ހާޝިމްގެ މަރަަށް 2 އަހަރު: ކަންބޮޑުވުންތައް ފުލުހުން ބަލަނީ

ކުއްލި ގޮތަކަށް މަރުވެފައި އޮއްވައި ފެނުނު ވިޔަފާރިވެރިޔާ ހާޝިމް މުހައްމަދުގެ މަރަށް ދެ އަހަރު ފަހުން، އޭނާގެ އާއިލާއިން ހުށަހެޅި ކަންބޮޑުވުންތައް ފުލުހުން ބަލަން ނިންމައިފި އެވެ.

ވީ ކިހިނެއް؟ - ހއ. ހޯރަފުއްޓަށް އުފަން ހާޝިމް، 44، މާފަންނު ގެއެއްގެ ތެރޭ މަރުވެފައި އޮއްވާ ފެނުނީ ޖެނުއަރީ 2022ގަ އެވެ. އެގޮތުން:

ތަފްސީލު - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، ހާޝިމްގެ މަރުގެ މައްސަލައިގެ ތަހުގީގަށް އޭނާ ފޯނު ގެނެސްފައިވާ ކަމަށެވެ. އަދި ފުލުހުންގެ ތަހުގީގަށް ބޭނުންވާ ތަހުލީލުތަކަށް ފަހު، ފޯނު އާއިލާއާ ހަވާލުކޮށްފައިވާ ކަމަށް ފުލުހުން ބުންޏެވެ.

"މި މައްސަލައިގެ ތަހުގީގު ނިންމާފައި ވަނިކޮށް އާއިލާއިން ކަންބޮޑުވުންތަކެއް ހިއްސާކޮށްފައި ވާތީ އެ ކަންބޮޑުވުންތަކާ ގުޅިގެން ބަލަން ޖެހޭ ކަންކަން ބެލުމުގެ މަސައްކަތް ފުލުހުން ގެންދަނީ ކުރަމުން،" ފުލުހުން ބުންޏެވެ.

ފުލުހުން މިއަދު ވެސް ބުނީ، މީގެ ކުރިން ހިންގި ތަހުގީގުގައި މީހެއްގެ މައްޗަށް ތުހުމަތު ކުރެވިދާނެ އެއްވެސް ކަމެއް ފާހަގަކުރެވިފައި ނުވާ ކަމަށެވެ.

ފާހަގަކޮށްލެވޭ ކަމެއް - މި މަރު ހިނގިތާ ދެ ދުވަސް ފަހުން 'ދައުރު'އާ ވާހަކަ ދެއްކި އޭނާގެ އެއްބަނޑު އެއްބަފާ ބޭބެ، މޫސާ ހަލީލު ބުނެފައި ވަނީ، ހާޝިމް މަރުވުމުގެ ސަބަބަކީ ސިޑިން އެކަނި އަރަނިކޮށް ވެއްޓި ލިބުނު އަނިޔާ ކަމަށާއި ތަހުގީގުން ހޯދި ހޯދުންތަކަށް ބަލައި އާއިލާއަށް ވެސް ގަބޫލުކުރެވެނީ މީހެއްގެ އިހުމާލެއް ނެތް ކަމަށެވެ.

"ފުލުހުން ވަނީ އެ ހާދިސާގެ ސީސީޓީވީ ފުޓޭޖާއި ބަޔާންތައް އާއިލާއާ ހިއްސާކޮށްފައި. އެކަމުގައި އެއްވެސް މީހެއްގެ ބައިވެރިވުމެއް ނެތް،" މީގެ ދެ އަހަރު ކުރިން ދިން އިންޓަވިއުގައި މޫސަ ބުނެފައިވެ އެވެ.