އިންޑިއާއިން މަނާކުރި އެއްވެސް ބޭހެއް ރާއްޖެ އެތެރެކޮށް ވިއްކަމުން ނުދޭ: އެމްއެފްޑީއޭ

ކޮލިޓީ ދަށްވެގެން އިންޑިއާގައި ބޭނުންކުރުން މަނާކުރި ބޭސްތަކުގެ ލިސްޓުގައިވާ އެއްވެސް ބޭހެއް ރާއްޖެ އެތެރެކޮށް ބޭނުންކުރަމުން ނުދާކަމުގެ ޔަގީންކަން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މިއަދު ދީފި އެވެ.

މައްސަލައިގެ ފެށުން - ރާއްޖެއަށް ގިނަ އަދަދެއްގެ ބޭސް އެތެރެކުރާ އެއް ގައުމުކަމަށްވާ އިންޑިއާގައި ބޭހުގެ ފެންވަރު ބަލާ އިދާރާ، ސެންޓްރަލް ޑްރަގްސް ސްޓޭންޑާޑް ކޮންޓްރޯލް އޮގަނައިޒޭޝަން (ސީޑީއެސްސީއޯ)އިން ވަނީ އެ ގައުމުގެ އެކި ކުންފުނިތަކުން އުފައްދައި ވިއްކަމުން ދާ 48 ބޭހެއްގެ ކޮލިޓީ ދަށްވެގެން އެކަން މި ހަފްތާ އިއުލާންކޮށްފަ އެވެ.

ވީ ކިހިނެއް؟ - އޭގެ ބައެއް ބޭސްތައް ރާއްޖެ އެތެރެކޮށް ވިއްކާކަމަށް އާންމުންގެ ފަރާތުން ކަންބޮޑުވުން ލިބުމާ ގުޅިގެން އެމްއެފްޑީއޭއިން މިއަދު ނެރުނު ބަޔާނެއްގައި ބުނީ:

"ސީޑީއެސްސީއޯގެ މިލިސްޓުގައި ހިމެނޭ އެއްވެސް ބޭހެއްގެ އެއްވެސް ބެޗެއް، ބޭސް އިމްޕޯޓްކުރުމަށް ކަނޑައެޅިފައިވާ އެއްވެސް އުސޫލެއްގެ ދަށުން، ރާއްޖެ އިމްޕޯޓްކޮށްފައި ނުވާކަން ވެސް ވަނީ ޔަގީންކުރެވިފަ އެވެ،" ބަޔާނުުގައިވެ އެވެ. 

އިންޑިއާއަކީ ދިވެހިން ގިނަ އަދަދަކަށް ސިއްހީ ފަރުވާ ހޯދަން ދާ ގައުމެއްކަން ފާހަގަކޮށް، އެމްއެފްޑީއޭގެ ބަޔާނުގައި އިތުރަށް ބުނީ އަމިއްލަ ބޭނުމަށް އެ ގައުމުން ބޭސް ގަނެގެން ރާއްޖެ ގެންނައިރު ކޮލިޓީ ދަށްވެގެން ވިއްކުން މަނާކޮށްފައިވާ ބޭސްތަކާ މެދު ސަމާލުވާން އެދޭ ކަމަށެވެ. 

މީގެ ކުރިން އިންޑިއާއިން އެފަދަ ބޭހެއް ގަނެގެން ގެނެސް ބޭނުންކުރަމުން ދާ ނަމަ އެފަދަ ބޭހެއް ބޭނުން ނުކުރުމަށް ވެސް އެމްއެފްޑީއޭއިން ވަނީ އިރުޝާދު ދީފަ އެވެ. 

އިންޑިއާއިން މަނާކުރި 48 ބޭސް އެއްވެސް ގޮތަކަށް ރާއްޖެ އެތެރެވޭތޯ އިތުރަށް ބެލުމުގެ ގޮތުން ރާއްޖެެއަށް މުދާ އެތެރެކުރާ ވައިގެ ބަނދަރުތަކާއި ކަނޑު ބަނދަރުތަކުގައި ކުރާ އިންސްޕެކްޝަންތައް މިހާރަށް ވުރެ ހަރުދަނާކޮށް ވަރުގަދަކުރާނެ ކަމަށް ވެސް އެމްއެފްޑީއޭއިން ބުންޏެވެ. 

"މިފަދަ ބޭސްތައް އެތެރެވިޔަ ނުދިނުމަށް ޓަކައި ކުރަން ޖެހޭ އެންމެހާ މަސައްކަތްތައް ކުރަމުންދާނެ ކަމުގެ ފުރިހަމަ ޔަގީންކަން އަރުވަމެވެ،" އެމްއެފްޑީއޭގެ ބަޔާނުގައި ބުންޏެވެ.