އަނަސްގެ މަރު: އިސްތިއުނާފް ޝަރީއަތް ފަށައިފި

މާލޭގައި މީގެ ހަ އަހަރު ކުރިން ތޫނު އެއްޗަކުން ހަމަލާދީ މުހައްމަދު އަނަސް މަރާލި މައްސަލާގައި ތުހުމަތުކުރެވޭ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން އިއްވި ހުކުމްގެ އިސްތިއުނާފް ޝަރީއަތް މިއަދު ހައި ކޯޓުގައި ފަށައިފި އެވެ.

ވީ ކިހިނެއް؟ - އަނަސް، ފެންފިޔާޒުގެ، ރ. މީދޫ، އަނިޔާވެރި ގޮތަކަށް މަރާލީ 31 ޖުލައި 2017ގަ އެވެ. މި މައްސަލާގައި ކްރިމިނަލް ކޯޓުގައި ހަތް މީހެއްގެ މައްޗަށް ދެ ބާވަތެއްގެ ދައުވާ އުފުލި އެވެ. އެއީ:

ގަސްތުގައި މީހަކު މަރާލުމުގެ ދައުވާ:

ގަސްތުގައި މީހަކު މަރާލުމުގައި ބައިވެރިވުމުގެ ދައުވާ:

އަނަސްގެ މަރަށް ހަ އަހަރު ފަހުން، މިދިޔަ 25 ފެބްރުއަރީގައި ކްރިމިނަލް ކޯޓުން މި މައްސަލާގައި އިއްވި ހުކުމުގައި ވަނީ އެ އެންމެންގެ މައްޗަށް ވެސް ކުށް ސާބިތުނުވާ ކަމަށް ނިންމާފަ އެވެ.

މި ނިންމުން ޕްރޮސިކިއުޓާ ޖެނަރަލް (ޕީޖީ) އޮފީހުން ހައި ކޯޓުގައި އިސްތިއުނާފް ކުރީ މިދިޔަ 16 މެއިގަ އެވެ. 

ތަފްސީލް - ހައި ކޯޓުގައި މިއަދު ޝަރީއަތް ފެށި ނަމަވެސް، އަޑުއެހުން ކުރިއަށް ގެންދެވޭ ގޮތެއް ނުވި އެވެ. އެއީ މި މައްސަލާގައި ހިމެނޭ ބައެއް މީހުން ވަކީލުން އައްޔަން ކުރަން އިތުރު ފުރުސަތެއް ދިނުމަށް އެދިފައިވާތީ އެވެ.

މި މައްސަލަ ހައި ކޯޓުގައި ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ރިޔާސަތު ފަނޑިޔާރު މުހައްމަދު ޝަނީޒް އަބްދުﷲ ވަނީ ވަކީލުން އައްޔަންކުރަން ހަފްތާއެއްގެ މުއްދަތު ދެއްވައިފަ އެވެ. އަދި ހަފްތާއެއް ފަހުން އިތުރު އަޑުއެހުމެއް ބާއްވާއިރު ވަކީލުން އައްޔަންކޮށްފައިނުވި ނަމަވެސް މައްސަލަަ ކުރިއަށް ގެންދަވާނެ ކަމަށް ފަނޑިޔާރު ވިދާޅުވި އެވެ.

ފާހަގަކޮށްލެވޭ - ކުށް ސާބިތުނުވާ ކަމަށް ދަށު ކޯޓުން ނިންމުމުން، ތުހުމަތުކުރެވޭ އެންމެން މިނިވަންވެފައިވާތީ، އިސްތިއުނާފީ ޝަރީއަތް ނިމެންދެން އެ މީހުން އަލުން ބަންދުކޮށްދިނުމާ މެދު ގޮތެއް ނިންމައިދިނުމަށް ދައުލަތުން ހައި ކޯޓުގައި އެދިފައި ވެ އެވެ. ފަނޑިޔާރު ޝަނީޒް ވިދާޅުވީ މިއަދު ޝަރީއަތް ފެށިއިރު ބައެއް މީހުންގެ ވަކީލުން ހަަމަޖެހިފައިނުވާތީ، އެކަމަށް ފުރުސަތު ދެއްވުމަށް ފަހު، ދެން އަންނަ އަޑުއެހުމެއްގައި އެކަމާ މެދު ގޮތެއް ނިންމަވާނެ ކަމަށެވެ. ދައުލަތުން އެކަމަށް އިއުތިރާޒް ކޮށްފައެއް ނުވެ އެވެ.

ފަސްމަންޒަރު - މި މައްސަލާގައި ކުށް ސާބިތުވެ ހުކުމް އިއްވާފައިވާ ހަމައެކަނި ކުއްޖާގެ އަދަބު ކުރީގެ ރައީސް އިބްރާހިމް މުހައްމަދު ސޯލިހު ލުއިކޮށްދެއްވާފައި ވަނިކޮށް، އެ މައްސަލައިގައި ތުހުމަތުކުރެވޭ އެހެން އެންމެން ވެސް ހަ އަހަރު ފަހުން މިނިވަންވެގެން ދިއުމުން އާއިލާއިން ވަނީ ކަންބޮޑުވުން ފާޅުކޮށްފަ އެވެ.

އެނގުން މުހިއްމު - ކުށް ސާބިތުނުވެގެން ދޫކޮށްލާފައި ވަނިކޮށް، މިފަހުން ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި، މި މައްސަލާގައި ހިމެނޭ ދެ މީހަކު ހައްޔަރު ވެސް ކުރި އެވެ.