16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރުމުގެ ގާނޫނެއް އޮސްޓްރޭލިއާއިން ތައާރަފުކުރަނީ

އޮސްޓްރޭލިއާގެ ސަރުކާރުން ބުނާގޮތުގައި 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް "ދުނިޔޭގެ ފެންވަރުގެ" ގާނޫނެއް ތަޢާރަފުކުރަން ވަނީ ނިންމައިފަ އެވެ.

ބުރާސްފަތި ދުވަހު ވާހަކަދައްކަވަމުން، ބޮޑުވަޒީރު އެންތަނީ އަލްބަނީޒް ވިދާޅުވެފައިވަނީ، އަންނަ ހަފްތާ ޕާލަމަންޓަށް ހުށަހަޅާ މި ގާނޫނުގެ މަގްސަދަކީ ސޯޝަލް މީޑިއާއިން އޮސްޓްރޭލިއާގެ ކުދިންނަށް ލިބެމުންދާ "ގެއްލުން" ކުޑަކުރުން ކަމަށެވެ.

"މި ގާނޫނަކީ މަންމައިންނާއި ބައްޕައިންނަށް... އަހަރެންނެކޭ އެއްފަދައިން އެމީހުންވެސް ވަރަށް ބޮޑަށް ކަންބޮޑުވޭ އަހަރެމެންގެ ދަރިން އޮންލައިންގައި ރައްކާތެރިކަމާމެދު. އަހަރެން ބޭނުން އޮސްޓްރޭލިއާގެ އާއިލާތަކަށް އެނގެން ސަރުކާރުން އެމީހުންނަށް އެހީތެރިވާނެކަން،" އޭނާ ވިދާޅުވި އެވެ.

ގިނަ ތަފްސީލުތަކަކާމެދު އަދި ބަހުސްކުރަން އޮތް ނަމަވެސް، ސަރުކާރުން ބުނެފައިވާ ގޮތުގައި މި މަނާކުރުން ސޯޝަލް މީޑިއާ ބޭނުންކުރަމުންދާ ޒުވާނުންނަށްވެސް ހިނގާނެއެވެ.

އަލްބަނީޒް ވިދާޅުވި ގޮތުގައި ސޯޝަލް މީޑިއާ ބޭނުންކުރާ ފަރާތްތަކަށް އެއްވެސް އަދަބެއް ނުދެވޭނެއެވެ. އަދި މި ގާނޫނުތައް ތަންފީޒުކުރާނީ އޮސްޓްރޭލިއާގެ އޮންލައިން ރެގިއުލޭޓަރު  އީސޭފްޓީ ކޮމިޝަނަރެވެ.

މި ގާނޫނު ފާސްވުމަށްފަހު 12 މަހުގެ ތެރޭގައި ތަންފީޒުކުރަން ފަށާނެ އެވެ. އަދި ތަންފީޒުކުރަން ފެށުމަށްފަހު މުރާޖައާ ކުރެވޭނެ އެވެ.

ގިނަ މާހިރުން ދެކޭގޮތުގައި ސޯޝަލް މީޑިއާ ޕްލެޓްފޯމްތަކުން ޒުވާނުންގެ ނަފްސާނީ ދުޅަހެޔޮކަމަށް ގެއްލުން ލިބޭ ކަމަށް އެއްބަސްވާ ނަމަވެސް، މުޅިން މަނާކުރުމުގެ ބަދަލުގައި އެހެން ގޮތްތަކެއް ހޯދުން މުހިންމެވެ.

ބައެއް މާހިރުން ބުނާ ގޮތުގައި މަނާކުރުމުގެ ސަބަބުން ޒުވާނުން ޓިކްޓޮކް، އިންސްޓަގްރާމް އަދި ފޭސްބުކް ފަދަ އެޕްތަކަށް ހާމަވުން ލަސްކުރެވުނު ނަމަވެސް، އޮންލައިންގައި ކަންކަމާ ކުރިމަތިލާން ދަސްކޮށްދިނުމުގެ ބަދަލުގައި އެއީ ރަނގަޅު ގޮތެއް ނޫނެވެ.

އޮސްޓްރޭލިއާގެ ކުޑަކުދިންގެ ހައްގުތަކަށް ވަކާލާތުކުރާ ބޮޑު  ޖަމްއިއްޔާއަކުން މި ހުށަހެޅުމަށް ފާޑުކިޔާފައިވަނީ "މާ ހަރުކަށި ވަސީލަތެއް" ކަމަށް ބުނެއެވެ.

ސަރުކާރަށް އޮކްޓޯބަރުގައި ފޮނުވި ހުޅުވާލެވިފައިވާ ސިޓީއެއްގައި، 100 އަކަށްވުރެ ގިނަ އެކަޑެމިކުންނާއި 20 މަދަނީ ޖަމްއިއްޔާއަކުން ސޮއިކޮށް، އޮސްޓްރޭލިއަން ޗައިލްޑް ރައިޓްސް ޓާސްކްފޯސްއިން އަލްބަނީޒްއަށް ގޮވާލާފައިވަނީ މަނާކުރުމުގެ ބަދަލުގައި ސޯޝަލް މީޑިއާ ޕްލެޓްފޯމްތަކަށް "ސަލާމަތީ މިންގަނޑުތަކެއް" ކަނޑައެޅުމަށެވެ.

ނަމަވެސް އެހެން އާންމު ފެންވަރުގެ ކެމްޕޭނަރުންވަނީ ގެއްލުންހުރި ކޮންޓެންޓާއި، ދޮގު މަޢުލޫމާތާއި، ފުރައްސާރަކުރުމާއި، އެހެނިހެން އިޖްތިމާއީ ފިއްތުންތަކުން ކުޑަކުދިން ރައްކާތެރިކުރުމަށްޓަކައި މި ގާނޫނު ބޭނުންވާ ކަމަށް ބުނެ އޮސްޓްރޭލިއާގެ ސަރުކާރަށް ލޮބީކޮށްފައެވެ.

އޮސްޓްރޭލިއާގެ ރައްޔިތުންނަކީ ސޯޝަލް މީޑިއާ ބޭނުންކުރުމުގައި ކޮންމެވެސް ވަރަކަށް ޝައުގުވެރިކަން ބޮޑު ބައެކެވެ. އެމެރިކާއާ އެއްވަރަށް ބޭނުންކުރި ނަމަވެސް، އޭޝިއާގެ ބައެއް ގައުމުތަކާ އަޅާބަލާއިރު މަދެވެ.

މައިގަނޑު ތަފާސްހިސާބު

• އޮސްޓްރޭލިއާގެ ރައްޔިތުން ސޯޝަލް މީޑިއާއިން މަޑުމަޑުން ދުރަށް ދަނީއެވެ:

- އޮކްޓޯބަރު 2023: އާބާދީގެ %78.5 އެކްޓިވް ސޯޝަލް މީޑިއާ އެކައުންޓް ބޭނުންކުރޭ

- ފެބްރުއަރީ 2023: %80.4

- ފެބްރުއަރީ 2021: %82.7

• ބޭނުންކުރާ މީހުންގެ:

- 54.2% އަންހެނުން

- 45.8% ފިރިހެނުން

• އެންމެ މަޤްބޫލު ޕްލެޓްފޯމްތައް:

- ޔޫޓިއުބް: %78.2

- ފޭސްބުކް: %77.7

• 98% މީހުން ސޯޝަލް މީޑިއާ ބޭނުންކުރަނީ މޯބައިލް ފޯނުން

• ބޭނުންކުރާ ވަގުތު (16-64 އަހަރާ ދެމެދުގެ މީހުން):

- އޮކްޓޯބަރު 2023: ދުވާލަކު 1 ގަޑި 53 މިނެޓް

- 2023 ގެ ފުރަތަމަ ކުއާޓަރ: ދުވާލަކު 2 ގަޑި

• އެވްރެޖްކޮށް ކޮންމެ މީހަކު 6.3 ސޯޝަލް މީޑިއާ އެކައުންޓް ގެންގުޅޭ (ދުނިޔޭގެ އެވްރެޖް: 6.7)

- ޖަޕާން: އެންމެ މަދު - 3.5

- އިންޑިއާ: އެންމެ ގިނަ - 8.1

ބޭނުންކުރާ ގޮތްތައް

• އިންފްލުއެންސަރުންނާއި މާހިރުން ފޮލޯކުރުން:

- އޮކްޓޯބަރު 2023: %24.6

- އޮކްޓޯބަރު 2022: %19.1

• މަސައްކަތާ ގުޅޭ ބޭނުންކުރުން:

- އޮކްޓޯބަރު 2023: %30.7

- އޮކްޓޯބަރު 2022: %13.0

• ނޫސްވެރިކަމާއި ޚަބަރު:

- އޮސްޓްރޭލިއާގެ %52 މީހުން ޚަބަރު ހޯދަނީ ސޯޝަލް މީޑިއާއިން (ދުނިޔޭގެ އެވްރެޖް: %55)

- 25.1% ބުނާ ގޮތުގައި މައިގަނޑު ބޭނުމަކީ ޚަބަރު ހޯދުން (ދުނިޔޭގެ އެވްރެޖް: %34.6)

• ވިޔަފާރިތަކާ ބެހޭ މައުލޫމާތު ހޯދުން:

- އޮކްޓޯބަރު 2023: %43.6

- ފެބްރުއަރީ 2023: %38.3

- ފެބްރުއަރީ 2022: %30.3

-  އޮސްޓްރޭލިއާގެ 36.1% މީހުން ބްރޭންޑްތަކާއި އުފެއްދުންތަކާ ބެހޭ މައުލޫމާތު ހޯދަނީ ސޯޝަލް މީޑިއާއިން

• ސޯޝަލް މީޑިއާ ޚަބަރުތަކުގެ އިތުބާރު:

- އެމެރިކާއަށްވުރެ %30 އިތުރަށް އޮސްޓްރޭލިއާގެ މީހުން ސޯޝަލް މީޑިއާގެ ޚަބަރުތަކަށް އިތުބާރުކުރޭ

- ނެދަލެންޑްސްއާ އަޅާބަލާއިރު %73 މީހުން އިތުބާރުކުރޭ

- އޮންލައިން ޚަބަރުތަކުގެ ތެދުދޮގާމެދު ކަންބޮޑުވާ މިންވަރު އެމެރިކާއާ ދާދި އެއްވަރު