ޕީއެންސީގެ އެތެރޭގެ މަގާމުތަކަށް މީހުން އިންތިހާބު ކުރުމަށް ވޯޓްލުން މިއަދު ކުރިއަށް ދަނީ: މާލެ ހިމެނޭހެން 90 ރަށުގައި ވޯޓްލުން ކުރިއަށް ގެންދިޔަ (ފޮޓޯ/ޕީއެންސީ)
ޕީއެންސީގެ ބޮޑު އިންތިހާބުގެ ކާމިޔާބަށް ރައީސްގެ މަރުހަބާ އާއި ޝުކުރު
ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ 1،900 އަށް ވުރެ ގިނަ މަގާމަށް މެންބަރުން އިންތިހާބު ކުރުމަށް މިއަދު ބޭއްވި އެ ޕާޓީގެ އެތެރޭގެ އިންތިހާބު ކާމިޔާބު ކަމާ އެކު ނިންމާލުމުގެ އުފަލާ އެކު ރައީސް މުހައްމަދު މުއިއްޒު ޕާޓީގެ މެންބަރުންނަށް މަރުހަބާ ވިދާޅުވެއްޖެ އެވެ.
އެނގުން މުހިންމު - ޕީއެންސީގެ 1،984 މަގާމަކަށް މީހުން އިންތިހާބުކުރުމަށް މިއަދު ހެނދުނު 10 އިން މެންރުދު 2އަށް މާލެ ހިމެނޭ ގޮތުން 90 ރަށެއްގައި ބޭއްވި ވޯޓްލުމަކީ އެ ޕާޓީން ބުނި ގޮތުގައި މިއީ ޕާޓީއެއްގެ އެތެރޭގައި މިހާތަނަށް ބޭއްވި އެންމެ ބޮޑު އިންތިހާބެވެ. އެގޮތުން:
-
ޕާޓީގެ ދާއިރާތަކުގެ ރައީސުންނާއި ނައިބު ރައީސުން އިންތިހާބުކުރި
-
ސްޓިއަރިން ކޮމިޓީތަކަށް ވެސް މެންބަރުން އިންތިހާބު ކުރި
-
ކޮންމެ ރަށެއްގެ ޒުވާނުންގެ ހަރަކާތުގެ ރައީސް އާއި އަންހެނުންގެ ހަރަކާރުގެ ރައީސް އަދި ސިޓީތަކުގެ ކޮންމެ ދާއިރާއަކުން ޒުވާނުންގެ ހަރަކާތުގެ ރައީސް އާއި އަންހެނުން ހަރަކާތުގެ ރައީސުން އިންތިހާބު ކުރާނެ
-
އިންތިހާބަކާ ނުލައި ބައެއް މަގާމުތަކަށް މެންބަރުން ހޮވިފައި ވާތީ ކެންޑިޑޭޓުންގެ އަދަދަކީ 667
-
143 ވޯޓު ފޮށި؛ މާލޭގައި 53 ފޮށި
ބުނީ ކީކޭ؟ - އަމިއްލަ ދަތުރުފުޅެއްގައި އިނގިރޭސިވިލާތުގައި މިވަގުތު ހުންނެވި ރައީސް މުއިއްޒު އެކްސްގައި މިއަދު ކުރެއްވި ޕޯސްޓެއްގައި ވަނީ ކޮންގްރެސް ޕާޓީގެ އެތެރޭގެ އިންތިހާބު ކާމިޔާބު ކުރެއްވި ހުރިހާ ބޭފުޅުންނަށް މަރުހަބާ ވިދާޅުވެފަ އެވެ. އަދި އެ އިންތިހާބު އިންތިޒާމް ކުރުމުގައި ހަރަކާތްތެރިވި އެންމެހާ ފަރާތްތަކަށް އެމަނިކުފާނު ޝުކުރު އަދާކުރެއްވި އެވެ.
"އެކި މަގާމުތަކަށް ވާދަކުރެއްވި ކެންޑިޑޭޓުންނާއި އިންތިހާބުގެ އިންތިޒާމްތަކުގައި އުޅުއްވި ހުރިހާ ބޭފުޅުންނަށް އަދި މި މިއަދު ވޯޓް ލެއްވި ލޮބުވެތި މެންބަރުންނަށް ނުހަނު ލޯތްބާއެކު ޝުކުރު ދަންނަވަން،" ރައީސްގެ މެސެޖުގައިވެ އެވެ.
ފާހަގަކޮށްލެވޭ - މިއަދުގެ އިންތިހާބުގައި އެންމެ ރަށެއްގައި ފިޔަވާ ހަމަނުޖެހުމެއް ހިނގިކަމުގެ ރިޕޯޓެއް ލިބިފައެއް ނުވެ އެވެ. އެގޮތުން ތ. ކަނޑޫދޫގައި ދެ ކެންޑިޑޭޓެއްގެ ދެމެދުގައި މައްސަލަ ހޫނުވެ މާރާމާރީ ހިންގައި ވޯޓް ފޮށި ވަނީ ފަޅާލައި ވޯޓްތަކެއް ގެންގޮސްފަ އެވެ. އެކަމާ ގުޅިގެން އެ ރަށުގެ ވޯޓްލުން އޮތީ ހުއްޓިފަ އެވެ.
ޕީއެންސީން ބުނީ މިއަދުގެ އިންތިހާބަކީ އަމާން އޮމާން އިންތިހާބެއް ކަމަށެވެ. އަދި މިހާ ފުޅާކޮށް ބޭއްވި އިންތިހާބެއް ހަމަނުޖެހުންތަކެއް ނެތި އޮމާންކޮށް ނިންމާލެވުމަކީ ކާމިޔާބެއްގެ ގޮތުގައި އެ ޕާޓީން ފާހަގަކުރި އެވެ.
މިއަދުގެ އިންތިހާބުގައި ވޯޓްލުމުގެ ހައްގު ލިބިގެންވާ ކަމަށް އެ ޕާޓީން ނިންމާފައި ވަނީ 34،904 މީހުންނަށެވެ. އެ ޕާޓީގެ އިލެކްޝަންސް ކޮމިޝަންގެ ދަފްތަރުގައި 65،000އަށް ވުރެ ގިނަ މެންބަރުން ތިބި ކަމަށް އެޕާޓީން ބުނެފައިވެ އެވެ.
ކޮމެންޓް