ޗައިނާއިން ބުނާ ވަގުތީ ދަތިކަމަކީ މި ސަރުކާރުގެ މިސްމެނޭޖްމަންޓް: ޝާހިދު

ރާއްޖެއަށް ކުރިމަތިވެފައިވަނީ ވަގުތީ ދަތިކަމެއްކަން އެނގޭ ކަމަށް ޗައިނާއިން ބުނާ ވާހަކަ ނިސްބަތްވަނީ މި ސަރުކާރުގެ މިސްމެނޭޖްމަންޓަށް ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.

ވީ ކިހިނެއް؟ - ނިމިދިޔަ އެމްޑީޕީ ސަރުކާރުގެ ތިން ވަޒީރަކާ އެކު މިރޭ އެ ޕާޓީން 'ހަވަރު ބެރު'ގެ ނަމުގައި ޕެނަލް ޑިސްކަޝަންއެއް ވަނީ ބާއްވާފަ އެވެ. ބައިވެރިވެވަޑައިގެންނެވީ ޝާހިދު އާއި އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް އާއި ކުރީގެ ފިނޭންސް މިނިސްޓަރު އިބްރާހިމް އަމީރު އެވެ.

ތަފްސީލު - ޝާހިދު ވިދާޅުވީ އެމްޑީޕީގެ ވެރިކަން ނިމުނުއިރު ރާއްޖޭގެ އިގްތިސާދީ މިސްރާބު ހުރީ ރަނގަޅަށްކަން ދުނިޔޭގެ މާލީ ހުރިހާ އިދާރާތަކުން ވެސް ގަބޫލުކުރާ ކަމަށެވެ.

ޝާހިދުގެ ވާހަކައިގައި އިޝާރާތްކުރެއްވީ ޗައިނާއަށް ކުރެއްވި ދަތުރުފުޅަކަށް ފަހު ފޮރިން މިނިސްޓަރު މޫސާ ޒަމީރު ދެއްކެވި ވާހަކައަކަށެވެ.

ޕީއެސްއެމްގެ 'ރާއްޖެ މިއަދު' ޕްރޮގްރާމްގެ އެޕިސޯޑެއްގައި ޒަމީރު ވިދާޅުވީ ރާއްޖެއަށް މިވަގުތު ކުރިމަތިވެފައިވާ ދަތިކަމަކީ ވަގުތީ ކަމެއްކަން، ޗައިނާގެ ބޮޑުވަޒީރު ފާހަގަކުރެއްވި ކަމަށެވެ.

"އެ ބޭފުޅުންނަށް ވެސް، ޗައިނާގެ ރައީސްއަށް ވެސް އެނގިވަޑައިގަންނަވާ ރާއްޖޭގެ އިގްތިސާދުގައި، ކުރީގެ ސަރުކާރު ނިމުނުއިރު ހަމަ ހުރިހާ ކަމެއް ރަނގަޅުކަން. ވަގުތީ ދަތިތަކެއް ދިމާވެގެން މި އުޅެނީ، އެއީ [މި ސަރުކާރުގެ] މިސްމެނޭޖްމަންޓް،" ޒަމީރުގެ އެ ވާހަކައާ ގުޅުވައިގެން ޝާހިދު ވިދާޅުވި އެވެ.

އެ ޕެނަލް ޑިސްކަޝަންގައި ކުރީގެ މިނިސްޓަރު އަމީރު ވިދާޅުވީ މިހާރު ރާއްޖެއަށް ކުރިމަތިވެފައި އޮތް އިގްތިސާދީ ދަތި ހާލަތަށް ޒިންމާވާން ޖެހޭނީ މި ސަރުކާރުން ކަމަށެވެ.

"މިދިޔަ އަށް މަސް ތެރޭގައި، ހަގީގަތުގައި މި ބޭފުޅުންގެ [މި ސަރުކާރުގެ] ނާގާބިލުކަމުން އަމިއްލައަށް އެ ބޭފުޅުން ކޮނުނު އަނދަވަޅަކަށް ގައުމުގެ އިގްތިސާދު ވެއްޓިގެން މި އުޅެނީ. އަމިއްލައަށް މެނޭޖުކުރަން ނޭނގިގެން، މި ބޭފުޅުން ގެނައި ސިޔާސަތުތަކުގެ ސަބަބުން،" އަމީރު ވިދާޅުވި އެވެ.

އެހެން ދިމާވި ސަބަބުތަކުގެ ގޮތުގައި އަމީރު ފާހަގަކުރެއްވި ކަންތައްތަކަކީ:

އަމީރު ވިދާޅުވީ ސިޔާސީ މަގާމުތައް ދިނުމުގެ އިތުރަށް ވެސް ވަރަށް ބައިވަރު ބޭކާރު ހަރަދުތައް މި ސަރުކާރުން ކޮށްފި ކަމަށާއި މިހާރު އޮތް ހާލަތުގައި ރާއްޖޭގެ އިގްތިސާދީ ހާލަތު ފެންނަނީ ދަށްވާނެ މަންޒަރު ކަމަށެވެ.

"އަޅުގަނޑުމެން 2024ގެ ބަޖެޓަށް އަންދާޒާކުރީ ގާތްގަނޑަކަށް %5.4އިން ރާއްޖޭގެ އިގްތިސާދު ކުރިއަރައިގެންދާނެ ކަމަށް. އެކަމަކު މިހާރު އެ ބޭފުޅުން ވެސް ރިވައިސްކޮށްފައި އެ އޮތީ ގައުމީ އުފެއްދުންތެރިކަން އިތުރުވެގެންދާނީ %4.9އިންނޭ،" އަމީރު ވިދާޅުވި އެވެ.

"އެހެންވީމަ ބަދަލުވެގެން މި އުޅެނީ މި އަށް މަސް ތެރޭގައި އެ ބޭފުޅުން ގެނައި ސިޔާސަތުތަކުގެ ސަބަބުން އަދި މި ދިމާވި މާލީ ގޮންޖެހުންތައް މެނޭޖުކުރަން ނޭނގުމުގެ ސަބަބުން، މި ބޭފުޅުންގެ ނާގާބިލުކަމުގެ ސަބަބުން."