ސިޔާމް އާއި ޒާރާ ކައިވެނި ބައްލަވައިގެންފި؛ 'ރަނަކީ، 2،024ރ.'

ވިޔަފާރިވެރިޔާ، ދ. މީދޫ ދާއިރާގެ މަޖިލިސް މެންބަރު އަހްމަދު ސިޔާމް މުހައްމަދާއި ބ. ކަމަދޫގެ ނެށުންތެރިޔާ އާމިނަތު ޒާރާ، މިއަދު ކައިވެނި ބައްލަވައިގެންފި އެވެ.

ވީ ކިހިނެއް؟ - އެ ދެ ބޭފުޅުން ކައިވެނިބައްލަވައިގަތީ މިއަދު ހަވީރު ސިޔާމްގެ ކ. އޮޅުވެލި ރިސޯޓުގައި ބޭއްވި ހާއްސަ ހަފްލާއެއްގައި ކަމަށް ވެސް ކަށަވަރުވެފައިވެ އެވެ. އަދި ކައިވެނީގެ އުފަލުގައި ބާއްވާ ހަފްލާ މިރޭ އެ ރިސޯޓުގައި ބޭއްވުމަށް ވެސް ވަނީ ހަމަޖެހިފަ އެވެ.

ތަފްސީލު - މިއަދު ސިޔާމް އާއި ޒާރާ ކައިވެނިކުރެއްވި އިރު މީގެ ކުރިން އަޑު ފެތުރިފައިވާ ގޮތުން މި ކައިވެނީގެ ރަނަކީ ދެ ގެސްޓް ހައުސް އެވެ. ނަމަވެސް 'ދައުރު'އާ ވާހަަކަ ދެއްކި ފަރާތުން އެކަން ދޮގު ކުރެ އެވެ.

"ދެ ގެސްޓް ހައުސްއަކަށް ނޫން ރަންކީ. ރަނަކީ، 2،024ރ." އޭނާ ވިދާޅުވި އެވެ.

މިރޭ ބާއްވާ ހަފްލާއަށް ފަހު، ޒާރާގެ ރަށް ކަމަދޫގައި ވެސް ހަފްލާއެއް ބޭއްވުމަށް ވަނީ ހަމަޖެހިފަ އެވެ.

ފާހަގަކޮށްލެވޭ ކަމެއް - ޒާރާ މަޝްހޫރުވެފައި ވަނީ، މިދިޔަ ބޮޑު އީދު ތެރޭ ކަމަދޫގައި ބޭއްވި ހަރަކާތްތަކުންނެވެ. އެ ހަރަކާތްކުން ޝޯޝަލް މީޑިއާގައި އޭނާގެ ވީޑިއޯތައް ވައިރަލްވެ، އާންމުންގެ މަގްބޫލުކަން ޒާރާއަށް ވަރަށް ބޮޑަށް ލިބުނެ އެވެ. 

ސިޔާމް ޒާރާއާ ކައިވެނިބައްލަވައިގަންނަވަން ނިންމުމާއެކު އޭނާ ވަނީ، ކަމަދޫ ރައްޔިތުންނަށް އޭނާގެ އެހީގައި ބޭސްފަރުވާ ކުރެވޭނެ އިންތިޒާމްވެސް ހަމަޖައްސައިދީފަ އެވެ.