އުސްފަސްގަނޑާ ދިމާ މޫދުގައި މަރުވެފައި އޮތީ ފޮޓޯގުރާފަރު ޖައުހަރީ

މާލޭ އުސްފަސްގަނޑާ ދިމާލު މޫދުން މިއަދު މަރުވެފައި އޮތް މީހެއްގެ ހަށިގަނޑު ފެނިއްޖެ އެވެ. މަރުވެފައި އޮއްވާ ފެނުނީ ރާއްޖޭގެ އިސްލާހީ ހަރަކާތުގެ ފޮޓޯތައް ނަގައި އާންމުންނަށް ގެނެސްދިނުމުގައި ހަރަކާތްތެރިވި ފޮޓޯގްރާފަރެއް ކަމަށްވާ އިބްރާހިމް ޖައުހަރީ (ޖޯރޭ)، ހ. ވެލަސްފަރުގެ، 62 އެވެ. 

ވީ ކިހިނެއް؟ - ފުލުހުން މިއަދު މީޑިއާތަކަށް ފޮނުވި މެސެޖެެއްގައި ބުނީ އުސްފަސްގަނޑާ ދިމާލު މޫދުގައި މީހަކު މަރުވެފައި އޮތް ކަމުގެ ރިޕޯޓް ލިބުނީ މިއަދު ހަވީރު 5:06 ހާއިރު ކަމަށެވެ.

ތަފްސީލް - ފުލުހުން ބުނީ ޖައުހަރީގެ ހަށިގަނޑު މޫދުން ނަގައިގެން އައިޖީއެމްއެޗަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލުން ބުނެފައިވާ ކަމަށެވެ. 

މަންޒަރުދުށް މީހުން ބުނި ގޮތުގައި އޭނާގެ ނިތްކުރިގައި ޒަހަމްތަކެއް ހުއްޓެވެ. އަދި އެ ސަރަހައްދުގައި ތިބި މީހުން ބުނި ގޮތުގައި ޖައުހަރީ އާންމުކޮށް މަސްބާނަން އެ ސަރަހައްދަށް ގޮސްއުޅެ އެވެ. އަދި މަސް ބާނަން ބޭނުންކުރާ ނަނާއި އެން ފަދަ ތަކެތި ވަނީ އެ ސަރަހައްދުގެ ގޮނޑުދޮށުން ފެނިފަ އެވެ. 

އެނގުން މުހިންމު - ޖައުހަރީ ފާހަގަވެފައި ވަނީ ރާއްޖެއަށް ޑިމޮކްރަސީ ގެނައުމަށް އޭރު ބޭއްވި މުޒާހަރާތަކާއި އެކިއެކި ހަރަކާތްތައް ފޮޓޯ ނަގައި ވީޑިއޯ ކުރުމުގައި އުޅުނު ފޮޓޯގުރާފަރެއްގެ ގޮތުގަ އެވެ. އޭރު ނެރުނު މިނިވަން ނޫހުގެ ފޮޓޯ ޖާނަލިސްޓެއްގެ ގޮތުގައި ވެސް އޭނާ ހަރަކާތްތެރިވި އެވެ. 

އެމްޑީޕީގެ ތައުޒިޔާ - ޖައުހަރީ މަރުވެފައި އޮއްވާ ފެނުމާ ވިދިގެން އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އާއިލާއަށް ތައުޒިޔާ ވިދާޅުވެފަ އެވެ. އެ މެސެޖުގައި ފައްޔާޒު ޖައުހަރީ ސިފަކުރެއްވީ އެމްޑީޕީއަށް އިހުލާސްތެރި ހިދުމަތްތަކެއް ކޮށްދެއްވި ވަރުގަދަ އެކްޓިވިސްޓެއްގެ ގޮތުގަ އެވެ.

"އޭނާގެ ފުރާނަޔަށް ސުވަރުގޭގެ ދާއިމީ ނިއުމަތް ލައްވައި އާއިލާއަށް ކެތްތެރިކަން ދެއްވުމަށް އެދި ދުއާކުރަން،" ފައްޔާޒު ލިޔުއްވާފައިވެ އެވެ. 

ފާހަގަކޮށްލެވޭ - މިދިޔަ މެއި މަހު ބްރިޖް ކައިރިން ވެސް މަރުވެފައި އޮތް މީހަކު ވަނީ ފެނިފަ އެވެ. އެއީ ބިދޭސީ އަންހެނެކެވެ.