އިޒްރޭލް ހުއްޓުވަން މުޅި ދުނިޔެ އެކަތިގަނޑަކަށް ވާން ރައީސް ގޮވާލައްވައިފި

ބައިނަލްއަގުވާމީ ގޮތުން ފަލަސްތީނު ރައްޔިތުންގެ ހައްގުގައި އެއްބައިވަންތަވެ ތިބޭ ދުވަހުގެ މުނާސަބަތުގައި އިޒްރޭލް ހުއްޓުވަން މުޅި ދުނިޔެ އެކަތިގަނޑަކަށް ވުމަށް ރައީސް މުހައްމަދު މުއިއްޒު މިއަދު ގޮވާލައްވައިފި އެވެ.

ވީ ކިހިނެއް؟ - ރާއްޖޭން އަބަދު ވެސް އޮންނާނީ ފަލަސްތީނާ އެކުގައި ކަމުގެ ޔަގީންކަން އަނެއްކާވެސް ދެއްވުމަށް ރައީސް މިއަދު ވަނީ 'އެކްސް'ގައި ޕޯސްޓެއް ކުރައްވާފަ އެވެ. އެ މަނިކުފާނު މިކަން ތަކުރާރު ކުރެއްވީ، ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގުވާމީ ދުވަހުގެ މުނާސަބަތާ ގުޅިގެން ދެއްވި ހާއްސަ މެސެޖުގަ އެވެ.

ބުނީ ކީކޭ؟ - "އިންސާފު ލިބުމަށާއި ސުލްހަވެރިކަމާ އެކު ދިރިއުޅުމުގެ ހައްގު ހޯދުމަށް ފަލަސްތީނުން ކުރަމުންދާ މަސައްކަތުގައި ރާއްޖެއިން ދެމިއޮންނާނެ ކަމުގެ ޔަގީންކަން އަރުވަން،" ރައީސް ލިޔުއްވާފައިވެ އެވެ.

ބައިނަލްއަގުވާމީ ގާނޫނުތަކާ ހިލާފަށް އިޒްރޭލުން ފަލަަސްތީނުގެ ބިންތަކަށް ވެރިވެގަނެ ހިންގާ ޖަރީމާތައް ހުއްޓުވުމަށާއި އެ ކަމަށް ޒިންމާވާން ޖެހޭ ވެރިން ޖަވާބުދާރީކުރުވުމަށް ގައުމުތަކަށް ލިބިފައިވާ ސިޔާސީ އަދި އިގުތިސޯދީ ބާރުތައް ބޭނުން ކުރުމަށް ރައީސް ގޮވާލެއްވި އެވެ.

"ބައިނަލްއަގުވާމީ މުޖުތަމައު އެކަތިގަނޑަކަށްވެ، އިޒްރޭލުގެ ގައިރު ގާނޫނީ ބާރުތައް ވަގުތުން ހުއްޓުވައި ހަނގުރާމައިގެ ޖަރީމާތައް ހިންގުމުގައި ޒިންމާވާ ފަރާތްތައް ޖަވާބުދާރީ ކުރުވުމަށް ގޮވާލަން،" އެ މަނިކުފާނު ވިދާޅުވި އެވެ.

ކޮންމެ ދިވެއްސަކަށް ވެސް، ފަލަސްތީނު މީހުން ތަހައްމަލުކުރަމުންދާ ކަންކަމަކީ އެ ދިވެއްސެއްގެ އިހުސާސް ކަމުގައި ރައީސް ސިފަކުރެއްވި އެވެ.

ފަލަސްތީނަކީ މިނިވަން ދައުލަތެއްގެ ގޮތުގައި ކަނޑައަޅައި އިރުމަތީ ގުދުސްއަކީ ފަލަސްތީނުގެ ވެރިރަށް ގޮތުގައި ބަލައިގަނެ، 1967ގައި އދ.އިން ކަނޑައެޅި ބޯޑަރުތަކާ އެއް ގޮތަށް އަމަލުކުރުމަށް ރާއްޖޭން ގޮވާލާ ގޮވާލުން ރައީސް ތަކުރާރުކުރެއްވި އެވެ.