ގާނޫނުއަސާސީ ބަދަލު ކުރީ ރައީސްގެ އިތުބާުރު ނެތްކަމުގެ ވޯޓެއް ނަގާފާނެތީ: އިމްތިޔާޒް

އިންތިހާބުވާ ސިޔާސީ ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހު ކުރީ ރައީސް މުހައްމަދު މުއިއްޒުގެ އިތުބާރުނެތް ކަމުގެ ވޯޓެއް މަޖިލީހުގެ ތެރެއިން ނަގައިފާނެތީ ކަމަށް އިދިކޮޅު ޑިމޮކްރެޓްސްގެ ތަރުޖަމާނު އިމްތިޔާޒް ފަހުމީ ރޭ ވިދާޅުވެއްޖެ އެވެ.

ވީ ކިހިނެއް؟ - އިމްތިޔާޒް މިހެން ވިދާޅުވީ އެ ޕާޓީން ރޭ ބޮނޑިބަތް ޕާކުގައި ބޭއްވި ކަންމަތީ ޖަލްސާގައި ވާހަކަ ދައްކަވަމުންނެވެ. އެ ޕާޓީގެ ކަންމަތީ ޖަލްސާ ކޮންމެ ހަފްތާ އަކު ބާއްވަން ވަނީ ނިންމައިފަ އެވެ.

ބުނީ ކީކޭ؟ - "ގާނޫނުއަސާސީއަށް އެގެނައި ބަދަލު ނިކަން ބައްލަވާލައްވާ، ރައީސުލްޖުމްހޫރިއްޔާ ބިރުފުޅުންކަމެއް އަޅުގަނޑަކަށް ނޭނގޭ އިތުބާރުނެތް ކަމުގެ ވޯޓެއް ނަންގަވާފާނެ ކަމަށްޓަކައި. ރައީސްގެ އިތުބާރު ނެތްކަމުގެ ވޯޓެއް ނަގަން މިސާލަކަށް ޕީއެންސީގެ މެންބަރުން ވެސް ދޭތެރެއަކުން ވާހަކަފުޅު ދައްކަވާނެ، ހުންނަ ހިތްހަމަނުޖެހުންތަކުގެ ވާހަކަ. ފަހަރުގައި ވެދާނެ އެއިން ކަމެއް ކުރައްވާއިރުގައި ސޮއި ހަމަކުރަމުންދާ އިރު އެ ބޭފުޅުންގެ ސޮއި އަޅަން ތައްޔާރަށް ތިއްބެވީ ކަމަށް،" އިމްތިޔާޒު ވިދާޅުވި އެވެ.

"އެކަމަށްޓަކައި ރައީސުލްޖުމްހޫރިއްޔާ އެއިން ސޮއެއް އަޅާ ކޮންމެ މީހަކު ޕާޓީން ކަނޑާލާ ކަނޑާލުމަށް ފަހު ގޮނޑި ގެއްލޭނެ ގޮތް އެ ހެއްދެވީ. ގާނޫނުއަސާސީ އެފުށް މިފުށަން މިޖަހަނީ. މިވާގޮތުން ރައީސްގެ އިތުބާރެއް ނެތްކަމަށް ނެގޭނެ ގޮތެއް ނޯންނާނެ. އެކަމަށް އޮންނަ އުސޫލުތައް ފުނޑާލާ ގާނޫނުއަސާސީ ތަރުތީބުކޮށްފައި ހުރި ގޮތްތައް ފުނޑާލަމުން އެ ގެންދަނީ،" އިމްތިޔާޒް ވިދާޅުވި އެވެ.

އިމްތިޔާޒް ވިދާޅުވީ އެއީ ގަބޫލުކުރެވޭނެ ކަންތައްތަކެއް ނޫން ކަމަށާއި ރައްޔިތުން ރައީސާ މެދު ހިތްހަމަނުޖެހިއްޖެ ނަމަ އިތުބާރުނެތް ކަމުގެ ވޯޓެއް ނެގޭނެ ގޮތް ގާނޫނުއަސާސީގައި ވަރަށް ރަނގަޅަށް ތަރުތީބު ކުރެވިފައިވާ ކަމަށެވެ.

"އެ ގޮތް އެ މުގުރާލެއްވީ ގާނޫނުއަސާސީއަށް އެގެނައި ބަދަލާ އެކުގައި. މިއީކީ އަޅުގަނޑުމެން ޑިމޮކްރެޓްސް ވެސް ގަބޫލުކުރާނެ ގޮތެއް ނޫން އަދި ދިވެހިރާއްޖޭގެ އެއްވެސް ރައްޔިތަކު ގަބޫލުކުރާނެ ގޮތެއް ނޫން،"

ބާރުވެރިކަން ފެށިގެން އަންނަނީ ރައްޔިތުންގެ ކިބައިން ކަމަށް އަދި އެ ބާރުތައް ދެމި އޮންނަނީ ވެސް ރައްޔިތުންގެ ކިބައިން ކަމަށް އިމްތިޔާޒު ވިދާޅުވި އެވެ. އަދި ގާނޫނުއަސާސީ ދަންނަ މައްފޫމަކީ އެއީ ކަމަށް އޭނާ ވިދާޅުވި އެވެ. ނަމަވެސް ގާނޫނުއަސާސީއަށް އެ ގެނައި އިސްލާހާ އެކު އެ ބާރުތައް މިހާރު ރައީސްގެ މުށުތެރެއަށް ޖަމާކުރައްވާފައިވާ ކަމަށް އޭނާ ވިދާޅުވި އެވެ.

އިމްތިޔާޒް ވަނީ އެ ބާރުތައް ހޯދަން މަގުމައްޗަށް ނުކުންނަން ޖެހިއްޖެ ނަމަ އެކަން ކުރަން ވެސް އެ ޕާޓީން ތައްޔާރަށް އޮންނާނެ ކަމަށް ވިދާޅުވެފަ އެވެ.

"އިރާދަކުރެއްވިޔާ ދިވެހިރާއްޖޭގެ ރައްޔިތުންގެ ބާރުވެރިކަން އަނބުރާ ދިވެހި ރައްޔިތުންނަށް ހޯދޭނެ، ހޯދާނަން، ހޯދެންޖެހޭނެ." ވާހަކަ ނިންމާލަމުން އިމްތިޔާޒް ވިދާޅުވި އެވެ.

އެނގުން މުހިންމު - މި މަހު 20ގައި ގާނޫނުއަސާސީ އިސްލާހު ކުރުމުގެ މަސައްކަތް ކުރީ އަވަސް އަރުވާލައިގެން އެއް ދުވަހުގެ ތެރޭގަ އެވެ. އަދި މިިދިޔަ އާދިއްތަ ދުވަހު އެ ބަދަލުތައް ބާތިލުކުރަން ގާނޫނީ ވަކީލު އަދި ރައްޔިތުންގެ މަޖިލީހުގެ ކުރީގެ މެންބަރު އަލީ ހުސައިން ސުޕްރީމް ކޯޓަށް މައްސަލައެއް ވަނީ ވައްދައިފަ އެވެ. އެ މައްސަލައާ އިދިކޮޅު އެމްޑީޕީ އަދި ޑިމޮކްރެޓްސް އިން ވަނީ ތަދައްހުލްވެފަ އެވެ.

ގާނޫނުއަސާސީއަށް ގެނައި އިސްލާހުތަކުގައި ގޮނޑި ގެެއްލޭނެ 4 ހާލަތެއް ބަޔާންކޮށްފައިވެ އެވެ. އެއީ:

މިހާރު މި އޮތް 20 ވަނަ މަޖިލީހަށް އަމިއްލަ ގޮތުން ވާދާކުރައްވައި އިންތިހާބުވެވަޑައިގެންނެވި 10 ވަރަކަށް މެންބަރުން ވަނީ އިންތިހާބުގެ ނަތީޖާއަށް ފަހު، މަގާމުގެ ހުވާ ކުރެއްވުމުގެ ކުރިން ޕީއެންސީއަށް ސޮއިކޮށްފަ އެވެ.

ނަމަވެސް، ޕީއެންސީން މި ގެނައި އިސްލާހު ފަރުމާކޮށްފައިވާ ގޮތުން އެ މެންބަރުންގެ ގޮނޑި ނުގެއްލޭނެ އެވެ. އެެއީ، އެ މެންބަރުން ޕާޓީއަށް ސޮއިކުރައްވާފައިވަނީ މަޖިލީހުގެ ދައުރު ފެށުމުގެ ކުރިން ކަމަށް ވާތީ އެވެ.