ޝިޔާމްގެ ފޮތް އަލަމާރީގައި ހުރި 700 ފޮތް ގައުމީ ކުތުބުހާނާއަށް

ސަރުކާރަށް ގިނަ ދުވަސްތަކެއް ވާންދެން ހިދުމަތް ކުރެއްވި އަހުމަދު ޝިޔާމް ގެންގުޅުއްވި 700 ފޮތް ގައުމީ ކުތުބުހާނާއަށް އިއްޔެ ހަދިޔާ ކުރައްވައިފި އެވެ.

ތަފްސީލް - ލިޔުންތެރިއެއްގެ ގޮތުގައި ވެސް މަސައްކަތް ކުރެއްވި ޝިޔާމް ހަދިޔާ ކުރެއްވި ފޮތްތަކުގެ ތެރޭގައި އިލްމީ ފޮތާއި ވާހަކަ ފޮތާއި ތާރީހީ އަދި ދީނީ ފޮތާއި ކެއްކުމާ ގުޅޭ ފޮތާއި މަޖައްލާތައް ހިމެނެ އެވެ. އަދި އެކި ބޭބޭފުޅުން ދެއްވާފައިވާ ތަގުރީރުތަކާއި އެކި މުނާސަބާތަކާ ގުޅިގެން ނެރެފައިވާ ފޮތާއި އޭނާ އަމިއްލައަށް ލިޔުއްވި ބައެއް ފޮތް ވެސް ހިމެނެ އެވެ.

"މިއީ އަޅުގަނޑުގެ ހަޒާނާއެއް. އެކަމަކު ހިތަށް އެރީ އަޅުގަނޑުގެ އަތުގައި މި ބެހެއްޓުމަށް ވުރެ ދެން ރަނގަޅުވާނީ ކުތުބުހާނާގައި، ގިނަ ބަޔަކަށް ފެންނާނެހެން ބެހެއްޓިއްޔާއޭ،" އިންފޮމޭޝަން ކޮމިޝަނަރުގެ އޮފީހާއި ސަރުކާރުގެ އެހެން ބައެއް އޮފީސްތަކުގައި އިސްކޮށް، 40 އަހަރު ހިދުމަތް ކުރެއްވުމަށް ފަހު މިހާރު ރިޓަޔާ ކުރައްވައިގެން ހުންނެވި ޝިޔާމް ވިދާޅުވި އެވެ.

އޭނާ ވިދާޅުވި ގޮތުގައި ފޮތް ކިޔުއްވުމާއި އެއްކުރެއްވުމަށް އޭނާ ވަރަށް ބޮޑަށް ލޯބި ކުރައްވަ އެވެ. އެކަމަކު ގޭގައި ހުރި ދެތިން ފޮތް އަލަމާރީގައި ހުރި ފޮތް، އޭނާ ނެތް ދުވަހަކުން ކުތުބުހާނާއަށް ހަދިޔާ ކުރެއްވުމަށް ގެންގުޅުއްވި ވިސްނުން ބަދަލު ކުރައްވައި، އިއްޔެ އެ ހުރިހާ ފޮތްތަކެއް ދެއްވީ ކަމަށް ވިދާޅުވި އެވެ.

ޝިޔާމް ވިދާޅުވި ގޮތުގައި އޭނާ ވަރަށް ލޯބިން ގެންގުޅުއްވި މި ފޮތްތައް ކުތުބުހާނާއަށް ހަދިޔާ ކުރެއްވުމުގެ އެންމެ ބޮޑު މަގްސަދަކީ އެހެން މީހުންގެ ހިތުގައި ވެސް މި ޝައުގު އާލާކުރުމެވެ.

"ގިނަ ފަހަރަށް ވާގޮތަކީ، ފޮތް ގެންގުޅޭ އަދި ރައްކާކުރާ މީހުން މަރުވެ ދިޔުމުން، ދެން ތިބޭ ބަޔަކު އެ އުކާލަނީ. އޭގެ ސަބަބުން އެ ފޮތް ކިޔާލަން ބޭނުންވާ މީހުންނަށް ފުރުސަތު ގެއްލިގެން ދޭ،" މިހާރު ޕަބްލިޝަރެއްގެ ގޮތުގައި މަސައްކަތް ކުރައްވާ ޝިޔާމް ވިދާޅުވި އެވެ.

"އެކަމަކު މިގޮތަށް ކުތުބުހާނާގައި ފޮތްތައް އަރުޝީފް ކުރެވުމުން، ބޭނުންވާ އެތައް ބަޔަކަށް އެ ފޮތް ކިޔުމުގެ ފުރުސަތު ލިބޭނެ."

ޝިޔާމް އިތުރަށް ވިދާޅުވި ގޮތުގައި:

ޝިޔާމް ވިދާޅުވީ ފޮތް އަލަމާރި ހުސްވުމުން ފަޅުކަން އިހުސާސް ކުރެއްވުނު ކަމަށާއި އެކަމަކު އޭނާ އެކަން ކުރެެއްވީ "ހެޔޮހިތުން، ހިނިތުންވެ" ހުންނަވާ ކަމަށެވެ.