އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ފޮޓޯ/އެކްސް)
އެކްސްގައި ޕޯސްޓެއް ކޮށްގެން އެމްޑީޕީގެ އެކްޓިވިސްޓަކު ފުލުހަށް ހާޒިރުކުރަނީ
'ބިރުވެރިކަން އުފެދޭ ގޮތަށް' ސޯޝަލް މީޑިއާގައި ޕޯސްޓެއް ކުރި މައްސަލާގައި އިދިކޮޅު އެމްޑީޕީގެ އެކްޓިވިސްޓަކު ފުލުހަށް ހާޒިރުވާން އަންގައިފި އެވެ.
ވީ ކިހިނެއް؟ - އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އެ ޕާޓީގެ އެކްޓިވިސްޓް ހުސެން ޝާފިއު ފުލުހަށް ހާޒިރުވާން އެންގި ޗިޓު 'އެކްސް'ގައި ޕޯސްޓު ކުރައްވައިފަ އެވެ.
ތަފްސީލް - އެ ޗިޓުގައި އަންގާފައިވަނީ އަންނަ މާދަމާ 1:30އަށް ފުލުސް އޮފީހަށް ހާޒިރުވުމަ އަށެވެ. ބަލަމުން ދާ މައްސަލައަކީ @ޗާލީ_ތުއްތު ހޭންޑްލްއިން ހަޑި ހުތުރު ބަސް ބޭނުންކޮށް 'ބިރުވެރިކަން އުފެދޭ ގޮތަށް' އެކްސްގައި ކުރި ޕޯސްޓެވެ.
ފައްޔާޒު ވަނީ އެގޮތަށް ފުލުހަށް ހާޒިރުކުރާތީ ފާޑުވިދާޅުވެފަ އެވެ. އޭނާ ވިދާޅުވީ ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށެވެ.
"ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" ފައްޔާޒުގެ ޕޯސްޓުގައި ވިދާޅުވި އެވެ.
ކޮމެންޓް (1)
ޒަރީރު