އެކްސިޑެންޓުތައް ގިނަ މަގުތަކުގައި 24 ގަޑިއިރު ފުލުހުން ފޯރިމަރަން ފަށައިފި

މާލޭ ސަރަހައްދުގައި އެންމެ އާއްމުކޮށް އެކްސިޑެންޓުތައް ހިނގާ މަގުތަކުގައި 24 ގަޑިއިރު ފުލުހުން ފޯރިމަރަން ފަށައިފި އެވެ.

ވީ ކިހިނެއް؟ - މި ފަހުން މާލެ އާއި ހުޅުމާލޭގައި ވަނީ ނުރައްކާތެރި ގިނަ އެކްސިޑެންޓުތަކެއް ހިނގާފަ އެވެ. އެގޮތުން، މިދިޔަ ބުރާސްފަތި ދުވަހުގެ ރެ އާއި ހުކުރު ދުވަހުގެ ރޭ ހިނގި ދެ އެކްސިޑެންޓެއްގައި ދެ ޒުވާނަކު ވަނީ މަރުވެފަ އެވެ. 

ބުނީ ކީކޭ؟ - ޕޮލިސް ކޮމިޝަނަރު އަލީ ޝުޖާއު ވިދާޅުވީ ނުރައްކާތެރި އެކްސިޑެންޓުތައް މަދުކުރުމަށް، އެންމެ ގިނައިން އެ ފަދަ ހާދިސާތައް ހިނގާ މަގުތަކުގައި ރެއިން ފެށިގެން ފުލުހުން ފޯރިމަރަން ފަށާފައިވާ ކަމަށެވެ.

"ރައްޔިތުންގެ ރައްކާތެރިކަން ކަށަވަރުކުރުމަށް އަޅުގަނޑުމެންނަށް ކުރެވެން އޮތްހާ ކަމެއް ކުރާނަން. 24 ގަޑިއިރު ފުލުހުން ބައިތިއްބައިގެން ވެސް އެކްސިޑެންޓުތައް މަދުކުރެވޭތޯ މަސައްކަތް ކުރާނަން،" ޝުޖާއު ވިދާޅުވި އެވެ.

ބުރާސްފަތި ދުވަހުގެ ރޭ ނުރައްކާތެރި އެކްސިޑެންޓު ހިނގާފައިވަނީ މާލޭގައި ނަމަވެސް، ކޮމިޝަނަރު ވިދާޅުވީ މި ފަހުން އެންމެ ގިނަ އެކްސިޑެންޓުތައް ހިނގާފައިވަނީ ބްރިޖު ހައިވޭގައި ނުވަތަ ހުޅުމާލޭގެ ބައެއް މަގުތަކުގަ އެވެ. އެހެންވެ، އެ ތަންތަނުގައި މިހާރު 24 ގަޑިއިރު ފުލުހުން ތިބޭނެ ކަމަށް އޭނާ ވިދާޅުވި އެވެ.

އެންމެ ގިނައިން އެކްސިޑެންޓުތައް ހިނގާމަގުތަކުގެ ގޮތުގައި ޝުޖާއު ފާހަގަ ކުރެއްވީ:

ޝުޖާއު ވިދާޅުވި ގޮތުގައި މި ފަހުން އެންމެ ނުރައްކާތެރި އެކްސިޑެންޓުތައް ހިނގަނީ ހުޅުމާލޭ ދެ ވަނަ ފިޔަވަހީގަ އެވެ. އެ ސަރަހައްދުގެ މަގުތައް ހުންނަ ގޮތުން، ވެސް ގިނަ ޒުވާނުން އެތަނުގައި ދުއްވަނީ ހައިވޭގައި ދުއްވާ ސްޕީޑަށް، އެ ބާރުމިނުގަ އެވެ. މާލެ އާއި ފުރަތަމަ ފިޔަވަހީގެ މަގުތަކާ ހިލާފަށް، ދެ ވަނަ ފިޔަވަހީގެ މަގުތަކުގައި ކެމެރާ ހަރުކޮށްފައި ނެތުމުން، އެކަން އިތުރު ހިތްވަރަކަށް އެ މީހުންނަށް ވާ ކަމަށް އޭނާ ވިދާޅުވި އެވެ.

ހުޅުމާލޭ ދެވަނަ ފިޔަވަހީގެ މަގުތަކުގައި ކެމެރާ ހަރުކުރުމުގެ މަސައްކަތް އެޗްޑީސީން ކުރަން ނިންމާފައި ވާއިރު، އެ މަގުތަކުގައި ފުލުހުން ބޭތިއްބުމުން، ބާރަށް ދުއްވާ އުޅަނދުތައް ދެނެގަނެވި، ފިޔަވަޅު އެޅޭނެ ކަމަށް ކޮމިޝަނަރު ގަބޫލު ކުރައްވަ އެވެ.

"ކުރިން ވެސް އަޅުގަނޑުމެން [މަގުތަކުގައި] ފުލުހުން ބައިތިއްބަން. އެކަމަކު އެއީ ސްކޫލުތަކާއި އޮފީސްތައް ހުޅުވޭ އަދި ނިމޭ ވަގުތުގައި. މިހާރު ފާހަގަ ކުރެވޭ މަގުތަކުގައި 24 ގަޑިއިރު ފުލުހުން ތިބޭނެ،" ޝުޖާއު ވިދާޅުވި އެވެ.

ކޮމިޝަނަރު ވިދާޅުވީ ހަފުތާ ބަންދު ދުވަސްތަކުގައި، މާލެ އާއި ހުޅުމާލޭގައި ބާރު ސްޕީޑުގައި ނުވަތަ އަޑުގަދަކޮށް ދުއްވާ އުޅަނދުތަކުގެ އުނދަގޫ ބޮޑުވެފައިވާ ކަމަށެވެ. އެކަން ކޮންޓްރޯލް ކުރުމަށް، ކޮންމެ ހަފުތާ ބަންދެއްގައި ހައިވޭތަކާއި މަގުތަކުގައި ވެހިކަލް ޗެކް ޕޮއިންޓު (ޕީވީސީ)ތައް ހަދާ ކަމަށާއި، އެގޮތަށް ދުއްވާ ބައެއް އުޅަނދުތައް މިހާރު ފާހަގަ ކުރެވިފައިވާ ކަމަށް ވިދާޅުވި އެވެ.

"އެކަމަކު އެކަމުގައި ވެސް ދިމާވާ މައްސަލައަކީ ޕީވީސީ ޖެހިޔަސް، ވަރަށް އަވަހަށް އެތަން އެބަ ދެނެގަނޭ. އެހެންވެ، އޭގައި ނުޖެހެން، އެހެން މަގުތަކުން ދުއްވާފައި މިދަނީ،" ޝުޖާއު ވިދާޅުވި އެވެ.

"މި މައްސަލަތަކަށް ހައްލެއް ގެނެވޭނީ ހުރިހާ ފަރާތްތަކުން ވެސް ގަވައިދަށް ހުރުމަތްތެރިކޮށް ހިތައިގެން."

ނުރައްކާތެރި އެކްސިޑެންޓުތައް ގިނަވަމުން ދާއިރު އޭގެ ސަބަބުން، އާއިލާތަކަށް ފޫނުބެއްދޭވަރުގެ ގެއްލުންތައް ލިބުމަކީ ފުލުހުން ވަރަށް ކަންބޮޑުވާ ކަމެއްކަމަށް ކޮމިޝަނަރު ވިދާޅުވި އެވެ.