ކުޑަކުދިންގެ ދުވަހުގެ މުނާސަބަތުގައި ހުޅުމާލެ ސެންޓްރަލް ޕާކުގައި އޮތް ހަރަކާތެއް: ކުޑަކުދިންގެ ހައްގުތައް ރައްކާތެރިކުރަން ގާނޫނުގައި ގިނަ ފިޔަވަޅުތަކެއް ހިމެނޭ
ކުޑަކުދިންގެ ކަރާމާތަށް އުނިކަން އަންނަ ގޮތަށް މައުލޫމާތު ހާމަނުކުރަން ފުލުހުން އެދިއްޖެ
ކުޑަކުދިންގެ ކަރާމާތަށް އުނިކަން އަންނަ މައުލޫމާތު ބައެއް މީޑިއާތަކުން ހާމަކުރާތީ އެކަން ނުކުރަން ފުލުހުން މިއަދު އިލްތިމާސްކޮށްފި އެވެ.
ވީ ކިހިނެއް؟ - ފުލުހުން ނެރުނު ނޫސްބަޔާނެއްގައި ބުނީ ކުޑަކުދިންގެ ކަރާމާތާއި ރައްކާތެރިކަމަށް އުނިކަން އަންނަ ފަދަ ގޮތަކަށް އެކުދިންގެ މައުލޫމާތާއި ތަސްވީރުތައް އާންމުކުރާތީ ކަންބޮޑުވާ ކަމަށެވެ.
ތަފްސީލް - އެ ނޫސް ބަޔާނުގައި ފުލުހުން ބުނީ:
-
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކުޑަކުދިންގެ ކަރާމާތަށް އުނިކަން އަންނަ ގޮތަށް އެކުދިންގެ ޒާތީ މައުލޫމާތު އެއްވެސް ފަރާތަކުން ހާމަކޮށްގެން ނުވާނެ ކަން ސާފުކޮށް ބަޔާންކޮށްފައިވާ ކަމަށް
-
ނަމަވެސް ބައެއް މީޑިއާތަކުން އެއާ ހިލާފަށް ކުދިންގެ މައުލޫމާތާއި ފޮޓޯ ހާމަކުރޭ
-
އޭގެ ސަބަބުން ކުދިންގެ މަސްލަހަތު ރައްކާތެރިނުކުރެވި ކުއްޖާ ނުރައްކަލަކަށް ހުށަހެޅިދާނެ ކަމަށް ފުލުހުން ދެކޭ ކަމަށް
-
ހާއްސަކޮށް ކުޑަކުދިންގެ ފޮޓޯ ސޯޝަލް މީޑިއާގައި ދައުރުކުރުމަކީ ނަފްސާނީ އަދި ޖިސްމާނީ ދުޅަހެޔޮ ކަމަށް ނޭދެވޭ އަސަރުކޮށްފާނެ ކަމެއް
-
އެކަމުގެ ސަބަބުން ކުޑަކުދިން އެކި ބާވަތުގެ އަނިޔާތަކަށް ހުށަހެޅުމުގެ ފުރުސަތު އިތުުރުވެގެންދާނެ
"ކަން މިހެން އޮތް ހިނދު، ކުޑަކުދިންގެ މައުލޫމާތު އާންމުކުރާއިރު އެ ކުދިންގެ ކަރާމާތާއި ރައްކާތެރިކަން ނެގެހެއްޓުމަށް ހާއްސަ ސަމާލުކަމެއް ދިނުމަށާއި ކުޑަކުދިންގެ ފޮޓޯތަކާއި އެހެނިހެން ޒާތީ މައުލޫމާތު މީސްމީޑިއާގަ އާއި އެހެނިހެން މީޑިއާގެ ވަސީލަތްތަކުގައި ޝާއިއު ނުކުރުމަށާއި ކުޑަކުދިންނާ ގުޅޭ މައުލޫމާތު ހާމަކުރުމުގައި ގާނޫނީ އިމުގެ ތެރެއިން އަމަލުކުރުމަށް މީޑިއާތަކާއި އާންމު ރައްޔިތުންނަށް ދިވެހި ފުލުހުންގެ ޚިދުމަތުން އިލްތިމާސްކުރަމެވެ،" ފުލުހުންގެ ބަޔާނުގައި ބުންޏެވެ.
ކޮމެންޓް