ޔާމީން އަޅުގަނޑާ ގުޅޭ ގޮތުން ދައްކަވާ ވާހަކަތަކާ މެދު ހައިރާންވޭ: ރައީސް

ކުރީގެ ރައީސް އަބްދުﷲ ޔާމީން، ރައީސް މުހައްމަދު މުއިއްޒުއަށް އަމާޒުކުރައްވާ ދައްކަވާ ވާހަކަތަކާ މެދު ހައިރާންވާ ކަމަށާއި ޔާމީންއާ މެދު އަބަދުވެސް ހިތުގައި އޮތީ ގަދަރު ކަމަށް އެ މަނިކުފާނު މިރޭ ވިދާޅުވެއްޖެ އެވެ.

ވީ ކިހިނެއް؟ - ޕީއެންއެފްއިން ބާއްވާ ޖަލްސާތަކުގައި ރައީސް މުއިއްޒުއާ ގުޅުވާ އެ ޕާޓީގެ މެމްބަރުންނާއި ޔާމީން ތަފާތު އެކި ތުހުމަތުތައް ކުރައްވަ އެެވެ. މި ސަރުކާރުން ކުރައްވާ ކަންކަމަށް ފާޑުކިޔައި ޕްރެޒެންޓޭޝަންތައް މެދުވެރިކޮށް އެ މަނިކުފާނުގެ ފޮޓޯ ބޭނުންކޮށްގެން ޖޯކު ވެސް ޖައްސަވަ އެވެ.

މި ޖަލްސާތަކުގައި:

ބުނީ ކީކޭ؟ - މިރޭ ސަންގް ޓީވީއަށް ރައީސް މުއިއްޒު ދެއްވި ހާއްސަ އިންޓަވިއުގައި މިކަމާ ގުޅޭ ގޮތުން ސުވާލުކުރުމުން ރައީސް ވިދާޅުވީ ޔާމީންގެ ފަރާތްޕުޅުން އެކަހަލަ ވާހަކަތައް އަޑުއިވިވަޑައިގަންނަވާތީ ވަރަށް ހައިރާންވާ ކަމަށެވެ. 

އަދީބުގެ އަތުން ޖާސޫސް ކުރުމަށް ފައިސާ ނެންގެވި ކަމަށް ދެކެވޭ ވާހަކަތަކާ ގުޅޭ ގޮތުން ރައީސް ވިދާޅުވީ އެ މަނިކުފާނަކީ މީހަކަށް ޖާސޫސް ކުރި މީހެއް ނޫން ކަމަށާއި އެކަން ނުވެސް ކުރައްވާނެ ކަމަށެވެ. އަދި އެއްވެސް މީހެއްގެ އަތުން ފައިސާ ހޯދާފައި ވެސް ނުވާނެ ކަމަށް ވިދާޅުވި އެވެ.

އަދީބަކީ އެއްވެސް އިރެއްގައި މާ ގާތްގުޅުމެއް އޮންނަ ބޭފުޅެއް ނޫން ކަމަށާއި، ބައްދަލުވަނީ ހަމައެކަނި ވަޒީރުންގެ ބައްދަލުވުމުގެ ތެރެއިން އެކީގައި މަސައްކަތްކުރެއްވި ބޭފުޅެއްގެ ހައިސިޔަތުން ކަމަށް ރައީސް ވިދާޅުވި އެވެ. އޭގެ ބޭރުން އެއްވެސް ބައްދަލުވުމެއް ބާއްވައި މަޝްވަރާތަކެއް ވެސް އެކީގައި ކުރެވިފައި ނުވާނެ ކަމަށާއި ފިނިފެންމާ ހާދިސާއަށް ފަހު އަދީބާ މިހާތަަނަށް ބައްދަލުވެފައި ވެސް ނުވާ ކަމަށް ވިދާޅުވި އެވެ.

"ހަމަ ޔަގީނުން ވެސް އެ މަނިކުފާނަށް މައުލޫމާތު ދެއްވާ ބޭފުޅުން ހަމަ ކަނޑައެޅިގެން ދޮގު މައުލޫމާތު އެ ދެއްވަނީ. އަޅުގަނޑު ހައިރާންވޭ އެ ވާހަކަތައް އެ މަނިކުފާނު ގަބޫލުުކުރައްވާތީ ވެސް،" ރައީސް ވިދާޅުވި އެވެ.

ރައީސް އިތުރަށް ވިދާޅުވީ:

"މާތްﷲ ދެނެވޮޑިގެންވާނީ [ޔާމީންއަށްޓަކައި ކުރެއްވި ހިލާސްތެރި މަސައްކަތް]. އެހެންވީމާ އަޅުގަނޑު ހައިރާންވޭ އެކަަހަލަ ވާހަކަ ވިދާޅުވާތީ،" ރައީސް ވިދާޅުވި އެވެ.

ޔާމީން ޖަލުގައި ބޭއްވުމަށް މަސައްކަތްކުރައްވާ ކަމަށް ކުރައްވާ ތުހުމަތުތަކާއި ގުޅިގެން ވެސް ހައިރާންވާ ކަމަށް ރައީސް މިރޭ ވިދާޅުވި އެވެ. އެގޮތުން އެ މަނިކުފާނަކީ ޔާމީންގެ މައްޗަށް މިދިޔަ ސަރުކާރުގައި ޝަރީއަތްތައް ކުރަން ފެށީއްސުރެ ދިފާއުގައި އެންމެ ކައިރީގައި ހުންނެވި އެކަކު ކަމަށް ވިދާޅުވި އެވެ. 

ޔާމީން މިނިވަންވުމާ ހަމައަށް މިހާތަނަށް ގިނަ މަސައްކަތްތަކެއް ކުރައްވާފައިވާނެކަން ފާހަގަކުރައްވާ ވިދާޅުވީ އެ މަނިކުފާނު މިނިވަންކޮށްދެއްވުމަށް އެދި ކުރީގެ ރައީސް އިބްރާހިމް މުހައްމަދު ސޯލިހުގެ އަރިހުގައި އާދޭސް ދެންނެވިކަން އެ މަނިކުފާނަށް ވެސް އެނގިވަޑައިގަންނަވާނެ ކަމަށެވެ. އަދި އެކަމަށްޓަކައި ކުރެއްވި މެސެޖުތައް ފޯނުގައި ހުންނާނެ ކަމަށް ވިދާޅުވި އެވެ.

މީގެ އިތުރުން، ޔާމީން މިހާރު ވެސް މިނިވަންވެފައި އެ ހުންނަވަނީ އެ މަނިކުފާނު ޝަރީއަތަށް ނުފޫޒު ނުފޯރުވާތީ ކަމަށް ރައީސް ވިދާޅުވި އެވެ. ކްރިމިނަލް ކޯޓުގައި މިފަހުން އަލުން ޝަރީއަތްތައް ފެށިކަން ވެސް އެނގުނީ މީޑިއާތަކުން ކަމަށް ރައީސް ވިދާޅުވި އެވެ.

ވެރިކަމަށް ކުރިމަތިލައްވަން ޖެހުނީ ޔާމީންއަށް އެ ފުރުސަތު ބަންދުވުމުން ކަމަށާއި އޭގެ ކުރިން އެންމެ ފަހު ވަގުތާ ޖެހެންދެން ވެސް ހުންނެވީ ކެންޑިޑޭޓެއްގެ ގޮތުގައި ޔާމީން ގަބޫލުކުރައްވައިގެން އެ މަސައްކަތް ކުރަން ކަމަށް ރައީސް ވިދާޅުވި އެވެ. އިންތިހާބު ކާމިޔާބު ވުމުން ވެސް ފުރަތަމަ ވެސް ގޮވާލެއްވީ ޔާމީންގެ މިނިވަންކަމަށް ކަމަށް ރައީސް ވިދާޅުވި އެވެ.

"އޭރު ވެސް މިއަދު ވެސް އަދި މާދަމާ ވެސް އަޅުގަނޑުގެ ހިތުގައި އެ މަނިކުފާނަށް އޮންނާނީ ގަދަރު. އަބަދު ވެސް އޮންނާނީ ގަދަރު،" ރައީސް ވިދާޅުވި އެވެ.