ޣައްޒާގެ އުތުރުގައި ޕޯލިއޯ ވެކްސިން ދެނިކޮށް ވެކްސިން ދޭ މަރުކަޒަކަށް އިޒްރޭލުންހަމަލާއެއް ދީފި

އދ. އިން އެހީތެރިވެދޭ ޕޯލިއޯ ވެކްސިން ކެމްޕެއިންގެ ފަހު މަރުހަލާ ހޮނިހިރު ދުވަހު  ޣައްޒާގެ އުތުރުގައި ފަށައިފިއެވެ. ނަމަވެސް މި މަސައްކަތް ކުރިއަށްދަނިކޮށް، ވެކްސިން ދޭ މަރުކަޒަކަށް އިޒްރޭލުން ހަމަލާއެއް ދިން ކަމަށް އދ. ގެ އޭޖެންސީތަކުން ބުނެފިއެވެ.

މި ކެމްޕެއިން ފެށުމަށްފަހު ގަޑިއިރުތަކެއް ނުވަނީސް، އުތުރު ޣައްޒާގެ ޞިއްޙީ މަރުކަޒަކަށް ދެވުނު ހަމަލާއެއްގައި ހަތަރު ކުޑަކުދިންނާއެކު ފަސް މީހުންނަށް އަނިޔާވެފައިވާ ކަމަށް ދުނިޔޭގެ ޞިއްޙަތު ޖަމްއިއްޔާ (ޑަބްލިއުއެޗްއޯ) ގެ ވެރިޔާ ވަނީ ވިދާޅުވެފަ އެވެ.

"އަޅުގަނޑުމެންނަށް ވަރަށް ކަންބޮޑުވާ ޚަބަރެއް ލިބިފައިވޭ. އެއީ ޝެއިޚް ރަޟްވާން ޕްރައިމަރީ ހެލްތު ސެންޓަރަށް މިއަދު ހަމަލާދިން ކަމުގެ ޚަބަރު. މިއީ މައިންބަފައިން އެމީހުންގެ ދަރިންނަށް ފުރާނަ ސަލާމަތްކުރާ ޕޯލިއޯ ވެކްސިން ދޭން ގެންދިޔަ ވަގުތެއްގައި، ހަމަލާ ނުދޭނެކަމަށް އިޒްރޭލުން ކަނޑައަޅާފައިވާ ސަރަޙައްދެއްގައި ހިނގި ކަމެއް،" ޓެޑްރޯސް އަދަނޮމް ގެބްރެއިސަސް ވިދާޅުވި އެވެ.

ޑަބްލިއުއެޗްއޯގެ ޓީމެއް މި ހަމަލާ ދިނުމުގެ ކުޑައިރުކޮޅެއް ކުރިން އެތަނުގައި ހަރަކާތްތެރިވި ކަމަށް އޭނާ ބުންޏެވެ.

"މި ހަމަލާއިން ކުޑަކުދިންގެ ޞިއްޙީ ރައްކާތެރިކަމަށް ނުރައްކާވެ، މައިންބަފައިން އެމީހުންގެ ދަރިންނަށް ވެކްސިން ދިނުމަށް ގެނައުމަށް ފަސްޖެހުމަކަށް ވެދާނެ،" އޭނާ ބުންޏެވެ.

ޣައްޒާގެ އުތުރުގައި 119,000 ކުޑަކުދިންނަށް ނޯވެލް އޯރަލް ޕޯލިއޯ ވެކްސިން ޓައިޕް 2 (އެންއޯޕީވީ2) ގެ ދެވަނަ ޑޯޒު ދިނުމަށް މި ކެމްޕެއިންގެ ފަހު މަރުހަލާގައި އަމާޒުކުރި ނަމަވެސް، އެ ސަރަހައްދަށް ވަދެވޭ މިންވަރު މަދުވުމުގެ ސަބަބުން މި އަދަދަށް ވާޞިލުވުމަކީ މިހާރު އުނދަގޫ ކަމެއް ކަމަށް އދ. ގެ އޭޖެންސީތަކުން ވަނީ ބުނެފައެވެ.

މި ކެމްޕެއިންގެ ދަށުން 216 ޓީމުތަކެއް 106 ތަނެއްގައި މަސައްކަތްކުރާނެއެވެ. އަދި އެހެން ސަރަޙައްދުތަކުން ގޮސް އަލަށް ހިމާޔަތް ހޯދާ މީހުންނަށް ވެކްސިން ލިބޭނެ ގޮތް ފަހިކުރުމަށް 22 ތަނެއް އިތުރުކޮށްފައިވާ ކަމަށް އދ. ގެ އޭޖެންސީތަކުން މައުލޫމާތު ދީފައިވެއެވެ.