މާފު ދީގެން ދައުލަތަށް 9 ބިލިއަން ރުފިޔާ ގެއްލިއްޖެ

ދައުލަތަށް ލިބެންޖެހޭ 9 ބިލިއަން ރުފިޔާއަށް މާފުދީ އެއީ ނުލިބޭނެ ފައިސާގެ ގޮތުގައި ކަނޑައަޅާފައިވާ ކަމަށް އޮޑިޓާ ޖެނެރަލްގެ އޮފީހުން ބުނެފި އެވެ.

ވީ ކިހިނެއް؟ - އަންނަ އަހަރަށް ލަފާކުރާ ދައުލަތުގެ ބަޖެޓު ދިރާސާކުރުމަށް ބަޖެޓު ދިރާސާ ކުރާ ކޮމެޓީއަށް މިއަދުވަނީ އޮޑިޓް އޮފީހުގެ އިސްވެރިން ހާޒިރުކޮށްފަ އެވެ.

ތަފްސީލް - އެ ކޮމެޓީގައި އެ އޮފީހުގެ ފަރާތުން ޑިރެކްޓާ ޝާން ދިން ޕްރެޒެންޓޭޝަނެއްގައި ވިދާޅުވީ ދައުލަތަށް ލިބެންޖެހޭ ފައިސާ ބޮޑެތި އަދަދުތަކުން ނުލިބި އެބަހުުރި ކަމަށެވެ. އެގޮތުން މީރާގެ ތަފާސްހިސާބުތަކަށް ބަލާއިރު:

އެގޮތަށް ނުލިބި ހުރި އެތައް ފައިސާއަކަށް ގާނޫނުގެ ތެރެއިން ލުއި ދީފައިވާ ކަމަށްވެސް ވިދާޅުވި އެވެ.

"މިސާލަކަށް ގާނޫނީ ނިޒާމްގެ ތެރެއިން ދައްކަންޖެހޭ ފައިސާ މާފުކޮށްދިނުމާއި ލުއިކޮށްދިނުމާއި ނޫނީ އެ ރީސްޓްރަކްޗާ ކުރުމުގެ ތެރެއިން ވެސް ކޮންމެސް ސަބަބަކާހުރެ އެ ފައިސާ ވޭވްއަޕްކޮށްގެން މިދާ ދިއުން،"

"މިކަމުގެ ސަބަބުން ބަޖެޓު ފޮތުގައި ބަޔާންކޮށްފައިވާ ގޮތުން 2020 ވަނަ އަހަރުން ފަށައިގެން އޮގަސްޓް 2024 ގެ ނިޔަލަށް ގާތްގަނޑަކަށް9 ބިލިއަން ރުފިޔާ ނުލިބޭނެކަމަށް ނިންމާފައިވޭ، މިއީވެސް ދައުލަތުގެ އާމްދަނީ ދައުލަަތަށް ލިބުމުގައި ލީކޭޖެއް ކަމަށް އަޅުގަނޑުމެންނަށް ފާހަގަކުރެވެނީ،" ޝާން ވިދާޅުވި އެވެ.

ފައިސާ ހޯދަން މީރާއަށް ބާރުދޭން ޖެހޭ

އެ ޕްރެޒެންޓޭޝަންގައި އެ ފައިސާ ހޯދަން މީރާއަށް އުނދަގޫވާ ސަބަބުތައް ވެސް ވަނީ ކިޔައިދީފަ އެވެ.

"މިކަންކަން މައިގަނޑު ގޮތެއްގައި ދިމާވަނީ އެންފޯސްމަންޓް ދާއިރާގައި އެންފޯސްމަންޓަށް މި ހުންނަ ގޮންޖެހުންތަކާއެކު ކަމަށް މައިގަނޑު ގޮތެއްގައި މި ދިމާވަނީ،" ޝާން ވިދާޅުވި އެވެ.

ޝާން ވިދާޅުވީ ދައުލަތަށް ނުލިބި ހުރި ފައިސާ ހޯދަން ގާނޫނީ ގޮތުން މީރާއަށް މާބޮޑު ބާރެއް ނުލިބޭ ކަމަށެވެ.

"މިކަންކަން އެންފޯސްކުރަން ގާނޫނީ ގޮތުން މީރާއަށް ދޭންޖެހޭ ބާރުތައް ގާނޫނުތަކަށް ބަދަލު ގެނެސްގެން ވިޔަސް ރެގިއުލޭޝަންތައް ޗޭންޖުކޮށްގެން ކަމަށްވިޔަސް އެ ބާރުތައް މީރާއަށް ދީ މި ފައިސާ ނުވަތަ ކޮމްޕްލޭންޓް ކުރެވޭނެ ގޮތް ހަމަޖެހިގެން ދިއުން،" އޭނާ ވިދާޅުވި އެވެ.