ހައި ކޯޓު(ދައުރު ފޮޓޯ/ އަޒްމީ)
ދަށު ކޯޓުތަކުގެ ފަނޑިޔާރުން ގައުން ބޭނުންކުރަން ފަށާ މުއްދަތު ފަސްކޮށްފި
ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ގައުން ބޭނުންކުރަން ފަށާ މުއްދަތު އަންނަ އަހަރަށް ފަސްކޮށްފި އެވެ.
ވީ ކިހިނެއް؟ - ދަށު ކޯޓުގެ ފަނޑިޔާރުން ވެސް ޝަރީއަތުގެ މަޖިލީހުގައި ގައުން ތުރުކުރައްވަން ޖެހޭ ގޮތަށް އުސޫލެއް އެކުލަވާލައި އާންމުކުރީ މިދިޔަ 9 ޖޫންގަ އެވެ.
'ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ހެދުން އެޅުމުގެ އުސޫލު'ގެ ނަމުގައި އެކުލަވާލި މި އުސޫލުގެ ދަށުން:
-
ފަނޑިޔާރުން ޝަރީއަތުގައި ގައުން ބޭނުންކުރަން ފަށަން ޖެހޭ ގޮތަށް އޭރު އޮތީ އަންނަ މަހުގެ 1 ވަނަ ދުވަހުން ފެށިގެން
-
ނަމަވެސް މި އުސޫލަށް މިއަދު ގެނައި އިސްލާހުގައި ވަނީ އެ ތާރީހު އަންނަ އަހަރުގެ 1 ޖެނުއަރީއަށް ފަސްކޮށްފައި
މި ތާރީހު ފަސްކުރި ސަބަބެއް އަދި ސާފެއް ނުވެ އެވެ.
އެނގުން މުހިންމު - މި އުސޫލު އެކުލަވާލުމުގެ ކުރިން ޝަރީއަތުގެ މަޖިލީހަށް ހާއްސަކުރެވިފައިވާ ގައުންއެއް ތުރުކުރައްވަމުންދިޔައީ ސުޕްރީމް ކޯޓާއި ހައި ކޯޓުގެ ފަނޑިޔާރުން އެކަންޏެވެ. ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ތިއްބަވަނީ ކޯޓު ފަޓުލޫނުގަ އެވެ.
ސުޕްރީމް ކޯޓުން މިދިޔަ ޖޫން މަހު އާންމުކުރި އުސޫލުގައިވާ ގޮތުން، އެ އުސޫލުގައި ބުނާ ތާރީހުން ފެށިގެން ޝަރީއަތުގެ މަޖިލީހުގައި ދަށު ކޯޓުގެ ފަނޑިޔާރުން ތިއްބަވަން ޖެހޭނީ ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ތައްޔާރުކުރާ ނަމޫނާއާ އެއްގޮތަށް ތައްޔާރުކޮށްފައިވާ ގައުނެއް ތުރުކުރައްވައިގެންނެވެ.
އެ ގައުންގެ ނަމޫނާ އާންމުކުރަންވާނެ ކަމަށާއި އުސޫލަށް އަމަލުކުރަން ފަށާ ތާރީހުން ފެށިގެން ހަތަރު މަސް ދުވަހުގެ ތެރޭގައި އެ ގައުން ފަނޑިޔާރުންނަށް ފޯރުކޮށްދޭންޖެހޭނެ ކަމަށް ވެސް އުސޫލުގައިވެ އެވެ. ނަމަވެސް މިހާތަނަށް ދަށު ކޯޓުތަކުގެ ފަނޑިޔާރުން ތުރުކުރައްވަންޖެހޭ ގައުންގެ ނަމޫނާ ޑީޖޭއޭ އިން އާންމުކޮށްފައެއް ނުވެ އެވެ.
ކޮމެންޓް