ޖުލައި 31ގައި ހިނގި ނުރައްކާތެެރި އެކްސިޑެންޓުގައި ހިމެނޭ ރޭސް ކާރުގައި ތިބި މީހުން
އެކްސިޑެންޓަށްފަހު ފިލުން: ކާރު ދުއްވަން އިން އިކްރާމް ކުށަށް އިއުތިރާފުވެ، ދެން ތިބި 2 މީހުން އިންކާރުކޮށްފި
މިދިޔަ 31 ޖުލައިގައި، ހުޅުމާލޭގައި ބާރަށް ދުއްވި ކާރެއް ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި ހިނގި ނުރައްކާތެރި އެކްސިޑެންޓުގެ މައްސަލާގައި ކާރު ދުއްވަން އިން އިބްރާހީމް އިކްރާމް ކުށަށް އިއުތިރާފުވެ، ދެން ތިބި މީހުން އިންކާރުކޮށްފި އެވެ.
ވީކިހިނެއް؟ - ދައުލަތުން އުފުލާފައިވާ ދައުވާތަކަށް ޖަވާބުދާރީވުމަށް މިއަދު ބޭއްވި އަޑުއެހުމުގައި ކުށަށް އިއުތިރާފުވީ އިބްރާހީމް އިކްރާމް އެވެ. ދައުވާތަކަށް އިންކާރުކުރީ އިކްރާމުއްރަހުމާނާއި ޖިނާހު އިސްމާއީލް އެވެ.
ތަފްސީލް - އިކްރާމްގެ ވަކީލު އިބްރާހީމް ޒާހިދު ފުރަތަމަ އެދިވަޑައިގަތީ އިއުތިރާފު އެއްބަސްވުމެއް ހެދުމަށް ޕްރޮސެކިއުޓަ ޖެނެރަލް (ޕީޖީ) އޮފީހާ އެކު މަޝްވަރާކުރުމަށް ފުރުސަތެއް ދީފައި ދައުވާތަކަށް ޖަވާބުދާރީވާ ގޮތަށް ހަމަޖެއްސުމަށެވެ.
ޕީޖީން އެ ކަމަށް އިއުތިރާޒު ނުކުރި ނަމަވެސް މައްސަލަ ބައްލަވާ ގާޒީ އަލީ ނަދީމް އެންގެވީ ދައުވާތަކަށް މިއަދު ޖަވާބުދާރީވުމަށެވެ. ކޮންމެ ގޮތަކަށް ޖަވާބުދާރީވިއަސް އެއްބަސްވުމެއް ޝަރީއަތަށް ހުށަހެޅުމުން އެ ކަމަށް ރިއާޔަތްކުރައްވާނެ ކަމަށް ގާޒީ ވިދާޅުވި އެވެ.
ދައުވާތަކަށް ޖަވާބުދާރީވުމަށް ގާޒީ އެންގެވުމުން އިކްރާމްގެ ފަރާތުން ވެސް ދައުވާތަކަށް އިއުތިރާފުވާ ކަމަށް ދިފާއީ ވަކީލު ޒާހިދު ވިދާޅުވި އެވެ.
ޖިނާހާއި އިކްރާމް ބުނަނީ ފުލުހުންނާ ވާހަކަ ދެއްކި ކަމަށް
ދައުވާތަކަށް އިންކާރު ކުރަމުން އިކްރާމުއްރަހުމާންގެ ވަކީލު މަރިޔަމް ނާޒުލީން ވިދާޅުވީ އެ އެކްސިޑެންޓުގެ ޒިންމާ އިކްރާމުއްރަހުމާން ނަގަން ނުޖެހޭ ކަމަށެވެ. އެގޮތުން:
-
އިކްރާމުއްރަހުމާން ކާރަށް އެރީ ހުޅުމާލެ ދެވަނަ ފިޔަވައްސަށް ދާން ޖެހިގެން ފަސިންޖަރެއް ގޮތުގައިކަން ޖިނާހު ތަހުގީގަށް ދިން ބަޔާނުން އެނގޭނެ ކަމަށް
-
ރިޕޯޓު ނުކުރާ ކަމަށް ދައުލަތުން ތުހުމަތުކުރިއަސް ހާދިސާ ހިނގި ތަނުގައި ތިބި ފުލުހުންތަކަކަށް އިކްރާމުއްރަހުމާން އެކަން އެންގި ކަމަށް
އިކްރާމުއްރަހުމާނަކީ ފަސިންޖަރެއް ކަމަށް ކުރިން ބޭއްވި އަޑުއެހުމެއްގައި ވެސް އޭނާ ބުނެފައިވެ އެވެ.
ދައުވާތަކަށް ޖަވާބުދާރީވަމުން ޖިނާހު ބުނީ ހާދިސާ ހިނގި ތަނުގައި ތިބި ފުލުހުންނާ އޭނާ ވެސް ވާހަކަ ދައްކައި ދެވެން އޮތް އެހީއެއް ދިނުމަށް ވާހަކަ ދައްކާފައިވާ ކަމަށެވެ. އެ ގޮތުން:
-
ބޭސްފަރުވާއަށާއި ސައިކަލަށް ލިބުނު ގެއްލުމަށް އެއްޗެއް ދޭން ޖެހެންޏާ ދޭނެ ކަމަށް އޭރު އެ ތަނުގައި ތިބި ފުލުހުން ކައިރީ ބުނިން
-
އެކަމަކު ފުލުހުން އެންގީ ދެން މި މައްސަލައެއް ގޮތަށް ބަލައި ކުރަން ޖެހޭ ކަންކަން ބަލާނީ ފުލުހުން ކަމަށް ބުނި
-
އެ ތަނުން ދިޔައަސް މައްސަލައެއް ނެތް ކަމަށް ފުލުހުން އިރުޝާދު ދިން ކަމަށް ބުނި؛ އެހެންވެ ކަން ވާންވީ ގޮތުގެ މައުލޫމާތު ސާފުނުވާ ކަމަށް
އޭގެ ރައްދުގައި ދައުލަތުގެ ވަކީލު ފާތިމަތު މީޝާ ވިދާޅުވީ މާލޭން ހުޅުމާލެ ދެވަނަ ފިޔަވައްސަށް ކާރު ދިޔައީ ހުއްދަ ކުރެވިފައިވާ ވަރަށް ވުރެ ބާރު ސްޕީޑުގައިކަން އެނގިހުރެ ހުއްޓުވަން ފަރުދީ ގޮތުން އެއްވެސް މަަސައްކަތެއް ނުކުރާ ކަމަށެވެ.
"ކާރު ހުއްޓުވަން ކުރި އެއްވެސް ކަމެއް ތަހުގީގު މަރުހަލާގައި ވެސް އެއްވެސް ފަރާތަކުން ފާހަގަކޮށްފައެއް ނުވޭ. ތިމާއަށް ކުރެވުނު ކަމަކުން ވިޔަކަސް އިންސާނަކަށް އަނިޔާއެއް ލިބުމުން ދޭން ޖެހޭ އެހީތެރިކަން ދީފައެއް ނުވޭ،" ޕީޖީގެ ވަކީލު މީޝާ ވިދާޅުވި އެވެ.
ކިޔާލަން
-
މަގުމަތީގެ އެކްސިޑެންޓްފަސިންޖަރެއް ކަމަށް ބުނެ ދޫކޮށްލަން އިކްރާމުއްރަހުމާން އެދިއްޖެ
31 އޮކްޓޯބަރު 2024 -
މަގުމަތީގެ އެކްސިޑެންޓްރޭސް ކާރު އެކްސިޑެންޓަށް ފަހު ފިލި މީހުނަށް ދައުވާކޮށްފި
10 އޮކްޓޯބަރު 2024 -
މަގުމަތީގެ އެކްސިޑެންޓްރޭސް ކާރު ދުއްވި އިކުރާމްގެ ބަންދަށް 30 ދުވަސް ޖަހައިފި
6 ސެޕްޓެމްބަރު 2024
ދައުވާތަކުގެ ހުލާސާ - ކާރު ދުއްވަން އިން އިކްރާމް، މ. ލޭންޑްއޮފްގާޑަންގެ މައްޗަށް ހަ ދައުވާއެއް ކޮށްފައިވެ އެވެ. އެއީ:
-
އަނިޔާއެއް ދިނުމުގެ ކުށުގެ ދައުވާ
-
މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުމުގެ ކުށުގެ ދައުވާ
-
މުދަލަށް ގެއްލުން ދިނުމުގެ ކުށުގެ ދެ ދައުވާއެއް
-
އެކްސިޑެންޓްވުމުން އެ ކަމުގެ ރިޕޯޓް ނުކުރުމުގެ ކުށުގެ ދައުވާ
-
އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއް ނެތި އެހީތެރިކަން ފޯރުކޮށްނުދިނުމުގެ ކުށުގެ ދައުވާ
އިކްރާމުއްރަހުމާން، ހ. ނޫރަންމާގެއާގެ މައްޗަށް އުފުލާފައިވާ ދައުވާތަކަކީ:
-
އެކްސިޑެންޓް ވުމުން އެ ކަމުގެ ރިޕޯޓް ނުކުރުމުގެ ކުށުގެ ދައުވާ
-
އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއް ނެތި އެހީތެރިކަން ފޯރުކޮށްނުދިނުމުގެ ކުށުގެ ދައުވާ
-
އަނިޔާއެއް ދިނުމުގައި ބައިވެރިވުމުގެ ކުށުގެ ދައުވާ
-
މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުމުގެ ކުށުގެ ދައުވާ
-
މުދަލަށް ގެއްލުން ދިނުމުގައި ބައިވެރިވުމުގެ ކުށުގެ ދެ ދައުވާއެއް
ދެން ހިމެނޭ ޖިނާހު އިސްމާއީލް، އާޒާދުގެ/ގއ.ކަނޑުހުޅުދޫގެ މައްޗަށް އުފުލާފައިވާ ދައުވާތަކަކީ:
-
އަނިޔާއެއް ދިނުމުގައި ބައިވެރިވުމުގެ ކުށުގެ ދައުވާ
-
މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުމުގެ ކުށުގެ ދައުވާ
-
މުދަލަށް ގެއްލުން ދިނުމުގައި ބައިވެރިވުމުގެ ކުށުގެ ދެ ދައުވާއެއް
އެނގުން މުހިންމު - އެ އެކްސިޑެންޓުގައި ބާރަށް ދުއްވާފައި ދިޔަ ކާރުގައި ތިބި ތިން މީހުންނަކީ ވެސް ކުށުގެ އެކި ރިކޯޑް އޮންނަ މީހުންނެވެ.
އެ ގޮތުން ކާރު ދުއްވަން އިން އިކްރާމަކީ:
-
2022 ވަނަ އަހަރު ގަލޮޅު ދަނޑުގައި ބޭއްވި ޔޯގާ ހަރަކާތާ ދެކޮޅަށް މުޒާހަރާކޮށް ގަލޮޅު ދަނޑަށް ވަދެ ހަމަނުޖެހުން ހިންގި ކަމުގެ ތުހުމަތުގައި ހައްޔަރު ކުރި
-
ބަންދުން ދޫކޮށްލީ މި އަހަރު ފެބްރުއަރީގައި
އިކްރާމުއްރަހުމާނަކީ:
-
އުމުރުން 16 އަހަރުގައި 2015 ވަނަ އަހަރު 16 އަހަރުގެ ޖަލު ހުކުމެއް އައިސްފައިވާ މީހެއް
-
ހައި ކޯޓުން ވެސް ދެމެހެއްޓި އެ ހުކުމުގެ އަދަބު ފަހުން ޖުވެނަލް ކޯޓުން ވަނީ އޭނާ އިސްލާހީ ޕްރޮގްރާމެއްގައި ބައިވެރިވެފައިވުމުން، މައާފްކޮށްދީފައި
ޖިނާހް އިސްމާއީލަކީ:
-
މަސްތުވާތަކެތީގެ މައްސަލައެއްގައި 25 އަހަރުގެ ޖަލު ހުކުމެއްގައި ކުރިން ހުރި މީހެއް
-
2022 ވަަނަ އަަހަރު އޭނާ ބަންދުން ދޫކޮށްލީ ރައީސްއަށް ލިބިދީފައިވާ މާފުދެއްވުމުގެ އިހުތިޔާރުގެ ދަށުން ރައީސް އިބްރާހީމް މުހައްމަދު ސޯލިހު އެ ހުކުމަށް ލުއި ދެއްވުމުން
ފާހަގަކޮށްލެވޭ ކަމެއް - އެކްސިޑެންޓުވި ކާރަކީ މާލެ ޒޯންގައި ދުއްވަން ރަޖިސްޓްރީކޮށްފައިވާ ކާރެއް ވެސް ނޫނެވެ.
ކޮމެންޓް