ރާއްޖޭގެ ކުރީގެ ހެލްތު މިނިސްޓަރު ޑރ. ޖަމްޝީދު: އޭނާއަކީ މިހާރު ޑަބްލިއުއެޗްއޯއިން ބަންގަލަދޭޝްއަށް ކަނޑައަޅާފައި ހުންނަވާ މަންދޫބު.
ކުރީގެ ހެލްތު މިނިސްޓަރު ޖަމްޝީދު ޑަބްލިއުއެޗްއޯގެ ބަންގްލަދޭޝް މަންދޫބަކަށް ހަމަޖައްސައިފި
ރާއްޖޭގެ ކުރީގެ ހެލްތު މިނިސްޓަރު ޑރ. އަހްމަދު ޖަމްޝީދު، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބަންގްލަދޭޝްއަށް ކަނޑައަޅާފައި ހުންނަވާ މަންދޫބަކަށް ހަމަޖައްސައިފި އެވެ.
ވީ ކިހިނެއް؟ - އޭނާ އެ މަގާމަށް އައްޔަންކޮށްފައިވާކަން އިއްޔެ އެ ޖަމާއަތުގެ ބަންގްލަދޭޝް 'އެކްސް' ހޭންޑަލްއިން ކުރި ޕޯސްޓެއްގައި ވަނީ ހާމަކޮށްފަ އެވެ.
ތަފްސީލު - އެ ޕޯސްޓުގައިވާ ގޮތުން، މި މަހު 1 ވަނަ ދުވަހުން ފެށިގެން ޖަމްޝީދު ވަނީ އެ މަގާމުގެ މަސްއޫލިއްޔަތުތަކާ ހަވާލުވެވަޑައިގެންފަ އެވެ. އޭނާ އަކީ އާންމު ސިއްހަތުގެ ދާއިރާގައި 18 އަހަރަށް ވުރެ ގިނަ ދުވަހުގެ ތަޖުރިބާ ހުންނެވި ބޭފުޅެއްކަން ވެސް ފާހަގަކޮށްފައިވެ އެވެ.
Dr Ahmed Jamsheed Mohamed officially assumed the responsibilities of WHO Representative a.i. in Bangladesh on 1 November 2024, bringing 18+ years of public health expertise.#whobangladesh pic.twitter.com/X0Nf4C5EGm
— World Health Organization Bangladesh (@WHO_BD) November 12, 2024
ޑަބްލިއުއެޗްއޯ އިން ބަންގްލަދޭޝްއަށް ކަނޑައަޅާފައި ހުންނަވާ ޑެޕިއުޓީ ރެޕްރެޒެންޓޭޓިވްގެ މަގާމު ވެސް މީގެ ކުރިން އަދާ ކުރައްވާފައިވާ ޖަމްޝީދަށް މި ލިބުނު މަގާމާ އެކު ދިވެހިން އަންނަނީ އޭނާއަށް މަރުހަބާ ވެސް ކިޔަމުންނެވެ.
އެންމެ ފަހުން، އޮގަސްޓު 2022 އިން ފެށިގެން އޭނާ ހުންނެވީ އުތުރު ކޮރެއާގެ މަންދޫބެއްގެ ގޮތުގަ އެވެ. އެންމެ ފުރަތަމަ އޭނާ ޑަބްލިއުއެޗްއޯއާ ގުޅިވަޑައިގެންނެވީ، ނޮވެމްބަރު 2013ގައި މެޑިކަލް އޮފިސަރެއްގެ ގޮތުގަ އެވެ. އޭގެ ފަހުން، އެ ޖަމާއަތުގެ އެކި މަގާމުތައް ފުރުއްވާފައިވެ އެވެ.
ޖަމްޝީދު:
-
އޭނާ ހެލްތު މިނިސްޓަރުގެ މަގާމު ފުރުއްވީ، ކުރީގެ ރައީސް މުހައްމަދު ވަހީދު ހަސަން މަނިކްގެ ސަރުކާރުގައި 2012 އިން 2013އަށް
-
ރާއްޖޭގެ އެންމެ ދުވަސްވީ އަމިއްލަ ހޮސްޕިޓަލް، އޭޑީކޭގެ ސީއީއޯގެ މަގާމު ވެސް އަދާކުރައްވާފައިވޭ
-
އިންޑިއާގެ ނާގްޕޫރުގައި ހުންނަ އިންދިރާ ގާންދީ މެޑިކަލް ކޮލެޖުން މެޑިކަލް ޑިގްރީ ހާސިލްކުރައްވާފައިވޭ
-
އިނގިރޭސިވިލާތުގެ ލަންޑަން ސްކޫލް އޮފް ހައިޖީން އެންޑް ޓްރޮޕިކަލް މެޑިސިންއިން ޕަބްލިކް ހެލްތުގެ ދާއިރާއިން މާސްޓާސް ޑިގްރީ ހާސިލުކުރައްވާފައިވޭ
ކޮމެންޓް