ޕާޓީ ބަދަލުކުރާ މެމްބަރުން އިސްތިއުފާ ދޭން ޖެހޭ ގާނޫނުގެ މާއްދާތަކެއް ބާތިލުކުރަން ކޯޓަށް

ޕާޓީގެ ޓިކެޓުގައި ރައްޔިތުންގެ މަޖިލީހުގެ މެންބަރުކަމަށް އިންތިހާބުވުމަށް ފަހު ޕާޓީ ބަދަލުކޮށްފި ނަމަ މެންބަރުކަމުން އިސްތިއުފާ ދޭން ޖެހޭ ގޮތަށް ހަދާފައިވާ އެންޓި ޑިފެކްޝަން ގާނޫނުގެ މާއްދާތަކެއް ބާތިލުކުރަން ހައި ކޯޓަށް މައްސަލައެއް ހުށަހަޅައިފި އެވެ.

ވީ ކިހިނެއް؟ - އެންޓި ޑިފެކްޝަން ގާނޫނު ރައީސް މުހައްމަދު މުއިއްޒު ތަސްދީގުކުރެއްވީ މިދިޔަ އޭޕްރީލްގަ އެވެ. އެ ބިލަކީ މަޖިލީހުގެ މެންބަރުން ގަނެވިއްކުން ހުއްޓުވުމުގެ ބޭނުމުގައި އިދިކޮޅު އެމްޑީޕީގެ ފަރާތުން މިދިޔަ ފެބްރުއަރީ މަސް ތެރޭ ހުށަހަޅާފައިވާ ބިލެކެވެ.

އެމްޑީޕީން ބިލު މަޖިލީހަށް ހުށަހެޅިއިރު ޕާޓީ ބަދަލު ކުރާ ހާލަތުގައި ގޮނޑި ގެއްލޭނެ ކަމަށް އެ ބިލުގައި ބުނި ނަމަވެސް މިދިޔަ އޭޕްރީލްގައި އެ ބިލު ފާސްކުރީ ގޮނޑި ގެއްލުމަކީ އިހުތިޔާރީ ކަމަކަށްވާ ގޮތަަށެވެ.

ތަފްސީލް - ހައި ކޯޓުން ބުނި ގޮތުގައި، އެ ގާނޫނުގެ މާއްދާތަކެއް ބާތިލުކުރުމަށް އެދި މައްސަލައެއް ހުށަހަޅާފައިވަނީ އަމިއްލަ ފަރާތަކުން މިއަދުގެ ވަގުތެއްގަ އެވެ. މުހައްމަދު އަނީސް ނަމަކަށް ކިޔާ މީހަކު ހުށަހަޅާފައިވާ އެ މައްސަލާގައި ބާތިލުކުރަން އެދިފައިވަނީ ކޮން މާއްދާތަކެއް ކަމެއް އަދި ކަށަވަރެއް ނުވެ އެވެ. 

މި މައްސަލަ ބަލައިގަތުމާ މެދު ހައި ކޯޓުން އަދި ގޮތެއް ނުނިންމަ އެވެ.

އެނގުން މުހިންމު - މިހާރު އެންޓި ޑިފެކްޝަން ގާނޫނުގައި އޮތް ގޮތުން އިސްތިއުފާ ދޭން ޖެހޭނީ މައިގަނޑު ތިން ހާލަތެއްގަ އެވެ. އެއީ:

އެ ތިން ހާލަތުން ކުރެ ހާލަތެއް މެދުވެރިވެއްޖެ ނަމަ އެ މެންބަރަކު "މެންބަރުކަމުން އިސްތިއުފާ ދޭންވާނެ" ކަމަށް ގާނޫނުގައި ބުނެ އެވެ. އިހުތިޔާރީ ކަމެއްގެ ގޮތުގައި އެ އިިބާރާތް ލިޔެފައި ވާއިރު، އިސްތިއުފާ ނުދީފި ނަމަ އަމަލު ކުރާނެ ގޮތެއް ބަޔާންކޮށްފައެެއް ނުވެ އެވެ.