ސިޔާމް އަދި ޒާރާ: ޒާރާގެ ރަށް، ބ. ކަމަދޫގައި މިރޭ ކައިވެނީގެ އުފަލުގައި ބާއްވާ ހަފްލާ ބޭއްވުމަށް ވަނީ ހަމަޖެހިފައި.
ސިޔާމް އާއި ޒާރާ ކަމަދުއަށް؛ މިރޭ ހަވާ އަރުވަނީ
މިދިޔަ ބުރާސްފަތި ދުވަހު ކައިވެނި ބައްލަވައިގަތް ވިޔަފާރިވެރިޔާ އަހްމަދު ސިޔާމް މުހައްމަދާއި ބ. ކަމަދޫގެ ނެށުންތެރިޔާ އާމިނަތު ޒާރާ އެ ރަށަށް މިއަދު ވަޑައިގަތުމުން ހޫނު މަރުހަބާއެއް ކިޔައިފި އެވެ.
ވީ ކިހިނެއް؟ - ސިޔާމްގެ ކ. އޮޅުވެލި ރިސޯޓުގައި ކުރި ކައިވެރިންނަޏަށް އެއް ދުވަސް ފަހުން، އެ ދެމަފިރިން ކަމަދުއަށް ވަޑައިގެންފައި މިވަނީ އެ ރަށުގައި ބޭއްވުމަށް ހަމަޖެހިފައިވާ އުފާ ފާޅުކުރުމުގެ ހަރަކާތަކަށެވެ.
ތަފްސީލު - އެ ރަށުން ވާހަކަ ދެއްކި އިސް ބޭފުޅަކު 'ދައުރު'އަަށް ވިދާޅުވީ ސިޔާމް އާއި ޒާރާ މިއަދު ރަށަށް ވަޑައިގަތުމުން ރަށުގެ ރައްޔިތުން ވަރަށް ހޫނު މަރުހަބާއެއް ކިޔާފައިވާ ކަމަށެވެ. އަދި އެ މަރުހަބާ ކިޔުމުގެ ތެރެއިން ރަށުގެ ކުޑަކުދިންނަށް ހާއްސަ ހަރަކާތެއް ވެސް ބާއްވާފައިވާ ކަމަށް ވެސް އޭނާ ވިދާޅުވި އެވެ.
"އެ ހަރަކާތުގައި ރޯބޯމޭންގެ ހަރަކާތްތަކާއި ޖާދޫ ހެދުން ފަދަ ކުޑަކުދިންނަށް ހާއްސަ ޕްރޮގްރާމްތައް ކުރިއަށް ގެންގޮސްފައިވޭ،" އޭނާ ވިދާޅުވި އެވެ.
ކައިވެނީގެ އުފަލުގައި ކަމަދޫގައި ބާއްވާ ބޮޑު ހަފްލާ އޮތީ މިރެ އެވެ.
"މި ހަރަކާތުގެ ތެރެއިން ހަވާ އެރުވުމަށް ވެސް ހަމަޖެހިފައިވޭ،" އޭނާ ވިދާޅުވި އެވެ.
މި ހަފްލާގައި ކުރިއަށް ދަނީ، ރަށުގެ ރައްޔިތުންނަށް ހާއްސަ ކެއުމަކާ އެކު ލައިވް މިއުޒިކް ޝޯއަކާ ވެސް އެކުގަ އެވެ. އެގޮތުން، ބައެއް ދިވެހި ބޭންޑްތައް ވެސް ރަށަށް އައިސްފައިވާ ކަމަށް އޭނާ ވިދާޅުވި އެވެ.
ފާހަގަކޮށްލެވޭ ކަމެއް - ޒާރާ މަޝްހޫރުވެފައި ވަނީ، މިދިޔަ ބޮޑު އީދު ތެރޭ ކަމަދޫގައި ބޭއްވި ހަރަކާތްތަކުންނެވެ. އެ ހަރަކާތްކުން ސޯޝަލް މީޑިއާގައި އޭނާގެ ވީޑިއޯތައް ވައިރަލްވެ، އާންމުންގެ މަގްބޫލުކަން ޒާރާއަށް ވަރަށް ބޮޑަށް ލިބުނެވެ.