ބިދޭސީންގެ މައްސަލަތަކުގައި ނަހަމަ ގޮތުގައި ފައިސާ ނެގި އިމިގްރޭޝަންގެ ފަސް މުވައްޒަފެއްގެ މައްސަލަ ބަލަނީ

ބިދޭސީންނާ ގުޅުން ހުރި ކަންތައްތަކެއް ކޮށް ނަހަމަ ގޮތުގައި ފައިސާ ހޯދިކަމުގެ ތުހުމަތުގައި އިމިގްރޭޝަންގެ ފަސް މުވައްޒަފެއްގެ ތަހުގީގެއް ފަށައިފި އެވެ.

ވީ ކިހިނެއް؟ - ހޯމް މިނިސްޓަރު އަލީ އިހްސާން މިރޭ އެކްސްގައި ކުރެއްވި ޕޯސްޓެއްގައި ވަނީ އެ މައްސަލަ ބަލަމުން އަންނަ ކަމަށް ވިދާޅުވެފަ އެވެ.

ތަފްސީލް - އެ މައްސަލައާ ގުޅޭ ގޮތުން އިހްސާން ވިދާޅުވީ އެ މީހުންގެ މައުލޫމާތު ލިބުމާ އެކު ފުލުހުން މެދުވެރިކޮށް ތަހުގީގު ފަށާފައިވާ ކަމަށެވެ.

"ޔުނިފޯމު އެޅި މުއައްސަސާތަކުގެ ތެރޭގައި ތިބެ ޔުނިފޯމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރު ގެއްލުވަމުންދާ ފަރާތްތަކާ ދޭތެރޭ ގާނޫނީ ގޮތުން އެޅޭ އެންމެ ހަރުކަށި ފިޔަވަޅު އެޅުމަކީ ރައީސުލްޖުމްހޫރިއްޔާ އަޅުގަނޑަށް އަންގަވާފައިވާ ކަމެއް،" އިހުސާން ވިދާޅުވި އެވެ.

އެކަމަކު އެ މުވައްޒަފުން މިހާރު ތިބީ މަސައްކަތުން އެކަހެރިކޮށްފައި ކަމެއް ނުވަތަ ނޫން ކަމެއް އެ ޕޯސްޓްގައި ލިއުއްވާފައެއް ނުވެ އެވެ. ވިދާޅުވީ ތަހުގީގު ކުރިއަށް ދާ ވަރަކަށް ކަމާ ބެހޭ އިދާރާތަކުން ތަފްސީލު ހާމަކުރާނެ ކަމަށެވެ.

އެނގުން މުހިންމު - ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދައި ފޮނުވާލުމުގެ އޮޕަރޭޝަނެއް މި ސަރުކާރުން އަންނަނީ ހިންގަމުންނެވެ. އެ އޮޕަރޭޝަންގައި އަތުލައިގަނެވޭ މީހުންގެ ތެރެއިން އެތައް ހާސް ބަޔަކު މިހާރު ވެސް ވަނީ އަނބުރާ ގައުމަށް ފޮނުވާލައިފަ އެވެ.