ޔާމީން ރަޝީދު މަރާލި މައްސަލާގައި ތުހުމަތުވާ މީހުން ހައި ކޯޓުގެ ޝަރީއަތުގައި (ފޮޓޯ/ ވީޑިއޯ ސްކްރީންޝޮޓް)
ޔާމީން ރަޝީދު މަރާލުމުގައި އެހީވުމުގެ ކުށަށް ދަށު ކޯޓުން ނުބެލުން ދައުލަތުން ގޯސްކޮށްފި
ބްލޮގަރު ޔާމީން ރަޝީދަށް ތޫނު އެއްޗަކުން ހަމަލާދީ މަރާލި މައްސަލައިގައި، ކްރިމިނަލް ކޯޓުގައި ކުށް ސާބިތުނުވި މީހުންގެ މައްޗަށް މަރާލުމުގައި އެހީވުމުގެ ކުށަށް ދަށު ކޯޓުގައި ރިއާޔަތްކޮށްފައި ނެތީ ގޯސްކޮށް ކަމަށް ދައުލަތުން މިއަދު ހައި ކޯޓުގައި ބުނެފި އެވެ.
ވީ ކިިހިނެއް؟ - ދައުލަތުން އެ މައްސަލާގައި ހަ މީހުންގެ މައްޗަށް ވެސް އުފުލީ މަރާލުމުގެ ކުށުގެ ދައުވާ އެވެ. ހަތަރު މީހެއްގެ މައްޗަށް ކުށް ސާބިތުނުވާ ކަމަށް ދަށު ކޯޓުން ނިންމި އިރު، އެއިން ދެ މީހެއްގެ ބައި ހައި ކޯޓުގައި އިސްތިއުނާފު ކުރި އެވެ.
ދައުލަތް ތަމްސީލްކުރާ ޕްރޮސެކިއުޓާ ޖެނަރަލްގެ (ޕީޖީ) އޮފީހުން، ހައި ކޯޓުގައި އިސްތިއުނާފްކުރި މައްސަލަ ރައްދުވާ ދެ މީހުންނަކީ:
-
1-
މުހައްމަދު ދިފްރާން، ގދ. ގައްދޫ/ސިންދުބާދުގެ
-
2-
އިސްމާއިލް ރަޝީދު މ. ތާއިފް
ތަފްސީލް - ހައި ކޯޓުގައި މިއަދު ބޭއްވި އަޑުއެހުމުގައި ދައުލަތުގެ ވަކީލު އަހުމަދު ނައުފަލް ވިދާޅުވީ ދައުލަތުން ކުރާ ދައުވާގެ އިތުރުން ވެސް ގާނޫނުގައި ބަޔާންކުރާ އެހެން ކުށެއް ސާބިތުވާކަން ފަނޑިޔާރަށް ފާހަގަވާ ނަމަ އެ ކަމަށް ރިއާޔަތްކުރަން ޖެހޭނެ ކަމަށެވެ.
ދަށު ކޯޓުގައި ފަނޑިޔާރަށް އެ ދެ މީހުންގެ މައްޗަށް މަރާލުމުގައި އެހީތެރިވެ ދިން ކަމަށް ގަބޫލު ކުރެވުނު ކަމަށް ވެސް ދައުލަތުގެ ވަކީލު ވިދާޅުވި އެވެ.
ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދަށް ހަވާލާ ދެއްވައި ނައުފަލް ވިދާޅުވީ ފަނޑިޔާރަށް އެ ކަން ކުރެވޭނެ ތިން ގޮތެއް ވެސް އެބަ އޮތް ކަމަށެވެ. އެއީ:
-
ދެ ފަރާތަށް ދުރާލާ ނޯޓިސްއެއް ދިނުން
-
ކުށުގެ ތުހުމަތަށް ޖަވާބުދާރީވުމަށް ފުރުސަތެއް ދިނުން
-
ހެކިިން އަލުން ހާޒިރުކުރަން އެދޭ ނަމަ އެ ފުރުސަތު ދިނުން
ދިފާއުގެ ބަސް - ދިފާއީ ވަކީލު ހަމްޒާ ލަތީފް ރައްދުގައި ފާހަގަކުރެއްވި ކަމަކީ ދަށު ކޯޓުގައި ދައުލަތުން އެފަދަ އެއްވެސް ކަމެއް ފާހަގަ ނުކުރާ ކަމެވެ. އެ ގޮތުން:
-
ދަށު ކޯޓުގައި ފަނޑިޔާރާއި ދިފާއީ ވަކީލުން ވެސް އެހީތެރިވުމުގެ ކުށުގެ ދައުވާ ނުއުފުލި ސަބަބާއި އެ ކުށް ސާބިތުވުމާ ގުޅޭ ގޮތުން ދައުލަތުން ފާހަގަނުކުރާ މައްސަލަ ނެގި
-
އޭރު ދަށު ކޯޓުގައި ދައުލަތުން ތަކުރާރު ކުރި ވާހަކައަކީ މަރާލުމުގެ ކުށް ސާބިތުވާނެ ކަމަށް ދެކޭތީ، އިތުރު ކަންކަން ބަލަން ބޭނުން ނުވާ ކަމަށް ބުނިކަން
-
ދައުލަތުން އެ ކަން ފާހަގަ ނުކުރާހާ ހިނދަކު، ފަނޑިޔާރަށް އަމިއްލައަށް ވަކި ކުށެއް ސާބިތުވޭތޯ ބެލުމަކީ ޖިނާއީ އިޖުރާއަތުގެ ތަރުތީބާ ހިލާފު ކަމެއް
އެނގުން މުހިންމު - އެ މައްސަލާގައި ހަ މީހެއްގެ މައްޗަށް ދައުލަތުން ދައުވާކުރި ނަމަވެސް، ޔާމީން މަރާލުމުގެ ކުށް ސާބިތުވީ ދެ މީހުންގެ މައްޗަށް އެކަންޏެވެ. އެއީ:
-
1-
އިސްމާއިލް ހައިޝަމް ރަޝީދު، ހ. އަންނާރުމާގެ
-
2-
އަހުމަދު ޒިހާން އިސްމާއިލް، ހުޅުމާލޭ ލޮޓް 11399
އެ ދެ މީހުންގެ ފަރާތުން ވެސް ހައި ކޯޓުގައި މައްސަލަ އިސްތިއުނާފު ކޮށްފައިވެ އެވެ. އެއް ހާދިސާއެއްގެ އިސްތިއުނާފުތަކަށް ވާތީ، ހައި ކޯޓުގައި ޝަރީއަތް ކުރިއަށް ގެންދަނީ އެކުގަ އެވެ.
ޔާމީން ރަޝީދުގެ ތަހުގީގުގެ ބައެއް ކަންކަމާއި ޕްރޮސެކިއުޝަންގެ ބައެއް ކަންކަން ވެސް "ދޯދިޔާކޮށް" ގޮސްފައިވާކަން ފާހަގަކޮށް، ދައުލަތުން އިހުމާލުތަކެއް ވެފައިވާ ކަމަށް އެ މައްސަލައިގައި ކްރިމިނަލް ކޯޓުން ކުރި ހުކުމްގައި ވެސް ފާހަގަކޮށްފައިވެ އެވެ.
ފަސް މަންޒަރު - ޔާމީން ރަޝީދު މަރާލީ 23 އޭޕްރީލް 2017 ވަނަ ދުވަހުގެ ރޭ ދަންވަރު، އޭނާ ދިރިއުޅުނު ގޭގެ ސިޑިގޮޅި ތެރޭގަ އެވެ. އޭނާ މަރާލީ ރާއްޖޭގައި ދީނުގެ ނަމުގައި ހަރަކާތްތެރިވާ 'ހަރުކަށި ފިކުރު'ގެ ބައެއް ކަމަށް ތުހުމަތު ކޮށްފައިވެ އެވެ.