ސިޔާމްގެ އެހީގައި ކަމަދޫ ރައްޔިތުންނަށް ހިލޭ ބޭސްފަރުވާކޮށް ދެނީ

ސަން ސިޔާމް ރިސޯޓްސްގެ ވެރިޔާ އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދުގެ އެހީގައި ބ. ކަމަދޫގެ ހުރިހާ ރައްޔިތުންނަށް ހިލޭ ބޭސްފަރުވާ ކުރެވޭނެ ގޮތް ހަމަޖައްސައިދީފި އެވެ.

ވީ ކިހިނެއް؟ - އެކަން އިއުލާނުކޮށް އެ ރަށު ކައުންސިލުން މިދިޔަ ހަފްތާގެ އަންގާރަ ދުވަހު ވަނީ އިއުލާނެއް ނެރެފަ އެވެ. 

ތަފްސީލް - އެ އިއުލާނުގައި ބުނެފައިވާ ގޮތުން ސަން ސިޔާމް ކެއާގެ ދަށުން ރާއްޖޭންނާއި ރާއްޖޭން ބޭރުން ބޭސްފަރުވާ ކުރުމަށް މާލީ އެހީތެރިކަން ބޭނުންވާ މީހުންނަށް ކަނޑައެޅޭ އުސޫލެއްގެ ދަށުން އެ އެހީތެރިކަން ދޭން ވަނީ ސިޔާމް ނިންމަވައިފަ އެވެ.

އެ އެހީގެ ދަށުން އެހީތެރިކަން ބޭނުންވާ މީހުންނަށް އެކަމަށް ހާއްސަ ފޯމެއް ކައުންސިލުން ލިބެން ހުންނާނެ ކަމަށް އެ އިއުލާނުގައި ބުނެފައިވެ އެވެ.

ކައުންސިލްގެ ބަސް - އެކަމާ ގުޅޭގޮތުން ކަމަދޫ ކައުންސިލްގެ ރައީސް ހަސަން ޒަރީރު މިއަދު 'ދައުރު'އަށް ވިދާޅުވީ އެ ރަށު ރައްޔިތުންނަށް ސިއްހީ ފަރުވާ ހޯދުމަށް ބޭނުންވާ އެހީތެރިކަން ސަން ސިޔާމް ކުންފުނިން ހަމަޖައްސައިދިނީ އެކަމާ ގުޅޭގޮތުން ކައުންސިލާއެކު މަޝްވަރާ ބައްދަލުވުންތަކެއް ބޭއްވުމަށް ފަހު ކަމަށެވެ.

އެ ޕްރޮގްރާމްގެ ދަށުން އެހީ ލިބޭނެ މިންވަރާއި ހާލަތްތައް ކަނޑައަޅާނީ ސަން ސިޔާމް ކުންފުނިން ބަލަންޖެހޭ ކަންކަމަށް ބެލުމަށް ފަހު ކަމަށް އޭނާ ވިދާޅުވި އެވެ. އަދި އެންމެ ބޭނުން ޖެހިފައިވާ މީހުންނަށް އެހީތެރިކަން ހޯދައިދޭން ކައުންސިލުން މަސައްކަތް ކުރާނެ ކަމަށް ވެސް އޭނާ ވިދާޅުވި އެވެ.