުރި ގޮތް ނޫން ގޮތަކަށް އަމަލުކޮށް، ގޯތި ނުލިބޭ ފަރާތަކަށް އިންފާރު ވަކި ކުރުމުގެ ހުއްދަ ދިން ސަބަބެއް ބަލަން ޖެހޭ ކަމަށް އޭނާ ވިދާޅުވި އެވެ.

އެނގުން މުހިންމު - އެ މައްސަލައާ ގުޅިގެން އެޗްޑީސީގެ ޗެއާމަން އަހުމަދު ނާސިފް ފިޔަވައި އެހެން ހުރިހާ ބޯޑު މެމްބަރުން ވެސް މިއަދު ވަނީ ސަސްޕެންޑްކޮށްފަ އެވެ. އޭގެ ތެރޭގައި ފަޒުލް ވެސް ހިމެނިވަޑައިގަންނަވަ އެވެ.