ޔާމީން މުނައްވަރަށް ގޮވާލެއްވީ ހަގީގަތާ ކުރިމަތިލައި ލަފާ ދެއްވުމަށް

ދައުލަތުގެ މާލީ ސިޔާސަތުތައް ވަރުގަދަކުރުމަށް ސަރުކާރަށް ލަފާ އަރުވަން ހުންނެވި އެންމެ އިސް މުޝީރަކީ އެމްއެމްއޭގެ ގަވަނަރު ކަމަށާއި ހަގީގަތާ އެއް ގޮތަށް ލަފާ ދެއްވަން ޖެހޭ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.

ވީކިހިނެއް؟ - ޑޮލަރުން އާމްދަނީ ލިބޭ ވިޔަފާރިތަކުން ބޭންކަށް މާރުކުރަން މަޖުބޫރުވާ ގޮތަށް ގަވާއިދެއް އެކުލަވާލި އެވެ. ގަވާއިދުގައިވާ ގިނަ ކަންކަން ހިމަނައިގެން ފޮރެކްސް ގާނޫނެއް އެކުލަވާލަން ވެސް އެމްއެމްއޭން ނިންމި އެވެ.

އެމްއެމްއޭގެ ގަވަނަރު އަހުމަދު މުނައްވަރު މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ދަރަނި މެނޭޖުކުރަން ރިޒާވުގައި ޑޮލަރު ހުންނަ ވަރު އިތުރުވާން ޖެހޭ ކަމަށާއި އެ ފިޔަވަޅުތަކަކީ އެ ބޭނުމުގައި އަޅާ ފިޔަވަޅުތަކެއް ކަމަށެވެ.

ބުނީ ކީކޭ؟ - ސަރުކާރާ އިދިކޮޅު ޕާޓީއެއް ގޮތުގައި ހަރަކާތްތެރިވާ ޕީއެންއެފުން އެ ޕާޓީގެ އޮފީހުގައި ރޭ ބޭއްވި ޖަލްސާއެއްގައި އެ ޕާޓީގެ ލީޑަރު ޔާމީން ވިދާޅުވީ ރިޒާވު ރަނގަޅު ކުރުމަށް ފުރަތަމަ ދައުލަތުގެ ތެރެއިން ރަނގަޅު ކުރަން ޖެހޭ ކަންކަން އެބަ ހުރި ކަމަށެވެ.

އެއް ކަމަކަށް އެ މަނިކުފާނު ފާހަގަ ކުރެއްވީ ތެލަށް ކުރާ އިސްރާފެވެ. ތެލަށް  ފައިސާ ދެއްކުމުގައި ވެސް ކޮރަޕްޝަނާއި އިސްރާފު ގިނަ ކަމަށް އެ މަނިކުފާނު ތުހުމަތު ކުރެއްވި އެެވެ.

"ދުނިޔޭގެ ބާޒާރުގައި ތެލުގެ އަގު ދަނީ ވެއްޓެމުން. އިންތިހާއަށް ދަށަށް ދާ ވަގުތަކު އެ ބުނަނީ ތެޔޮ ބިލްތަކަށް ދައްކާ ވަރު ބޮޑުވަމުންދާ ކަމަށް. މި ކަންކަން ހަމައަަކަށް ނޭޅުވޭ. ރައްޔިތުންގެ ފައިސާއޭ މި ހޭދަވަނީ،" ޔާމީން ވިދާޅުވި އެވެ.

އެމްއެމްއޭގެ ގަވަރުނަރުގެ ހައިސިއްޔަތުން ޑޮލަރުން ކުރާ އެފަދަ ބޭކާރު ހަރަދުތައް ކުޑަކުރުމަށް ވެސް މުނައްވަރު ލަފާ ދެއްވަން ޖެހޭނެ ކަމަށް ޔާމީން ވިދާޅުވި އެވެ. ހަގީގަތާ އެއް ގޮތަށް ލަފާ ދެއްވުމަށް އެ މަނިކުފާނު ގޮވާލެއްވި އެވެ.

"ދައުލަތުގެ މާލީ ސިޔާސަތުތައް ވަރުގަދަ ކުރުމަށް ލަފާ ދެއްވަން ހުންނަވާ މުޝީރަކީ ގަވަނަރު. މުނައްވަރަށް އެނގިވަޑައިގަންނަވާނެ ޑޮލަރުން ވެސް އިސްރާފުކުރާތީވެ ރިޒާވުގައި ޑޮލަރު މަދުވެގެން މި އުޅެނީ. އެއީ ކަން ބަލަންވީ ކަންކަން،" ޔާމީން ވިދާޅުވި އެވެ.

އެނގުން މުހިންމު - މިދިޔަ 1 އޮކްޓޯބަރުގައި އެމްްއެމްއޭން ނެރުނު ގަވާއިދުގެ ދަށުން ރިސޯޓުތަކުންނާއި 50 ކޮޓަރިއަށް ވުރެ ގިނަ ކޮޓަރި ހިމެނޭ ގެސްޓްހައުސްތަކުން ކޮންމެ ޓޫރިސްޓަކަށް 500 ޑޮލަރުގެ މަގުން މާރުކުރަން ޖެހެ އެވެ.

އެމްއެމްއޭން އެ އުސޫލުތައް ގާނޫނެއްގައި ހިމެނުމުގެ މަގުސަދުގައި އެކުލަވާލި ބިލުގައި ގެސްޓްހައުސްތަކަށް ލުޔެއްދީ، ކޮންމެ ގެސްޓްހައުސަކުން ބޮލަކަށް 25 ޑޮލަރުގެ މަގުން މާރުކުރަން ޖެހޭ ގޮތަށް ހިމަނާފައިވެ އެވެ.

ރިސޯޓު ހިންގާ ގިނަ އަދަދެއްގެ ވިޔަފާރިތަކުން ދަނީ އެ އަދަދަށް މާރުކުރަން ދަތިވާނެ ކަމަށް ސަރުކާރަށް އަންގަމުންނެވެ. ނަމަވެސް އެ އަދަދަށް ޑޮލަރު މާރުކުރަން ޖެހޭނެ ކަމަށް ރައީސް މުހައްމަދު މުއިއްޒު ވެސް ވަނީ ވިދާޅުވެފަ އެވެ.